MARCOS 10

U ca'ansaj Jesús yo'olal le x p'atbáilo'

(Mt 19.1-12; Lc 16.18)

1Jesuse' j luk Capernaum ca j bin tu lu'umil Judea yéetel ti' le lu'um yaan tu j lakin u ja'il Jordano'. J much'laj tu ca'a téen le máaco'obo' te tu'ux yaan leti'o', ca tu ca'ansajo'ob tu ca'a téen je'el bix suuc ti'e'. 2Tu nadzajuba'ob túun dze'edzec ti' le fariseob tu yicnal Jesuso' tu yo'olal u beetico'ob u lúubul ti' kass. Ca tu káat chi'ito'ob ti' wa tu beel ca u p'at u yatan jun túul íichamtzil. 3Leti' túune' tu núucaj ti'ob: ¿Ba'ax tu tzolbe'en t'antaj Moisés?

4Leti'obe' tu ya'alajo'ob: Moisese' tu cha'aj u dza'abal ti' le atantzilo' u ju'unil p'atbáil, beyo' cu p'a'atal.

5Jesús tu ya'alaj túun ti'ob: Moisese' tu dzaj te'ex le tzolbe'en t'aano' tumen chich a pucsi'ikale'ex. 6Ba'ale' ti' u cáajbale', le ca tu beetaj Ku tuláacal ba'ale', tu beetaj xiib bey xan co'olel. 7Le o'olale', le xiibo' yaan u p'atic u taata yéetel u maamae' u ti'al u nupcubáa yéetel u yatan, 8tu ca'a túulil túun bíin jun p'éelchajco'ob. Bey túuno' ma' ca'a túulo'obi', ba'ale' chéen jun túulilo'ob. 9Le o'olale', mix máac u najmal u jatzic ba'ax nupa'an tumen Ku.

10Le ca j ooco'ob ich naje', u aj canbalo'obe' tu káat chi'itajo'ob ti' tu ca'a téen le ba'alo'oba'. 11Jesuse' tu ya'alaj ti'ob: Le máax cu p'atic u yatan u ti'al u dzo'ocol u beel yéetel u láak co'olele', táan u núup keban. 12Wa le co'olel cu p'atic u yíicham u ti'al u dzo'ocol u beel yéetel u láake', leti' xane' táan u núup keban.

Jesús cu qui'iqui' t'antic mejen paalal

(Mt 19.13-15; Lc 18.15-17)

13J taasa'ab túun tu yicnal Jesús dze'edzec mejen paalalo'ob u ti'al ca u péedzkato'ob; ba'ale' u aj canbalo'obe' jo'op' u keyico'ob le máaxo'ob taasico'obo'. 14Le ca tu yilaj Jesús lela', j kuxinaji' ca tu ya'alaj ti'ob: cha'ex u taal le mejen paalalo'ob tin wicnalo', ma' a wet'ique'ex ti'ob, tumen u Ajawil Kue' u ti'al le máaxo'ob je'el bix leti'obo'. 15Tu jaajil quin wa'alic ti' te'exe', le máax ma' tu kamic u Ajawil Ku je'el bix u ka'amal tumen jun túul chaan pale', ma' bíin ocoqui'.

16Ca tu méekajo'ob, ca tu qui'iqui' t'antajo'ob, táan u dzáic u kab tu yóokolo'ob.

Jun túul ayikal máac cu t'aan yéetel Jesús

(Mt 19.16-30; Lc 18.18-30)

17Le ca jóok u binbal Jesuse', áalcabil taalic jun túul máac, ca j xolaj tu táan ca tu káat chi'itaj ti': Utzil aj ca'anbesaj, ¿ba'ax unaj in beetic u ti'al ca yanac teen le cuxtal mina'an u xuulo'?

18Jesuse' tu ya'alaj ti': ¿Ba'axten ca wa'alic utzen? Chéen yaan jun túulili' máax utz, leti'e' Ku. 19Teche' a wojel le a'almaj t'aano'obo': Ma' núup keban. Ma' a quíimsic wíinic. Ma' a woocol. Ma' a tus. Ma' a beetic kaas ti' mix máac. Tzic a taata yéetel a maama.

