Luka 16

Hala ya mtunza mali yali mponda

1Kawalongela wanahina wake, “Hakala na munhu yumwe mwene mhiya, kakala na mtunza mali wake; iyo wakala womdeta kumwake kamba kopwililisa mali gake. 2Kamkema kamulongela, Mbuli gani ino inihulike kumwako? Lava mhetelo zose ziutunzile mali gangu, kilumbo kulawa vino kabili hudaha kuteganya mali gangu. 3Yuja mtunza mali kalonga munda na kitupe, Nhendeze; kilumbo bwana wangu kosegeza kwiza msanghano zake. 4Kulima sidaha, na kupula nokona kinyala; nivitanga vonda nhende, giladi nihalavigwa muna isanghana kwiza wangomele mmangʼanda gao. 5Yomana kuwakema wadenyi wose wa ija bwana wake, yumweyumwe, kamulongela wa ichanduso, Kokuwila denyi yaki bwana wangu? 6Kalonga, Visaga miya vya mavuta. Kamulongela, Sola lupwilili lwako, kala mbwisa, siliginha milongo mitano! 7Ilawa baho kamulongela iyagwe, Nagweye kokuwila nyingahi? Kamulongela, Visa miya vya muhunga. Kamulongela, Sola lupwilili lwako, na gweye siliginha milongo minane! – 8Mndewa kamtogola yuja mtunza mali mponela, kwa mzoko kagatenda gaja kwa ubala, kilumbo wana wa imbago ino, muna zingelekwa zao wenyecho, wawaga wabala kubanza waja wana wa ihazelu.

Ukungulufu wa kuivikiza Nzuma

9Na niye nowalongelani, Itendeleni mbwiga kwa mali za uponela, giladi gahaswela, wamgomeleni muja muwokala digunge. 10Uhawa mkungulufu mkidodo, kokuwa mkungulufu mkikulu; na heyo mponela kwa kinhu kidodo, kokuwa mponela na muna ikinhu kikulu nghani. 11Baho kamba hamuwile wakungulufu muna gamali ga uponela, yalihi yonda yawenghe babulamana ya ihoko? 12Na kamba hamuwile wakungulufu kwa mhiya za munhu yungwa, yalihi yonda yawenghe ija igambile yenu wenyechwa?

13Kuduhu mtumigwa yonda yadahe kuwasanghanila mabwana wawili; kwa mzoko kwiza komwihila ino na kumnogela ino, bule kokiilumba na yuno na kumwehula yuno; hamdaha kumsanghanila Mulungu na Mhiya.”

14Waja Mafariseo senhambo walonda mhiya, wagahulika gaja gose, womana kumkekela. 15Kawalongela, “Mweye mwemwe mkidundula ihoko ha walumwengu, komu Mulungu kaitanga mizoyo yenu, kilumbo kinhu kihatunizwa kwa walumwengu, chei acho kicho yokihila Mulungu.

16Nzuma na Watulandagu vikala baho, kimambukizo Yohana; lulawile kiwango hicho usenga unogile wa undewa wa Mulungu ubwililiswa, na kila munhu kokidodomeka kwa miguvu. 17Amba vibuha nghani ulanga na isi viyangayuke, sembuse iinege sele imonga ya Nzuma.

18Na munhu yahajasa sano jake, yahasola sano diyagwe, kotenda ugoni; na heyo yosola aija yasigwe na mkasano, ayo vivo kengila muugoni.

Lazaro hamulango wa niwene mhiya

19Hakala na munhu yumwe mwene mhiya bwando, yavalaga nguwo za nzambalau na nghotelezo zinogile, na kuja vinonile nghani milongo yake yose. 20Na maskini imonga twaga jake Lazaro, ayo kekagwa hamulango wake, kenela vilonda bwando. 21Avyo kakala yosulukila kwiguta na uja upakapaka ulagale kulawa hameza ya yuja tajili; umbwa nawo wezaga wamlambita vija ivilonda. 22Avija ayuja maskini yomana kudanganika, kasoligwa na malaika mpaka haimhambaga ya Abrahamu; kalekale na yuja mwenemhiya na heyo kadanganika, wamzika.

23Aluja luyavikile kuzimu, yomana kwinula meso gake viyakalile yogaduka, kamona Abrahamu kutali, na Lazaro yamfagatile haimhambaga yake. 24Kalila, kalonga, Agweye tata Abrahamu, nyonela bazi, mgale mbwisa Lazaro, yazabike isota ya ikidole chake mmazi, yandambise mululimi lwangu, amba notakamila hano hana umoto! 25Abrahamu kamulongela, Mwanangu, gelegeza tanhu gaja gaubokele gakala ganogile kuugima wako, na ino Lazaro kakala yopata gehile; avino sambi kahano kohingilwa goya, na gweye kogaduka. 26Na gabanzile, ahano na mweye hiko, kwikigwa kolongo kulu, kwa mzoko waja wolonda kulawa kuno kugenda kumwenu, walemelwe, wala wanhu wa kumwenu sukuwaloke kwiza kumwetu. 27Kalonga, Basi tata nokupula, mgale kungʼanda ya tataangu! 28Kilumbo niwasigaza ndugu watano; yakawapetele, na hewo sekewavike hanhu hano hauli mgaduko. 29Abrahamu kamulongela, Wakuko Mose na Watulandagu, avo na wawategeleze wawo! 30Kamulongela, Dedede tata Abrahamu, maza kamba yahawagendela munhu yalawile kuzimu, woluziga. 31Kamulongela, Kamba hawahulike Mose na Watulandagu, honda waluzige viyemela munhu yahazuka kulawa kwa wafile.”

Currently Selected:

Luka 16: ZAM75

Highlight

Copy