Luka 12

Mhumba ya Mafariseo

1Madale ga wanhu mizo kwa mizo vuwalundile, kuno wokibojaga, kasonga tanhu kuwalongela wanahina zake, “Teganyeni na mhumba ya Mafariseo, vyemela uwo uzenzeleganye! 2Haduhu kinhu kifisigwe kwiza kileke koneka, hebu kiifisile kileke kutangika. 3Avo gose gamsongile Kiziza, gohulikwa habumuke, na gaja gampetile hagutwi da munhu mngʼanda kugati, gobwililiswa uchana ha zingʼanda.

Sukumdumbe wene kukoma zinghuli ziyeka

4Na niye nomulongelani, mweye mbwiga zangu, sikumuwadumbe awo wokoma zinghuli, ilawile baho hawadaha kutenda diyagwe. 5Komu nowalagusila ayo Yonda mumdumbe; mdumbeni Ija Yahamala kumkoma munhu, kodaha na kumwasa mkolongo ja moto; avo nomulongelani, Iyo yuyo mumdumbe!

6Chei, videge vitano haviguligwa kwa vigebe vibili? komu hata kimonga chao hakisemwezigwa hakihanga cha Mulungu. 7Kileka na azo mvili zenu za mpala zipetigwa zose; avo sukumdumbe, mweye mbanza videge bwando. 8Komu niye nomulongelani, munhu yonhogola hawamemile wanhu, Mwana wa Munhu na heyo komtogola hawamemile malaika wa Mulungu. 9Na munhu yahambela hakihanga cha wanhu, Mwanage Munhu na heyo kombela hakihanga cha malaika wa Mulungu.

10Munhu yoyose yonda yalonge mbuli ya bamila kwa Mwanage Munhu, kosegezelwa tozo jake; komu ayo yonda yamulonge gehile Loho Yangʼalile, honda yasegezelwe tozo jake.

11Aho honda wamgaleni mzingʼanda za nhambiko hebu muna ivitala na ha wakulu giladi mtaguswe, sikumdungwedungwe, mgelegeza gaja ga ukulonga na kwigombelezela. 12Kilumbo kipigiti kija Loho Yangʼalile kowalangukizani gaja ga ukulonga.”

Kuwila ulisi; mwene ndigwa bwando

13Munhu imonga muja muna gamadale kamulongela, “Mkulufunzi, mulongele ndugu yangu yagole uja ulisi wetu!” 14Kamulongela, “Munhu gweye, yalihi yanikile niye niwe mlamuzi au mgozi kumwenu?” 15Kawalongela, “Loleni mwitunze na choyo, kwa mzoko ugima wa munhu haulawa mvinhu vyake vihawa bwando, viyali navyo.” 16Kawalavila hala kalonga, “Gunda da munhu imonga mwene mhiya dilela nghani. 17Kandusa kugelegeza munda na kitupe kalonga, Nhendeze, kilumbo nabule hanhu ha kulundiza ndigwa yangu. 18Kalonga, Nhende vino, niibomole mikano yangu, ilawa baho nizenge iyagwe mikulu ibanzile, na himo nokwika ndigwa zangu zose na vinhu vyangu. 19Nihaziga nokilongela ni mwenyecho, Kuna vinhu bwando goya, viuwikile muumbili mmilongo bwando; haya humula, uje ungʼwe, udenghe! 20Bali Mulungu kamulongela, Kwa mbozi gweye, ikilo didi lelo woilonda loho yako; na vinhu vuwikile umbili, vyokuwa vya nani? 21Avo vivo ili kamba munhu yokwikila ndigwa zake umbili, yolema kuulimbika muzo wake kwa Mulungu.”

Sukumgaiye upile wenu

22Kawalongela wanahina wake, “Avo nomulongelani, sikumgadukile upile wenu mulonge, Toja choni, hebu sikumgadukile nghuli zenu mulonge, Tovala choni? 23Kilumbo upile ubitaga ndigwa, na lukuli lubitaga nguwo. 24Gelegezeni mabondwa, hawahandaga hebu hawahunaga; wabule kano hebu hanhu ha kwikila, komu Mulungu kowegusa na hewo; che, mweye hambanzile ndege hakulu? 25Avo kumwenu yalihi yadahile kwigaza giladi yongezele milongo yake ivike kamba mhima? 26Avo gayagwe habali mgagaiya; kumbe hamdaha kusanghana hata kili kidodo? 27Gelegezeni maluwa kamba vigokula; hagasanghana hebu hagakutika; na niye nowalongela, wala Salomo muna iyenzi yake yose havazigwe vinogile vigambile dimwe da maluwa ago. 28Avo Mulungu yahaivaza hivo milolo ya muhulo, ikalaga lelo dino, mitondo yokwaswa hamoto, chei, habanza nghani kumvazani mweye wene nhamanilo ndodo?

