Sanghano 2

Siku ya Pentekoste (milongo mitano) Loho kahulumuka

1Vivikile siku da milongo mitano, wose wakala baho hanhu hamonga. 2Mhunde kukala na kidinhilo kilawa kuulanga, kigambile beho da mhiko dibuma nghani na kuimemeza ngʼanda yose iwakalile. 3Walawililwa na milimi ibagulwebagulwe kamba milimi ya moto, iwakalila yumweyumwe. 4Wose wamemezwa Loho Ingʼalile, wandusa kulonga ulonzi uyagwe kamba Loho viyawamotele kufambula.

5Muja Yerusalemu wakala baho Wayuda wene kumtanga Mulungu, walawile nyenza zose hasi ya ulanga. 6Kija kidinhilo vuwakihulike, madale ga wanhu bwando weza wailundiza, wakanganya kilumbo kila munhu kawahulika wolonga ulonzi wake mwenyecho.

7Wasinhuka wose na kukangawala, walonga, “Che, wano wose si Wagalilea? 8Vilize vino tweye kuhulika kila munhu ulonzi wetu utuleligwe nawo? 9Waparti, Wamedi na Waelami, na hiwo wokala Mesopotamia, Uyuda na Kapadokia, Ponto na Asia; 10Frigia na Pamfilia, Misri na nyenza za Libia behi na Kirene, na walilingwa wolawa Roma; tweye Wayuda na tweye Wawinza Inzuma; 11Wakrete na Waarabu towahulika wano kwa ulonzi wetu wolonga masanghano makulu ga Mulungu.” 12Wakangawala wose, nzewele ziwalawa, wauzagiza wawo kwa wawo, “Mbuli ino yogendelela kulihi?” 13Wayagwe waponeza walonga, “Wakoligwa na ugimbi wa sambi.”

Malangulizo gake Petro gawagalula wanhu bwando

14Baho yemile Petro hamonga na waja mulongo umwe na yumwe, kabwata na dizwi jake kawalongela, “Mweye wambigalo wa Kiyuda na mweye mose mkalaga Yerusalemu, dimanyeni gweka dino, mtegeleze malonga gangu! 15Wanhu wano hawakoligwe kamba vumgelegeza mweye, kwa mzoko ino iyo saa ndatu ya imitondo. 16Bali gweka dino dijo dilongigwe mmulomo wa Mtulandagu Yoeli,

17Mulungu kalonga,

Vonda ivike siku ya kikomelezo,

nowakutulila wanhu wose Loho yangu;

wanenu na biti zenu wolagula,

wasongolo wenu wokona vinzonza,

na wavyele wenu wolota nzozi.

18Mazuwa higo nowagelezela watumika wangu wambigalo na watwanzi Loho yangu, na hewo wolagula.

19Na niye nolava vilozo uchana kuulanga na mazingaombwe hasi muna iisi,

yokuwa mulopa na moto na kifuguto cha yosi.

20Zuwa dogaluka ziza,

mwezi ogaluka mulopa, hainavika siku ya Mndewa ija ibanzile, yonda iwe kinaga ubaga.

21Kwiza waja wose wonda waditamanile twaga ja Mndewa, wohona.

22Amweye wambigalo wa Israeli, tegelezeni malonga gano; Yesu wa Nazareti yakalile yatangike kumwenu kamba kalawa kwa Mulungu, aho hayezile kumwenu yotenda magweka, nhuko na vilolomboto, yuyo Mulungu yamwinghile kuvisanghana hameso genu, kamba vumvitangile mweye wenyego. 23Munhu hiyo kalavigwa kamba Mulungu viyagesile na kuvitanga mwaka; amweye mumgadusa mmikono ya wanhu wehile, mumkoma. 24Komu Mulungu kamzusa, kaudohola usungu wa kudanganika, kilumbo havidahike kugogwa nawo. 25Kwa mzoko Daudi katambula kivugulo chake,

Nimona Mndewa habehi hamwangu mazuwa gose,

kilumbo kabaha hamkono wangu wa ukulume,

avo sikunhigisike.

26Giladi moyo wangu unogelwe,

na lulimi lwangu ludenghelele,

kabili lukuli lwangu nalo lokala muna inhamanilo.

27Kwa mzoko huileka loho yangu ikale kuzimu,

wala humulava ija iwako yongʼala, yawone ubananzi.

28Kunilagusila nzila za ugima;

konimemeza ndenghelelo hakihanga chako.

29Wambigalo ndugu zangu, ndekeni nonge hamwenu kinaga ubaga mbuli za Tata wetu mkulu Daudi; kafa, kazikwa, na kabuli jake dabahano kumwetu na dilelo. 30Viyakalile Mtulandagu, kavitanga kamba Mulungu kaiduwila kamba muna uwelesi wa vigudi vyake komwika imonga mkigoda chake cha iyenzi. 31Na heyo mwenyecho kalongola kagona higo, katambula mbuli za kuzuswa kwa Kristo, kilumbo loho yake hailekigwe kuzimu, hebu lukuli lwake haluwene ubananzi. 32Yesu hiyo Mulungu kamzusa, na tweye tose twa wasindi wake. 33Na heyo viyamalile kukwenezwa kavika hamkono wa ukulume wa Mulungu na kubokela kwa Tata kija kilaga cha Loho Yangʼalile, kakigida kinhu kino kimkona vino na kukihulika. 34Kilumbo Daudi hakwelile kuulanga, bali mwenyecho kalonga,

Mndewa kamulongela Mndewa wangu,

kala mwambu wa mkono wangu wa ukulume,

35Kikomu vondaniweke wandumu wako hasi hamigulu yako!

36Avo ngʼanda yose ya Israeli nawavitange nghani kamba Mulungu kamtenda Yesu hiyo yumumkomile yawe Mndewa iyo Kristo.”

Dale da wanahina vuwamtogole Yesu

37Vuwagahulike higo, gawasoma mmiyoyo yao, wamulongela Petro na watumigwa wayage, “Tutendeze, mwa ndugu?”

38Petro kawalongela, “Pepeni mwiyalale, msingulwe yumwe yumwe kwa twaga ja Yesu Kristo, giladi msegezelwe matozo genu, na mweye mobokela mhome ya Loho Yangʼalile. 39Kwa mzoko kilaga kino kiza kwa kilumbo chenu na kwa wanenu na kwa wanhu wose wali mmatali, wonda yawakeme Magana Mulungu wetu wamwizile.”

40Petro kawasindila na malonga gayagwe bwando, kawazuma yolonga, “Muhonyigwe kulawa mlelo uno wene dibamila!” 41Na hewo wadibokela longa jake wabatizwa; na siku dija wongezeka wanhu wavika elfu ndatu.

42Wakala wagogile malangulizo ga watumigwa okwiduganya hamwe, na kwigolela migate na kumpula Mulungu. 43Na wose wengilwa na bwembwe; vinzonza na vilolomboto bwando vitendigwe na watumigwa. 44Na wose wavumile wakala hanhu hamonga, na vinhu vyao vyose vikala msangilo. 45Waguliza mali na vinhu vuwali navyo na kuwagwelela wanhu, kamba yuja munhu choyosulukila. 46Na mazuwa gose wakala hamonga na tindiwalo mngʼanda ya Mulungu, na kwimegela migate ngʼanda hata ngʼanda, na kuja mandiya gao hamonga kwa kudenghelela; 47womtunila Mulungu kwa miyoyo ingʼalile na kunogeza wanhu wose; mazuwa gose Mndewa kajongezela kanisa kwa waja wene kwihulwa.

Currently Selected:

Sanghano 2: ZAM75

Highlight

Copy