Luka 3

Usenga wa Yohana Msingula wanhu

1Luyakalile Mtawala Kaisari Tiberio yotawala Roma mwaka wa kumi na nhano, na Pontio Pilato hayakalile Luwali wa Uyuda, mndewa Herode katawala Galilea, na Filipo ndugu yake katawala isi ya Iturea na Trakoniti, na Lisania katawala Abilene; 2milongo ya Watambika Wakulu Anasi na Kayafa, Longa da Mulungu dimwizila Yohana mwanage Zakariya kuluwala. 3Na heyo kavika isi yose ili mmambwegambwega ga lwanda lwa Yordani, yowapetela wanhu wasingulwe na kuleka gehile, giladi wasegezelwe matozo. 4Kamba vigandikigwe mkitabu cha Mtulandagu Yesaya yolonga,

“Dizwi ja munhu yotowa nyangi muluwala,

Isanghaneni goya nzila ya Bwana, ugoloseni ubito wake!

5Vizanda vyose vikusilwe, na vigongo na visugulu vihimbuligwe.

Haja haveduke hagoloswe,

hali na imikolongo hatelebuswe!

6Na wose wene zinghuli wowona ukombozi wa Mulungu.”

7Ilawa baho madale bwando ga wanhu vuwamgendele giladi yawasingule, heyo kawalongela, “Mweye mlelo wa mizoka, iyo yalihi yamfunzileni kwinega lusango londa lwize? 8Leleni mujo wa mgaluko wonda uwe usindi unogile, wala sukumgese mmiyoyo mmwenu mulonge, Tweye tuna tata wetu yuyo Abrahamu; kilumbo heyo nomulongelani, Mulungu kodaha kumlavila Abrahamu wana mumuno muna gamabwe gano. 9Kabili lelo vino inhemo ikigwa mdisina da dibiki; kamba biki hadilelile mujo unogile, dokanhigwa dokwasigwa hamoto.”

10Gaja madale ga wanhu wamuuza wolonga, “Avo tutende vilihi?” 11Kedika yowalongela, “Yali na nghanzu mbili, yamgwelele yali bule, na heyo yali na ndigwa yatende vivo.”

12Wawila kodi weza kilumbo wasingulwe, wamuuza, “Mkulufunzi, na tweye tutendeze?” 13Kawalongela, “Sikumsole kodi nghani kubanza vumulagizwe.”

14Asikali na hewo weza wamuuza, “Na tweye tutendeze?” Kawalongela, “Sikumumgudemeze munhu wala kumuhimbila, komu mwenele na kitumetume chenu!”

15Wanhu vuwakalile wobeta mbuli vonda zilawilile, wagelegeza wose mmiyoyo yao kamba Yohana hambwe yuyo Kristo; 16Yohana kedika kawalongela wose, “Niye nomsingulani na mazi, komu ayo yokwiza yali mgaga kubita niye, na niye sidaha kumdoholela nzabi za vilatu, heyo komsingulani mloho ingʼalile, kabili mmoto. 17Heyo lungo lwake lwa kubetela kanalo mumkono wake, kofagila nghani lubuga lwake, koilundiza ndigwa yake kukano jake, bali imikupi koigela hamoto hauzimikaga.”

18Gayagwe bwando kawapetela waja iwanhu yowazuma. 19Bali mndewa Herode, kwa vija Yohana viyamkomhokele kamba havinogile kumsola Herodia sano ja ndugu yake, na kusanghana gehile gayagwe bwando, 20kongezela gehile gake, kamfunga Yohana kolokoloni.

Yesu kabatizwa

21Siku zija wanhu wose vuwasingulwe na Yohana, na heyo Yesu viyabatizwe, viyakalile yompula Mulungu, baho ulanga ugubuke. 22Na Loho Yangʼalile kamuhumulukila, yagambile lukuli kamba lwa nziwa, na dizwi dilawa kuulanga dilonga, “Gweye gwegwe Mwanangu Inogele, nogelwa nghani nagwe.”

Kitabu cha lukolo lwake

23Na heyo Yesu viyasongile kulanguliza, kakala wa miyaka kamba milongo midatu, na wanhu wamgelegeza yuyo mwanage Yosefu, mwanage Eli, 24mwanage Matati, mwanage Lawi, mwanage Melki, mwanage Yana, mwanage Yosefu, 25mwanage Matatia, mwanage Amosi, mwanage Nahumu, mwanage Esli, mwanage Nagai, 26mwanage Maati, mwanage Matatia, mwanage Semei, mwanage Yosefu, mwanage Yuda; 27mwanage Toana, mwanage Resa, mwanage Zerubabeli, mwanage Shealtieli, mwanage Neri, 28mwanage Melki, mwanage Adi, mwanage Kosamu, mwanage Elmadamu, mwanage Eri, 29mwanage Yoshua, mwanage Eliezeri, mwanage Yorimu, mwanage Matati, mwanage Lawi, 30mwanage Simeoni, mwanage Yuda, mwanage Yosefu, mwanage Yonamu, mwanage Eliakimu, 31mwanage Melea, mwanage Mena, mwanage Matatha, mwanage Natani, mwanage Daudi, 32mwanage Yese, mwanage Obedi, mwanage Boazi, mwanage Salmoni, mwanage Nashoni, 33mwanage Aminadabu, mwanage Aramu, mwanage Hesroni, mwanage Peresi, mwanage Yuda, 34mwanage Yakobo, mwanage Isaka, mwanage Abrahamu, mwanage Tera, mwanage Nahori, 35mwanage Serugi, mwanage Ragau, mwanage Pelegi, mwanage Eberi, mwanage Sala, 36mwanage Kenani, mwanage Arfaksadi, mwanage Shemu, mwanage Noa, mwanage Lameki, 37mwanage Metusela, mwanage Henoki, mwanage Yaredi, mwanage Mahalaleli, mwanage Kenani, 38mwanage Enoshi, mwanage Seti, mwanage Adamu, na heyo wa Mulungu.

Currently Selected:

Luka 3: ZAM75

Highlight

Copy