Yohana 21
21
Wanahina wavuwa somba mwibahali ya Tiberia; Yesu viyammoteze Petro chusa
1Imala baho Yesu kailaviliza kabili kwa wanahina wake, hana ibahali ya Tiberia, na heyo kailaviliza vino. 2Simoni Petro na Tomaso yokemigwa Ubasa, na Natanaeli mwenekaye wa Kana wa Galilea, na wanage Zebedeo na wayagwe wabili wa wanahina wake wakala baho hamonga. 3Simoni Petro kawalongela, “Nochola kuvuwa somba.” Na hewo wamulongela, “Na tweye tochola nagwe.” Wachola basi, wengila mngalawa, komu ikilo kija hawapatile kinhu. 4Viivikile imitondo vuuchele, Yesu kema haingehema, bali wanahina hawamtangile kamba iyo Yesu. 5Yesu kawalongela, “Mowana, munacho kilumililo?” Wamwidika, “Aka.” 6Kawalongela, “Lugeleni lwavu umwambu wa ukulume wa ingalawa, na mweye mokwenela!” Walugela; avo hawadahile kulukwega kilumbo cha ubwando wa iwasomba. 7Mwanahina ija Yesu iyamnogele kamulongela Petro, “Yuyo Mndewa!” Na heyo Simoni Petro viyahulike kamba iyo Mndewa, yomana kuvala nguwo yake, kilumbo kakala ukulunge, kaibwanha mbahali. 8Na waja wanahina wayagwe weza muna ingalawa, kilumbo hawakalile kutali na iisi inyalile, hopata migulu miya mibili, kuno wobulula luja ulwavu luna iwasomba. 9Vuwahumuluke hali ingehema, wawona moto wa mingheya, na hachana hekigwa somba na mgate. 10Yesu kawalongela, “Galeni hano ikibugulu cha iwasomba wamvuwile!” 11Simoni Petro kengila mngalawa, kalukwega ulwavu mulufuko, lumema misomba mikulu muzo umwe na milongo mitano na wadatu; hambwe wakala bwando kamba hiwo, ulwavu haludegeke. 12Yesu kawalongela, “Izoni kusamhusa imilomo!” Na muna iwanahina haduhu yagesile kumuuza, “Uli nani gweye?” wavimanya kumbe yuyo Mndewa. 13Keza Yesu kausola mgate kawengha, na iwasomba vivija.
14Hiwo uwo mwanza wekadatu wa Yesu konekelwa na wanahina wake, viyamalile ukuzuka kulawa kwa wafile.
Petro kabwezelwa ndagizi ya uchunga
15Vuwamalile ukuja, Yesu kamulongela Simoni Petro, “Che, Simoni wa Yohana, gweye konogela kubanza wano?” Kamwidika, “Wona Mndewa, gweye kuvitanga kamba ni-kunogela.” Kamulongela, “Wenghize wana nghondolo zangu!” 16Kamulongela mwanza wekabili, “Simoni wa Yohana, ko-nogela?” Kamulongela, “Wona Mndewa, gweye kuvimanya kamba nikunogela.” Kamulongela, “Waseseze nghondolo zangu!” 17Kamulongela mwanza wekadatu, “Simoni wa Yohana, konilonda?” Petro kanyunguwala kilumbo viyamulongele lwekadatu, “konogela?” kamulongela, “Mndewa, gweye kugatanga gose, na kugatambula kamba nikunogela.” Yesu kamulongela, “Wadime nghondolo wangu! 18Ihoko ihoko nokulongela, kipigiti chuukalile msongolo, kukala ufunganya mwenyego, uchola kuulonda; komu vonda uwe mvyele, koigolosa imikono yako, na iyagwe kokudaza na kukugala hanhu huhalondile.” 19Kadilonga longa hijo kwa kulagila kamba kifo gani chonda yamtunile Mulungu. Yomala kamulongela, “Ngholeleza!”
Yohana kokuwa na ndagizi yake kubanza Petro
20Petro kahinduka kamona yuja imwanahina yanogelwe na Yesu yomkoleleza, aija yaibandame haimhambaga yake, aluja luwadile mandiya ga ikilo; iyo yuja yalongile, “Mndewa yalihi yonda yakuhimbile?” 21Basi Petro kamona hiyo, kamulongela Yesu, “Mndewa, na yuno vilihi?” 22Yesu kamulongela, “Ihawa nolonda yuno yakale hata vondambwele, ikulumbaze? Gweye ngholeleza!” 23Longa hijo ditapakala mgatigati mwa iwandugu kamba, Mwanahina yuja hafa; bali Yesu hamulongele kamba hafa, komu, “Nihalonda yuno yakale hata vondanize ikulumbaze?”
24Avo yuno yuyo imwanahina yagasindile gano na kugandika gano, atweye tuvimanya usindi wake uwo wa ihoko.
25Kuna magweka gayagwe bwando gayasanghane Yesu; na kamba gandikigwe dimwedimwe, nogamba ulumwengu uhapotigwe kwa ubwando wa ivitabu vyandikigwe.
Currently Selected:
Yohana 21: ZAM75
Highlight
Share
Copy
Want to have your highlights saved across all your devices? Sign up or sign in
New Testament in Zaramo © United Bible Societies, 1975.
