Sanghano 1
1
Yesu viyakwelile kuulanga kalava mbilu
1Miyangu Teofilo, muna ikitabu cha ichanduso nikwandikila gose, Yesu gayasongile kugasanghana na kulangukiza; 2Kuvikila siku dija viyasoligwe kuulanga, aho viyamalile kuwalagiza watumigwa waja wayasagule, mbuli za Loho Yangʼalile. 3Kabili waja wawo wayalawilile na kuwalagusila baho kwa baho kamba mpile viyamalile kugaduswa; na zija siku za kuwalawila na kulonga nawo mbuli za Undewa wa Mulungu, zikala milongo mine. 4Viyamalile kuwakwegeza kawalagiza, sukuwalawe haja Yerusalemu, komu wakibete kilaga cha Tata “chumuhulike kumwangu. 5Kilumbo Yohana kasingula na mazi, komu mweye mosingulwa na Loho Yangʼalile, kabili siku zino zisigale aka si bwando.”
6Vuwetinghanile wamuuza walonga, “Mndewa, mazuwa gano baho honda uwabwezele Waisraeli undewa wao?” 7Kawalongela, “Havilumbile mweye kukitanga kikomo hebu kipigiti, Tata kiyakikile kwa mhiko zake Mwenyecho. 8Komu mweye mogwelelwa mhiko aho Loho Yangʼalile yahawahulumukila, baho mogalamka wasindi wangu hano Yerusalemu, na isi yose ya Uyuda na Samaria, mvike uzigililo wa iisi.”
9Viyamalile kulonga higo kenuligwa uchana, wolola bingu dimsola kulawa mmeso gao.
10Vuwakalile wobunhula meso kuulanga koyochola, mhunde wambigalo wabili wene nguwo nzelu wema bahaja hamwao, 11na hewo walonga, “Mweye wambigalo wa Galilea, vilihi vumwimile mlola kuulanga? Yuno Yesu yasoligwe kumwenu kukwenezwa kuulanga, kobwela vivo vumona yogenda na zake kuulanga.”
Matia kasagulwa mtumigwa hanhu ha Yuda Iskariota
12Wasegela haja hakigongo kikemagwa cha mizeituni, kili behi na Yerusalemu uchozi uli bule mwiko siku da ukuhumula, wabwela Yerusalemu.
13Wengila wakwena kudigala dija diwakalile, yuyo Petro na Yohana, Yakobo na Andrea, Filipo na Toma, Bartolomeo na Mateo, Yakobo mwanage Alfeo na Simoni Zelote, na Yuda mwanage Yakobo. 14Wano wose wakala waigoga na kusanghana na moyo umonga wa kumpula Mulungu; wakala hamonga na waja iwatwanzi na Maria mamo wake Yesu na ndugu zake.
15Siku zija Petro kema hagatigati ya ndugu waja (wetinghanile wavika miya na ishirini) kalonga, 16“Walume ndugu zangu, Jandiko jandakana divikizwe, Loho Yangʼalile viyalongile umwaka mmulomo wa Daudi, kwa kiloto cha Yuda yawalongoze waja wamgogile Yesu. 17Kilumbo kakala yapetigwe hamwe na tweye, kabili uno utumigwa wetu na heyo kakala mumo.”
18Ino kagula mgunda kwa kitumetume cha ubananzi; kagwa kingubanguba, katulika ditupe hagatigati, na mitumbo yake ilawa kunze. 19Vitangika na wenekaye wose Yerusalemu, waukema umgunda uja kwa ulonzi wao Akeldama, kihindukizo chake Mgunda wa Mulopa.
20“Mkitabu cha Ndenghelelo yandikigwa,
Hanhu hake hawe vihame,
sikuyoneke munhu yonda yakale himo; kabili
Wimilizi wake na ugwelelwe munhu iyagwe.
21Avo wabaha wayetu wakalile hamonga na tweye mazuwa gose, Mndewa Yesu viyengile kumwetu na viyalawile. 22Kusongela baho viyasingulwe na Yohana, kuvikila siku dija viyakwenezwe kulawa kumwetu; vinoga imonga wao yawe msindi wa kuzuka kwake hamonga na tweye.”
23Wawatindimika wabili, Yosefu yokemigwa Barsaba mwene ditwaga jaikabili Yusto, na Matia. 24Imala wampula Mulungu walonga, Gweye Mndewa utangile imiyoyo ya wanhu wose, tulagile imonga yusagule kulawa kwa wano wabili! 25Yaubokele uno utumigwa na usenga, yakagoge hanhu hayalawile Yuda yacholile hanhu hake yaiyeka. 26Watenda kibafuti, na kija kibafuti kimgwila Matia; avo kapetigwa hamonga na waja watumigwa Mulongo umwe na Yumwe.
Currently Selected:
Sanghano 1: ZAM75
Highlight
Share
Copy
Want to have your highlights saved across all your devices? Sign up or sign in
New Testament in Zaramo © United Bible Societies, 1975.
