Luka 14

Vigoda vya kuulongozi

1Viyakalile yokwingila siku da ukuhumula mngʼanda ya mkulu imonga wa Mafariseo yaje mandiya, wakala womtunduwila. 2Haulongozi wake kamona munhu mwene utamu wa baridi. 3Yesu kawauza waja Wana Nzuma na Mafariseo, kalonga, “Vilumba kuhonya munhu siku da ukuhumula, hebu havilumbile?” 4Na hewo wanyamala; kamgoga kamuhonya, kamulaga yachole. 5Kawalongela, “Yuyo yalihi kumwenu mwene mhunda hebu ngʼombe, yahengila mkisima, yaleke kumlava baho hata ihawa siku da sabato?” 6Na hewo hawamwidike mbuli.

7Viyawawene waja wagonekwe wosagula vigoda vya kuulongozi, kawalavila hala kalonga, 8“Uhagonekwa na munhu wize halusona, sukuukale kigoda cha kuulongozi; kwali mmanye mmwanza wawo wagonekwe kamumo mkulu kubanza gweye. 9Yuja yakugoneke gweye hamonga na yuja mkulu yahavika, kokulongela, Mnegele yuno; bahaja kogwa kinyala, vonda ubwezigwe hakisogo chawo wose. 10Komu uhagonekwa, chola ukakale kukisogo, giladi mwene kukugoneka vonda yeze, yakulongele, Miyangu, kwenhuka kuja kuulongozi; bahaja kopata nhunizo havihanga vya waja wose wali hana gamandiya. 11Kilumbo munhu yokitopa mwenyecho, kogelwa kinyala; na yuja yali bule topa mwenyecho, kogelwa nhogo.”

Kugoneka wakiwa

12Kamulongela na ija yamgoneke, “Uhatenda mandiya ga imisi hebu ga ichungulo, sukuwagoneke mbwiga zako hebu lukolo lwako hebu ndugu zako wala waja wokala mmabehi nagwe, wene mhiya, kwa mzoko kwiza sukuwakugoneke kabili na gweye, wakulihile! 13Komu uhatenda mandiya, wagoneke wakiwa na walemale, mbetembete na mbugumbugu! 14Avo mina kumota, kilumbo wano wabule cha kukuliha, agweye kwiza kolihigwa haja wene ihoko honda wazuswe.”

Lusona lwene gamandiya bwando

15Imonga wawo waja wakalile hamonga hana gamandiya, viyahulike higo, kamulongela, “Kamota yuja yondayaje chakuja mundewa wa Mulungu!”

16Yesu kamulongela, “Kukala na munhu yateleke mandiya bwando, kawagoneka wanhu bwando. 17Kipigiti cha gamandiya vikivikile, kamtuma nyakadala wake, yachole yakawalongele wagonekwe, Izoni, kilumbo vyose vyenela! 18Wasonga wose kwihwelezahweleza hamonga; waichanduso kalonga, Nigula mgunda, avo nochola haulole; nokupula sikuunghalalile! 19Iyagwe kalonga, Ngula mulongo umwe wa ngʼombe wa kubulula magadi, avo nochola hawageze; nokupula, sikuunghalalile! 20Iyagwe kalonga, Ndawila mmhambe, avo honda nize. 21Yuja nyakadala kabwela, kampetela mndewa wake ago gose; baho mwene ngʼanda kagwa lusango, kamulongela nyakadala wake, Lawa mbwisa ugende mzinzila nghulu na mnzila ndodo, uwagale hano wakiwa na walemale, mbugumbugu na mbetembete! 22Nyakadala ija kamulongela, Mndewa, goundagize gose nigasanghana, komu ingʼanda hainamema. 23Mndewa kamulongela nyakadala wake, Lawa uvike kunzila na mmambwegambwega, ukawadoheleze kwingila, ngʼanda yangu imeme! 24Kwa mzoko nomulongelani, wambigalo waja wagonekwe haduhu hata imonga yonda yavilanze vyakuja vyangu.”

Kupeta mhiya za zengo hebu za nghondo

25Madale bwando ga wanhu vuwailongoze hamonga na Yesu, kawahindukila kalonga, 26“Munhu yaheza kumwangu, kamba hamwihile tata wake na mamaake na sano jake na wanage, na ndugu zake wa kimbigalo na wa kitwanzi, na kwihila loho yake mwenyecho, hadaha kugalamka mwanahina wangu. 27Na heyo yalekile kusola msalaba wake na kuminza niye, hadaha kugalamka mwanahina wangu. 28Kwa mzoko yalihi mmwanza wenu yolonda kuzenga ngʼanda tali, yaleke tanhu kupeta mhiya za zengo kamba zenela? 29Kilumbo yahasonga kwika mhwambaza, yahalemelwa kuimambukiza, ilawa baho wose wahavona womtendela uponela wolonga, 30Munhu ino kasonga kuzenga, na heyo kalemelwa kuimambukiza.

31Hebu mndewa yalihi yahagenda kuli nghondo yakaihume na mndewa miyage, yaleke kukala tanhu yagelegeze kamba kodaha kuwatuma asikali wake elfu kumi, waitinghanile na yuja yomwizila na sikali elfu ishirini? 32Kamba hadaha, kotuma usenga kwa yuja iyagwe yahali hamwande, yazahile ulamuzi. 33Avo vivo kuduhu munhu kumwenu yodaha kugalamka mwanahina wangu, kamba halekile vyose viyali navyo.

34Mkele unoga; komu mkele uhagilwa na ukali wake, chogeligwa choni kikolele? 35Haunoga kumgunda hebu kumhugutu, komu wasigwe kunze; mwene magwiti ga kuhulika nayahulike!”

Currently Selected:

Luka 14: ZAM75

Highlight

Copy