Luka 15

Nghondolo na lobo zagile

1Waja wose wawila kodi na wene gamatozo wakala womkwenhukila Yesu, giladi wamtegeleze. 2Mafariseo na Wana Nzuma kuno womduguda walonga, “Munhu ino kagomelaga wene matozo na kuja nawo.”

3Kawalavila hala dino, kalonga, “Yalihi kumwenu mwene muzo umwe wa nghondolo, yahagilwa na yumwe, yaleke kuwaleka waja imilongo kenda na kenda kunzolome? 4Yachole yakamzahile ija yagile tanhu yamone? 5Na heyo yahamona, komwika hamayega gake haimhambaga. 6Na vonda yavike kungʼanda yake, kowakema waja mbwiga zake na wakalabehi wayage yowalongela, Dengheni hamonga na niye, kilumbo nimpata nghondolo wangu yakalile yagile! 7Nowalongelani, Avo vivo kokuwa na ndenghelelo kuulanga kwa mzoko wa mwene matozo yumwe yahaikunzula, kubanza waja milongo kenda na kenda, hawasulukila kwikunzula.

8Hebu mtwanzi gani mwene mhiya mulongo umwe, yahagilwa na lobo imonga, yaleke kubwinha kiwenge na kufagila ngʼanda yake na kuzahila nghani, mpaka yayone? 9Na heyo yahayona, kokema mbwiga zake na wakala-behi wayage yowalongela, Dengheni hamonga na niye, kilumbo niyona ija lobo yangu yagile! 10Nowalongelani, avo vivo kokuwa na ndengho hamalaika wa Mulungu kwa mzoko wa mwene matozo yumwe yahaikunzula.”

Hala ya mwana yapotele

11Kalonga, “Munhu yumwe kakala na wanage wabili. 12Ayuja imdodo kamulongela tata wake, Tata, ninghe mbagu ya mhiya azo zonda uninghe! Yomana kuwagolela vinhu vyake. 13Hawa baho mazuwa si bwando, aija imdodo kakwegeza vyose, kachola zanza da isi ya kutuli; aka yomana kuzipwililisa vihile vinhu vyake vyose kuli bule na mzoko. 14Viyamalile kuvipwililisa vyose viyakalile navyo, nzala nghulu ingila isi ija, ayuja mmhale kasonga mzahilo. 15Kachola kamwandama mwene kaya wa isi ija, na heyo kamgala kumgunda wake kuwengha ndigwa nguluwe. 16Kakala yosulukila kwigutiza mmibeyu isigale ija yawadile waja iwanguluwe; avo kukala haduhu munhu yamgwelele kinhu. 17Viyokala yogesa munda na kitupe chake kalonga, Haa! nyakadala wengahi wa tataangu woja vyakuja na kuvileka, na niye hano nofa na nzala. 18Ndoko nihalawe, nhyole kwa tataangu hamulongele, Tata, niye nhoza hachana haulanga na hano hamwako. 19Havigambile niye kabili kukemigwa mwanago; nhenda kamba vija vigambile imonga wa nyakadala zako!

20Kahalawa kachola kwa tataake; viyakalile kutali yokwiza, tataake kamona, kagwa bazi yomana kumkimbilila, kamwamha hasingo, kamnonela nghani. 21Aija imwana kamulongela tataake, Tata, nghosa niye uchana kuulanga na kumwako, havilumbile niye kabili kukemigwa mwanago. 22Komu tataake kamulongela nyakadala wake, Ngalileni mbwisa guo dizamile, mumvaze, mgeleni na mbete mkidole na vilatu mmigulu! 23Mgaleni na ija ngwada yanonile, mkeheni, na tweye tuje na kudenghelela. 24Kwa mzoko ino mwanangu kakala yafile, na heyo kazuka; kakala yagile, avino koneka; wasonga kudenghelela.

25Ayuja mwanage imkulu kakala kumgunda; avija viyokala yobwela, na kukwenhuka behi na ingʼanda, kahulika kiyogoyogo cha nyila na mvina. 26Yomana kukema nyakadala imonga kamuuza, Mzonzo uno uwo ulihi? 27Kamulongela, Mdodo wako kabwela, na tata wako kamchinjila dija dingwada dinonile, kilumbo kabwela mgima. 28Kadinhuka umoyo, kalema kwingila mngʼanda; avija tataake kalawa kunze, kamuhembekeza. 29Kamwidika tataake kalonga, Lola! niye nikutumikila milongo mingahi, sinatoza mbuli zako mazuwa gose. 30Hunaningha hata chana mbuzi, ndenghe na mbwiga zangu; aino mwanago kabwela yadile vinhu vyako hamonga na migobanya na mizenzeusi, kumkomela ngwada yanonile! 31Kamulongela, Mwanangu, gweye kwa hamonga na niye sikuzose, na vinili navyo vyose vyako. 32Avo kudenghelela na kutenda mdongwe cheiya vilumba, kilumbo ino mdodo wako kakala yafile, na vino kazuka; kakala yapotele, na heyo koneka.”

Currently Selected:

Luka 15: ZAM75

Highlight

Copy