Luka 4

Yesu kagezwa na Mwenembago kuluwala

1Yesu kamema Loho Yangʼalile, kabwela kulawa Yordani, kalongozwa na Loho kuluwala. 2Kakala hiko mazuwa milongo mine yogezigwa na Mwenembago, hadile kinhu; na vigamalile kona nzala.

3Mgeza wanhu kamulongela, “Uhawa gwegwe mwanage Mulungu, dilongele dibwe dino digalamke mgate!” 4Komu Yesu kamwidika, “Yandikigwa, Munhu hawa mgima kwa mandiya yeka.”

5Yomala kamkweneza uchana, kamulagusila mhunde baho undewa wose wa ulumwengu mgima. 6Kamulongela, “Mhiko ino na magweka gano gose nokwingha, kilumbo ngolelwa, na niye awo wonigesa nowengha. 7Avo gweye uhagwa mavindi kunhambikila, gokuwa gako gose.” 8Yesu kedika kamulongela, “Yandikigwa, Mgwile mavindi Mndewa Mulungu wako, mtambikile Heyo yali yeka!”

9Yomala kamgala Yerusalemu, kamwika uchana hainhomboti ya idihekalu, kamulongela, “Uhawa gwegwe mwana wa Mulungu, patuka hasi. 10Kilumbo yandikigwa, Kokulagizila malaika zake wakwimilize. 11Wakudanghe mmikono yao, sikuwize kwikwangwala mgulu wako mwidibwe!” 12Yesu kedika kamulongela, “Yandikigwa Sukuumgeze Mndewa Mulungu wako!” 13Na Mwenembago viyamambukize magezo gose, kasegela tanhu kamuleka.

Wanhu wa Nazareti wamulema Yesu

14Yesu kabwela Galilea yamemile mhiko za Loho, na simulizi zake zenela isi yose ili behibehi. 15Kakala yowalanguliza mzingʼanda zawo za nhambiko Mulungu, katunizwa na wose.

16Baho kavika Nazareti, hanhu hayakalile yakulile; na siku ya Sabato kengila mdikanisa kamba vigali mazowela gake; kema wima giladi yasome. 17Kagwelelwa kizumilo cha Mlaguzi Yesaya, na viyamalile kukikunzula, kahona hanhu handikigwe.

18“Loho ya Bwana yahachana hamwangu,

kilumbo kangela mavuta, niwapetele wakiwa mbuli zinogile;

kanhuma kuwalongela wafungigwe wofungulilwa,

waja watulike gameso kamba wolola kabili,

awo wogazwa kamba wodoholelwa,

19Na kupeta mwaka wa Bwana uvumilwe!” 20Yomana kukigubika kizumilo, kambwezela mtumigwa, kakala hasi; na wanhu wose kumbunhulila meso gawo. 21Kandusa kuwalongela, “Lelo didi, gano gandikigwe gavikizwa mmagutwi genu.” 22Na wose wamsindila, wogakanganya malonga ga unozi galawile muulomo wake, walonga, “Ino si yuyuja mwanage Yosefu?”

23Kawalongela, “Kwiza baye monongela fumbo dino, Go mganga, ihonye gwegwe mwenyecho! Manzonza gose gatuhulike, kugatendela Kapernaumu, gatende na hano mina mumuno muiisi yako mwenyecho! 24Kalonga, Kingongongo nomulongelani, Haduhu Mlaguzi yavumilwe muisi yake mwenyecho. 25Bali magambo viniwalongela, kukala na wagane bwando muiisi ya Israeli umwaka viyakalile Eliya, milongo ifungigwe ulanga uchana, miyaka midatu na miyezi nhandatu, nzala nghulu ingile iisi yose. 26Bali hatumigwe Eliya kwa imonga wa hewo komu kwa mgane wa Sarepta muisi ya Sidoni. 27Kabili kukala na wanhu bwando wali na utamu wa dikulu muna Israeli umwaka viyakalile Mlaguzi Elisha; kahi haduhu yahonile komu Naamani munhu wa Siria.” 28Wamema lusango wose waja wali mumuno mngʼanda ya nhambiko Mulungu, vuwagahulike gaja. 29Wamana kwinuka wamulava kunze ya diwambo, wamgala mpaka kuna digongo dija dizengigwe wambo jawo, giladi wampatuse. 30Bali heyo kabita hagatigati yawo, yokigendela na zake.

Mwene mzuka yahonile siku ya sabato

31Imala baho Yesu kachola Kapernaumu, kiwambo cha Galilea, kakala yowalanguliza siku ja ukuhumula. 32Wakanganya nghani malangulizo gake, kilumbo longa jake dikala na mhiko. 33Amuja mngʼanda mwa nhambiko mkala na munhu mwene mzuka mchapalisi; ayo kaguta na dizwi kulu, 34kalonga, “He, tuna mbuli gani tweye na gweye Yesu wa Nazareti? Kwiza kutubananga? Nikutanga gweye uli nani: gwegwe Ungʼalile wa Mulungu!” 35Yesu kamkomhokela yolonga, “Vudala umlawe yuno!” Baho mzuka umzola umbwanha hasi hagatigati, umulawa, haumulumize. 36Wose wasinhuka wailongela, wawo kwa wawo, “Mbuli yaki ino? Kolagiza mizuka michapalisi kwa mhiko za kiundewa, na hewo wolawa!” 37Na simulizi zake zenela mmambwegambwega muisi ija.

Yesu kengila mngʼanda ya Petro

38Yesu viyalawile mngʼanda ya nhambiko, kengila mngʼanda ya Simoni, kamvika mkwe wake, mamo ya sano jake, kagogigwa na lubahila lugaga; na hewo wampula yamuhonye. 39Keza kema behibehi ya iditwi jake, kalukomhokela lubahila luja, nalo lumulawa; mhunde kenuka kawatumikila.

40Viivikile ichungulo, wamgalila wanhu wolumwa wene utamu wa kiyekakiyeka, na heyo kaika mikono yake mmatwi gawo, kawahonya. 41Vyemela mizuka ilawa bwando, kuno itowa nyangi yolonga, “Gweye gwegwe Mwana wa Mulungu.” Bali heyo kawakomhokela, kawagomesa sukuwalonge kamba wamtanga heyo yuyo Kristo.

42Na viivikile imitondo, kalawa kagenda ihanhu hali bule iwanhu; komu madale ga wanhu wakala womzahila, weza kumwake wamzuwila sikuyasegele kumwao. 43Na heyo kawalongela, “Inyandama kupeta mbuli za undewa wa Mulungu na viwambo viyagwe, kilumbo dijo dingalile.” 44Avo kakala yopeta mbuli inogile mzingʼanda za nhambiko muisi ya Galilea.

Currently Selected:

Luka 4: ZAM75

Highlight

Copy