20Le máaco' tu núucaj ti': Aj ca'anbesaj, palili'en ca jo'op' in dzo'ocbesic tuláacal lela'. 21Jesuse' tu pactaj yéetel yaacunaj ca tu ya'alaj ti': Jun p'éel ba'al u bin teech: xeen, con tuláacal ba'ax yaan teche' ca a dzáa ti' le óotzilo'obo'; bey túuno' bíin yanac ti' teech ayikalil te j ca'ano'. Cu dzo'ocole', co'oten, ca taalaquech tin paach, quex u tojolt teech a cuxtal.

22Ba'ale' le ca tu yu'ubaj lela', le máaco' jech jelpaj u yich ca j bin yéetel okom óolal, tumen jach ayikal.

23Jesuse' j paacatnaj túun tu bakpache', ca tu ya'alaj ti' u aj canbalo'ob: ¡Jach istiquiaj u yocol le ayikalo'ob tu Ajawil ku! 24Le aj canbalo'obo' ja'ak u yóolo'ob tu yo'olal le u t'aano'oba', ba'ale' Jesuse' tu ya'alaj ti'ob tu ca'a téen: Paalale'ex, ¡Jach istiquiaj u yocol tu ajawil Ku le máaxo'ob u dzaama u yóolo'ob ti' ayikalilo'obo'! 25Asab séeba'an je'el u máan jun túul camello tu jool jun p'éel púudze', ma' ca ococ jun túul ayikal tu ajawil Ku.

26Le ca tu yu'ubajo'ob lela', sen ja'ak u yóolo'ob ca tu káatajo'ob tu baatzilo'ob: Bey túuno'. ¿Máax je'el u páajtal u to'ocole'?

27Ca j pacta'abo'ob tumen Jesuse' ca j a'ala'ab ti'ob: Máaco'obe' ma' tu yutztal u beetico'ob lela', ba'ale' Kue' je'ele'. Tumen mina'an mix ba'al talam u ti'al Ku.

28Pedroe' tu ya'alaj ti' Jesús: Yuumtzil, to'one' dzo'oc c p'atic tuláacal ba'ax yaan to'on, yéetel dzo'oc c taal ta paach.

29Jesuse' tu núucaj ti': Tu jaajil quin wa'alic te'ex, je'el máaxac ca u p'at u yotoch, wa u sucu'uno'ob, wa u quiico'ob, wa u taata, wa u maama, wa u yatan, wa u paalalo'ob, wa u lu'umo'ob tin wo'olale' wa tu yo'olal le u ma'alob péectzilil le tocsajilo', 30yaan u kamic way yóokol le lu'um ti' le kiino'oba' ciento u téenel asab ya'abil: najo'ob, sucu'uno'ob, quiico'ob, maamaob, paalal yéetel lu'umo'ob, quex yéetel ch'a'apachtajilo'ob; yéetel ti' le ca'anil lu'um cu taalo' yaan u kamic cuxtal mina'an u xuul. 31Ba'ale' ya'ab ti' le máaxo'ob táanilbe'eno'ob bejela'a' bíin p'áataco'ob tu dzo'oc; yéetel ya'ab ti' le máaxo'ob pachilcunta'ano'ob bejela'a', yaan u máano'ob táanil.

Jesús cu ya'alic tu ca'a téen yaan u quíimsa'al

(Mt 20.17-19; Lc 18.31-34)

32Ti' yano'ob ti' le bejo' táan u bino'ob Jerusalén, Jesuse' táanil cu bin ti' le u aj canbalo'obo'. Leti'obe' jaka'an u yóolo'ob, táan u bino'ob tu paach yéetel sajaquilil. Bey túuno' Jesuse' tu ca'a t'aanaj le doce aj canbalo'obo', ca jo'op' u ya'alic ti'ob tu ca'a téen ba'ax cu bin úuchul ti'.

33Tu ya'alaj ti'ob: Je'el bix ca wilique'exa', táan c bin Jerusalén, tu'ux cu bin kubbil u Paal Máac tu kab u nojchilo'ob le aj kiino'obo' yéetel ti' u aj ca'anbesajilo'ob le a'almaj t'aano'. Lelo'oba' leti'ob cu bin kubic u ti'al ca quíimsa'ac tumen le táanxel lu'umil máaco'ob. 34Yaan u p'a'astico'ob, u jadzico'ob, u túubico'ob yéetel u quíimsico'ob. Ba'ale' tu yóox p'éel kiine' yaan u ca'a púut cuxtal ichil le quimeno'obo'.

