Luka 13

Mgaluko

1Kidami kicho wakala baho wanhu wampetele mbuli za waja Wagalilea, senhambo Pilato yahanganye mulopa wao na nhambiko zao. 2Kawedika kawalongela, “He, mokwagiza kamba waja Wagalilea wakala na tozo kuwabanza Wagalilea wose, kileka wandamwe na janga dino? 3Nomulongelani, Ilawahi! kamba hamwiyalale, mweye mose kwiza mokwangamila vivo. 4Hebu waja mulongo umwe na wanane wagwilwe na didungu dija ja Siloamu diwakoma, mokwagiza kamba waja wakala watozile kubanza wanhu wose wakalile Yerusalemu? 5Nowalongelani, Isatuka hiyo! kamba hamwinyanyanhe, mweye mose mokwangamila vivo.”

Mkuyu haulelaga mujo

6Kalava hala kalonga, “Munhu yumwe kakala na mkuyu uhandigwe hagati ja mgunda wake wa mitongolo, kagenda kazahila mujo muja mumkuyu, hauwene. 7Kamulongela kisepi wa umgunda wa imitongolo, Lola miyaka midatu ino niza nozahila mujo mdibiki dino, aka sipatile kinhu; avo ukanhe, viyema hasi ogela sesela. 8Kamulongela, Bwana, uleke mwaka uno tanhu, niuhalilile, niugelele mhugutu. 9Uhalela mujo vokuwa goya; aka, vinguzaza, chei ukanhe basi.”

Mtwanzi yabongomale kahonela sabato

10Siku imonga ya sabato Yesu kakala yolanguliza mngʼanda ya nhambiko, 11Muja mngʼanda mkala na mtwanzi mwene mzuka wa udodwa, umgogile miyaka mulongo umwe na minane, avo kakala yabongomale, hadahile kugoloka ngʼo. 12Yesu viyamuwene, kamkema kamulongela, “Mamo kufunguligwa uno udodwa wako!” 13Kamwikila mikono mditwi jake; mhunde baho kagoloka, kamtogola Mulungu. 14Komu mkulu wa ngʼanda ya nhambiko kamonela Yesu lusango, kilumbo kamuhonya siku da ukuhumula, kedika kawalongela wanhu wakalile mumo, “Vigamba siku sita za kusanghana, avo mwize siku hizo muhonyigwe, komu sukumuhonyigwe siku da kuhumula!” 15Mndewa kamwidika kalonga, “Mweye iwabala, mweye mose hamfungulaga ngʼombe au mhunda zenu mkikwama siku da ukuhumula na kuwagala kumazi wangʼwe? 16Komu yuno yagambile mwana wa Abrahamu, havimwandame kufungulilwa siku da ukuhumula kifungo kino, Mwenembago kiyamfungile mulongo umwe na minane?” 17Viyalongile hivo, wose waja wokala wobamila, wagwa kinyala, komu wanhu wayagwe wose wadenghelela vinzonza vinogile vija vitendigwe na Yesu.

Mbeyu ya mvule

18Kalonga, “Undewa wa Mulungu ulingana na choni, kabili niulinganye na choni? 19Ulingana na mbeyu ya mvule, yaisolile munhu kaihanda mumgunda wake, nayo yakula yogalamka biki, viyemela ndege wa uchana wahumula muli gamatambi gake.”

Hala ja mhumba

20Kabili kalonga, “Undewa wa Mulungu niulinganize na choni? 21Ugalamka kamba mhumba, yaisolile mtwanzi, kaihanganya na mhishi ndatu za usage, ilawa baho usasa wose.”

Mlango msisili wondauhindigwe

22Na heyo katenda uchozi, kachola Yerusalemu, kabita mviwambo na vibuga yolanguliza wanhu. 23Munhu imonga kamuuza, “Mndewa, wanhu wonda walokoke honda wawe bwando?”

24Kawalongela, “Gombeleni kwiza mwingile mlango msisili, kilumbo nowalongelani, bwando wonda walonde kwingila, komu honda wadahe. 25Ilawa baho mwene ngʼanda vonda yenuke kuufunga mlango, baho honda msonge kwima wima kunze na kugongʼonda mlango, kuno mlonga, Mndewa, Mndewa, tuvugulile! Na heyo kokwidika yowalongela, Siwatangileni mweye kumulawa! 26Baho mosonga kulonga, tuja tungʼwa hakihanga chako, na gweye kutulangukiza mvibuga vyetu! 27Baho kowalongelani mweye, Siwatangile kumulawa, gobokeni kumwangu mose mtendile gehile! 28Kuko konda kuwe kililo na kugegeda meno, honda muwone kina Abrahamu na Isaka na Yakobo na Watulandagu wose wamumo muna Undewa wa Mulungu, na mweye wenyego mokiyona mwasigwa kunze.

29Wabaho wonda walawe kulawilo na kuswelo wa dizuwa, kusongela mwambu uno kuzigila mwambu uja, hewo wokala hana gamandiya muna Undewa wa Mulungu. 30Loleni wa ikimambukizo wogalamka wa ichanduso, na waja wa ichanduso wogalamka wa ikimambukizo.”

Kizongo Herode; Yerusalemu ukomaga walaguzi

31Kimilo kikija Mafariseo wayagwe wamgendela, wamulongela, “Lawa hano, uchole hanhu hayagwe, kilumbo Herode kokuzahila yakukome.”

32Kawalongela, “Gendeni mkamulongele yuja kizongo, Lola lelo na mayo nowinga vinyamkela na kuhonya watamu; kisindo igangu goiduganya, nogangamala. 33Komu lelo na mayo na kisindo vinyandama kuchola, kilumbo havilumbile Mlaguzi yakomwe kunze ya Yerusalemu.

34Gweye Yerusalemu, Yerusalemu, ukomaga watulandagu, na kuwatowa na mabwe watumigwe kumwako; miyanza mingahi nondile kuwakwega wanago, kamba vija nguku viyokwegeza vyanage mzimbawa zake, komu hamvilondile. 35Teganyeni, amba avo mulekelwa Dingʼanda jenu; na niye nowalongela, honda mmbone kabili ngʼo, komu siku ija yonda mulonge, Yatunizwe Yokwiza mditwaga da Magana!”

Currently Selected:

Luka 13: ZAM75

Highlight

Copy