29Avo mweye sukumuuze, Tuje choni hebu tungʼwe choni, wala sukumwidundule! 30Kwa mzoko ago gose wanhu wose wa muiisi wogazahila; bali Tata wenu kavimanya kamba gago msulukila. 31Komu uzahileni tanhu undewa wa Mulungu na ago gose momemezelwa.

Mugonelele kuno mombeta mndewa wenu

32Sukumdumbe mweye kidonzi kidodo, kilumbo Tata wenu kanogelwa kumwinghani uja Undewa. 33Gulizeni vumuli navyo, mulave nhosa; ishoneleni mikwizi hailalaga, giladi mkekile kuulanga umbili hauhungukaga, ako hakuvika mbavi hebu mhalata yabanange. 34Kilumbo bikilo jenu hadili, baho honda ikale na miyoyo yenu. 35Idazeni mvigudi vyenu, na taa zenu zakege! 36Na mweye mgambe kamba wanhu wobeta mndewa wawo, vonda yabwele kulawa mmhambe, giladi vondayeze yotenda hodi, mhunde wamvugulile. 37Wamota waja nyakadala wagambile, mndewa wawo vondayeze kowavika meso; ihoko nomulongelani, kokifunga lukumbulu na kuwagomela hana gamandiya, kuno yowatumikila. 38Viyemela yaheza kimilo chekabili hebu chekadatu, yawavike vivo, wamota nyakadala awo!

39Komu ditangeni longa dino, kamba mwene ngʼanda mana yakitangile kipigiti chonda yeze mbavi, yahakalile meso giladi ngʼanda yake sikwibomolwe. 40Na mweye kaleni meso, kwa mzoko Mwana wa munhu kokwiza kipigiti chonda mleke kugelegeza!”

Miyawi ya mtunza mali yali mkungulufu

41Petro kamulongela, “Mndewa, hala hijo kotulongela tweye twiyeka, hebu wanhu wose?”

42Mndewa kalonga, “Yalihi mtunza mali mkungulufu na mwene zifiyuko – ayo mndewa wake yamwinghile ukulu wa kuwengha wayage chakuja mkipigiti chawo? 43Kamota nyakadala ija yogamba, mndewa wake yaheza, yamvike yosanghana higo! 44Ihoko nomulongelani, komwika yawe mkulu wa vinhu vyake vyose. 45Komu nyakadala ija yahalonga munda na kitupe, Mndewa wangu heza kokawa, na heyo yasonge kuwatowa wayage wambigalo na watwanzi, yoja yongʼwa na kukoligwa, 46mndewa wake nyakadala hiyo kokwiza zuwa yalekile kuditanga, na kipigiti yalekile kukimanya, komkanha nyenza mbili, na kumwika hamonga na waja wali bule nhogo.

47Nyakadala ija yazitangile ngelegeza za mndewa wake, yalekile kwika goya hebu kusanghana manogelwa gake, kosunigwa nghani. 48Komu yuja havimanyile, heyo kagatenda gagambile kutowigwa, kosunigwa hadodo; kilumbo yuja yagolelwe bwando, kumwake ayo volondigwa bwando; na yuja yongezelwe bwando nghani, kumwake ayo volondigwa bwando nghani.

Kwasa moto muisi, ama tindiwalo

49Niye niza kwasa moto muisi; kamba uhaka, choni kibanzile kinilonda? 50Komu vinyandama nisingulwe, na niye nogaduka vilihi giladi honda uzige! 51He, mokwagiza kamba niza kugala tindiwalo muisi? aka mbe, nomulongelani, komu mmwagemwage! 52Kwa mzoko ilawile vino, ngʼanda imwe okuwa mumo wanhu wanhano, mmwagemwage wadatu kwa wabili, na wabili kwa wadatu. 53Mmwagemwage tata na mwanage, mwana na tataake, mamo na mwanage wa kitwanzi, mwana wa kitwanzi na mamaake, mkwe wa munhu na mkwe wake, mkwe na mkwe wa munhu.”

Kutambula vitango vya Yesu na kwiduganya

54Kawalongela madale, “Kamba muhona mibingu isimbuka kulawilo, mhunde molonga, mvula kokwiza, na vivo ili. 55Kamba ubeho uhabuma kikomo cha msimu, molonga, kokuwa zuwa kali, na vivo ili. 56Wazenzeleganye mweye, mvitanga kutambula kihanga cha isi na ulanga; vilihi hamtambula milongo ino?

57Habali mweye wenyego hamulamula gali ihoko? 58Kwa mzoko uhaikoleleza na mdwanzi wako kwa mkulu wa ikitala, aho hamnzila iyohe kwiduganya nayo, giladi sikuyeze kukukwekwesa kwa mwene kitala, na mwene kitala sikuyakugele mmikono ya mtowa mbongho, na heyo mtowa mbongho yakugele mkifungo. 59Nokulongela, honda ulawe himo ngʼo, hata vonda umale kuliha lugebe lwa mwisho.”

Currently Selected:

Luka 12: ZAM75

Highlight

Copy