Ba'ax tu káatajo'ob Jacobo yéetel Juan

(Mt 20.20-28)

35Jacobo yéetel Juan, u paalalo'ob Zebedeoe', tu nadzajuba'ob tu yicnal Jesús ca tu ya'alajo'ob ti': Aj ca'anbesaj, c káat ca a beet to'on le utz c bin c káat techa'.

36Leti' túune' tu ya'alaj ti'ob: ¿Ba'ax a káate'ex ca in beete'? 37Tu ya'alajo'ob ti': Tu kiinil a kamic a Ajawile' beet ca culaco'on jun túule' ta x no'oj, u láake' ta x dzíic.

38Jesuse' tu ya'alaj ti'ob: Te'exe' ma' a wojele'ex ba'ax ca káatique'exi'. ¿Cu páajtal wa a wukique'ex le ukul bíin in wuko', yéetel a kamique'ex le ocja' bíin in kamo'?

39Leti'obe' tu núucajo'ob: C páajtal. Jesuse' tu ya'alaj ti'ob: Tu jaajile' yaan a wukique'ex le ukul bíin in wuko', y éetel yaan a kamique'ex le ocja' bíin in kamo'. 40Ba'ale' le a cutale'ex tin x no'oj wa tin x dzíico', tene' ma' tu yutztal in dzáic, ba'ale' bíin dza'abac ti' máaxo'ob nu'uc ta'an u dza'abalo'.

41Le u láak diez aj canbalo'obo', le ca tu yu'ubajo'ob lela', j kuuxilnajo'ob ti' Jacobo' yéetel Juan. 42Ba'ale' j t'a'ano'ob tumen Jesús, ca j a'ala'ab ti'ob: Je'el bix a wojlile'exe', le máaxo'ob cu nojba'alcunticuba'ob te j caajo'obo' cu beticuba'ob u yuumil tu yóokolo'ob. Bey xan u nuuctaquil ichilo'obo' cu ye'esico'ob u páajtalil tu yóokolo'ob. 43Ba'ale' ma' bey cu bin úuchul ichile'exi'. Tumen ichile'exe' le máax u káat u nojochcuntubae', unaj u meyajtic le u láako'obo'. 44Le máax ti' ichile'ex u káat u tanilcuntubae', unaj u palitzilta'al tumen tuláacal. 45Tumen tac u Paal Máaque' ma' j taal u ti'al ca meyajta'aqui', ba'ale' u ti'al meyaj yéetel u ti'al u dzáa u cuxtal bey jun p'éel bo'ol u ti'al tocsajil ti' ya'abcach máaco'obe'.

Jesús cu dzáic u sáasilil yich Bartimeo

(Mt 20.20-28)

46J kucho'ob tac Jericó. Táan ca'ach u jóokol Jesús ti' le caaj yéetel u aj canbalo'ob yéetel xan ya'abcach máaco'ob. Culucbal tu tzéel le bejo' jun túul ch'óop, Bartimeo u kaaba', u paal Timeo, táan u káat yaatzil. 47Le ca tu yu'ubaj táan u náadzal Jesús Nazaretile', le ch'óopo' jo'op' u yawat: Jesús, u Paal David, ch'a'aten óotzilil.

48J ke'ekeya'ab tumen ya'abcach máaco'ob u ti'al ca u mac u chi', ba'ale' leti'e' láili' j awatnaj jach ka'ame': U Paal David, ch'a'aten óotzilil.

49Je'el túun Jesuse' ca tu ya'alaj: T'ane'ex. Ca j t'a'an le ch'óopo' ca tu ya'alajo'ob ti': Yanac a wóol, líiken, tumen táan u t'anquech.

50Leti' túune' tu píicch'intaj u teep'e' ca j síit'naje', ca tu nadzajubáa tu yicnal Jesús. 51Jesuse' tu káat chi'itaj ti': ¿Ba'ax a káat ca in beet ti' teech? Le ch'óopo' ca tu núucaj ti': Aj ca'anbesaj, in káat paacat. 52Jesuse' tu ya'alaj ti': Cu páajtal a bin. Dzo'oc a wutztal, tumen ocsaj óolnajech. Ti' le jun súutuco' le ch'óopo' j páatji u paacat ca bin tu paach Jesús ti' le bejo'.

Currently Selected:

MARCOS 10: MAYADC

Highlight

Copy