Luka 2

Kuleligwa kwake Kristo Betlehemu

1Siku zija kulawa lufuka kwa Mtawala Kaisari Augusto, giladi walumwengu wose wandikigwe. 2Na dino dijo jandiko ja ikilongozi, dikalile Kirenio hayatawale Siria. 3Wagoga nzila wose wagenda wakandikwe kula munhu hakiwambo chake.

4Na heyo Yosefu kenula Galilea kulawa kiwambo cha Nazareti kakwela kugenda Uyuda, kavika kiwambo cha Daudi kikemigwa Betlehemu, chanduso na heyo kakala munhu wa lukolo lwa Daudi. 5Avo yandikigwe hamonga na Maria sano jake yahali mhambe, na heyo kana inda. 6Avija vuwakalile hiko, zivika siku zake za kulela, kamulela mwanage wa ikilongozi. 7Kamvaza nguwo za unghele, kamtambalika mkiya kiwadilaga ngʼombe, kilumbo hawawene ulegeho mungʼanda ya iwahenza.

8Kukala na wachunga iisi ija, wawasaga kunzolomi wobeta nghondolo zawo ikilo. 9Wedukila walawililwa na malaika wa Bwana, na iyenzi ya Mulungu iwangʼalila mhande zose, na hewo wengilwa na woga bwando. 10Malaika kawalongela, “Sikumdumbe woga! Kilumbo tegelezeni niwagalila mbuli inogile ya ndenghelelo nghulu yonda iwe kwa wanhu wose. 11Avino lelo didi kaleligwa kumwenu Mkombola wanhu, iyo Kristo yali Bwana, mdiwambo ja Daudi. 12Na uno uwo utango kumwenu, movika kinghele yavazigwe vihambo vya unghele, yatambalikwe mkiya kiwadilaga ngʼombe.”

13Mhunde bule weza malaika bwando hamonga na ija imulongozi, dale da uchana kuulanga, wamtogola Mulungu wolonga,

14“Iyenzi kanayo Mulungu uchana kuulanga,

na muiisi tindiwalo kwa wanhu wali na gamanogelwa gake.”

15Waja malaika vuwahalawile kuchola kuulanga, wachunga waja welongela, “Hayani tuchole Betlehemu tukalole nzonza dino ditendeke, diyatulongele Mulungu.”

16Wagenda wokimbila, wamvika Maria na Yosefu na imwana yatambalikwe muna ikiya kiwadilaga ngʼombe. 17Vuwavwene wamana kupeta mbuli zizija ziwalongelwe za imwana ino. 18Na wose wahulike wakanganya kwa higo gawalongelwe na iwachunga. 19Bali Maria kagagoga malonga gano gose, yogagelegeza mmoyo. 20Na wachunga wabwela wotogola Mulungu na kumtuniza kwa gose gawahulike na kugona, kamba vuwalongelwe.

Ndagu za Simeoni na Anna biti Fanueli

21Aho vidivikile siku jenane ja kumwingiza kumbi imwana, wamkema tagwa jake Yesu, kamba viyamkemile malaika haichanduso cha ulwingiza lwa inda. 22Aho vizimalile siku za kungʼazwa kamba viilongile nzuma ya Mose, wagenda Yerusalemu hamonga na ikinghele, giladi wamlavile Mulungu imwana. 23Kilumbo avo gandikigwa mwitorati ya Bwana, “Kila mwana mbigalo mfungula inda kangʼala, yasagulilwe Mulungu.” 24Avo walava nhambiko kilagwa chake igambile torati ya kizumilo cha Bwana, Mahuwa wabili hebu vyana vya mahuwa wabili.

25Kukala na munhu hiko Yerusalemu, tagwa jake Simeoni, na munhu hiyo kakala yagoloke yamgogile Mulungu, yobeta kuhozwa kwa Israeli, na Loho Ingʼalile ikala mmwake. 26Na heyo kakala yalongelwe na Loho Yangʼalile, Honda ufe tanhu mpaka umone Kristo wa Bwana. 27Aija keza mdihekalu kagaligwa na Loho, waja iwavyele wa imwana vuwakalile womgala Yesu mngʼanda giladi wamtendele kamba viili Nzuma; 28Simeoni kambokela mmikono yake, kamtogola Mulungu yolonga:

29“Avo Bwana, mbwisa umulekese mtumigwa wako yagende na mbeho, kamba vulongile.

30Chanduso meso gangu gawona ukombozi wako,

31Utendile hakihanga cha wanhu wose:

32Mulangaza wa kuwamulikila walumwengu wose

na nhunizo ya lukolo lwako lwa Israeli.”

33Tataake na mamaake wakala wokanganya kwa gaja galongigwe kilagwa chake. 34Kawamoteza Simeoni yomulongela Maria, “Lola ino kekigwa, wagwe wenuke bwando muna Israeli, na yawe kilolomboto chonda kigombelwe. 35Na gweye zele jokubita mloho giladi gagubuke magelegeza ga mioyo bwando.”

36Kukala na mlaguzi mtwanzi kivyele, tagwa jake Ana biti Fanueli, kulawa lukolo lwa Aseri, na milongo yake bwando; kakala na mkasano wake miyaka saba aho hauwanawali wake. 37Ayo mgane kana milongo minane na ne, hasegelaga mngʼanda ya Mulungu, bali yompula na kuleka ukuja na kumfugamila mavindi ikilo na imisi. 38Heyo kalawilila ikidami kija, kamtogola Mulungu yowapetela mbuli zake wose wobeta ukombozi mu Yerusalemu.

39Vuwamalile kuvikiza gose galagizwe na Nzuma ya Bwana, wabwela Galilea kumwao kukiwambo cha Nazareti. 40Yuja imwana kakula kongezelwa mhiko, yomema nghungwe; na Unozi wa Mulungu ukala hachana hamwake.

Yesu mmhale yolangulizwa mdihekalu

41Wavyele wake Yesu wagendaga Yerusalemu mwaka na mwaka kusikunghulu ya Nghumbulilo (Pasaka). 42Avo viyavikile umhale wa mulongo umwe na mibili, wakwela hamonga na heyo kamba vikili kizowe cha sikunghulu. 43Aluja vuwamalile kuzivikiza siku zawo wokala wobwela kumwao, imwana Yesu kasigala kuchugu kuja Yerusalemu, wavyele wake hawavitangile. 44Na hewo wagiza kamba kamumo mmwanza wao, wagenda tetete na imingilo, wasonga kumzahila mwa wayao na mbwiga zawo. 45Vuwalekile kumona, wabweleganya Yerusalemu womzahila. 46Ivika siku jekadatu wamona mdihekalu yakalile hagatigati ya wakulufunzi yowategeleza na kuwauza. 47Na waja wose wamuhulike wasinhuka kwa fiyuko zake na kwidika kwake. 48Waja wavyele vuwamuwene wakanganya, na mamo wake kamulongela, “Mwanangu, mbona kututendela vino? Lola amba tataako na niye tukuzahila kwa usungu!”

49Kawalongela, “Habali mzahile? Hamvitangile kamba vinyandakana niwe mmbuli za Tata wangu?” 50Na hewo hawaditangile longa dija diyawalongele.

51Yomana kubwela nawo hamonga, keza Nazareti, kakala yowatumikila; bali mamo wake kagagoga malonga gano gose mmoyo. 52Na Yesu kongezelwa nghungwe, umhale na unozi kumnogeza Mulungu na iwanhu.

Currently Selected:

Luka 2: ZAM75

Highlight

Copy