MARCOS 11

Jesús cu yocol Jeruslén

(Mt 21.1-11; Lc 19.28-40; Jn 12.12-19)

1Le ca j náadzo'ob Jerusalén, tu paach u caajilo'ob Betfagé yéetel Betania, actáan ti' u pu'uquil Olivo'obe', Jesuse' tu túuxtaj ca'a túul ti' u aj canbalo'ob, 2táan u ya'alic ti'ob: Xeene'ex ti' le chan caaj yaan actáano'; le quéen kuchuque'exe', yaan a wilique'ex jun túul burro kaxa'an, ma' nat'a'an jun puli' tumen mix máaqui'. Wach'e'ex ca taase'ex teen. 3Wa máax cu káatic te'ex ba'axten ca beetique'exe', a'ale'ex ti'e': kabéet ti' Yuumtzil, cu dzo'ocole' sutic.

4Leti'obe' j bino'ob, ca tu yilajo'ob le burro kaxa'an naadz ti' jun p'éel jool naj, táancab tu jáal le bejo', ca tu wach'o'ob. 5Dze'edzec ti' le máaxo'ob yano'ob te'elo' tu ya'alajo'ob ti'ob: ¿Ba'ax ca beetique'ex? ¿Ba'axten ca wach'ique'ex le burroo'?

6Leti'ob túune' tu núucajo'ob je'el bix a'alabic ti'ob tumen Jesuse' ca j cha'ab u bino'ob. 7Cu dzo'ocole' tu bisajo'ob le burroo', ca j na'at' tumen Jesús. 8Ya'ab tu jayaj u nooko'ob yóokol le bejo', u láako'obe' tu ch'acajo'ob u kab che'ob ca tu dzajo'ob tu yóokol le bejo'. 9Le máaxo'ob cu bino'ob táanil yéetel le máaxo'ob cu taalo'ob paachile', jo'op' u ka'am a'alico'ob: ¡Hosanna! ¡Qui'iqui' t'anta'ac máax cu taal tu kaaba' Yuumtzil! 10¡Qui'iqui' t'anta'ac le ajawil cu taalo', u ajawil c taata David! ¡Hosanna ti' Junab Ku!

11Bey túuno' Jesuse' j ooc Jerusalén, bey xan ti' le kulnajo'. Cu dzo'ocol u pactic le ba'alo'ob tuláacal tu'uxo', j bin Betania yéetel le aj canbalo'obo', tumen táan u yéeksame'ental.

Jesús cu kaakas t'antic jun cúul higo mina'an yich

(Mt 21.18-19)

12Tu jeel kiin, le ca jóoko'ob Betaniae', j wi'ijchaj Jesús. 13Náach yaan ca tu yilaj jun cúul higo yaan u le', ca j bin u yila'a wa yaan u yich, ba'ale' ma' tu caxtaj mixba'ali' chéen le'ob, tumen ma' u kiinil u yichanquili'. 14Jesuse' ca tu ya'alaj ti' le jun cúul higoo': Mix máac bíin u jaant a wich mix bikin. Lela' j u'uya'ab tumen u aj canbalo'ob.

Bix jóoksa'abic le j coonolo'ob ti' ichil kulnajo'

(Mt 21.12-17; Lc 19.45-48; Jn 2.13-22)

15Cu dzo'ocole' j kucho'ob Jerusalén. Le ca j ooc Jesús ti' le kulnajo', j cáaj u tojolch'intic le máaxo'ob cu coonolo'ob yéetel cu máano'ob te'elo'. Tu balkesaj u mesa le cu kex taakino'obo' yéetel u káanche' le máaxo'ob cu conico'ob palomaobo'. 16Ma' tu cha'aj u máan mix máac yéetel u cuuch ti' le kulnajo'.

17Ca tu ca'ansaj ti'ob táan u ya'alic: Ti' le Quili'ich Dzíibo' cu ya'alic Ku: In wotoche' yaan u kaaba'intic u najil payalchi' u ti'al tuláacal caajo'ob, ba'ale' te'exe' dzo'oc a sutique'ex u sajcab j oocolo'ob.

18U nuuctaquil le aj kiino'obo' yéetel u aj ca'anbesajilo'ob le a'almaj t'aano' tu yu'ubajo'ob lela' ca jo'op' u caxtico'ob bix je'el u quíimsico'obe', tumen sajco'ob ti' iquil u yilico'ob tuláacal máac jaka'an u yóol tu yo'olal u ca'ansajo'ob. 19Ba'ale' le ca j áakabchaje', Jesuse' jóok ti' le caajo'.

Le jun cúul higoo' cu tijil

(Mt 21.20-22)

20Ti' u ja'atzcabil tu jeel kiine', Jesús yéetel u aj canbalo'obe' j máano'ob ca tu yilajo'ob le jun cúul higoe' dzo'oc u tijil tac tu mootz. 21J ka'aj túun ti' Pedroe' ca tu ya'alaj ti' Jesús: Aj ca'anbesaj, ile, le jun cúul higo ta kaakas t'aantaje' dzo'oc u tijil.

22Jesuse' tu núucaj ti': Yanac a wocsaj óolale'ex ti' Ku. 23Tumen tu jaajil quin wa'alic ti' te'ex, je'el máaxac ca u ya'al ti' le witza': Tzelabáa te'ela', pulabáa ka'anab, wa mina'an ca'a p'éel óolal ti' u pucsi'ikale', ba'ale' cu yocsaj óoltic yaan u yúuchul le ba'ax tu ya'alajo', bey túuno' cu yúuchul. 24Le o'olale' quin wa'alic ti' te'ex, je'el ba'axac ca a káate'ex ich payalchi'e', wa ca wocsaj óoltique'ex dzo'oc a kamique'exe', yaan a kamique'ex. 25Payalchi'inaque'exe', wa yaan ba'ax ca yaayaj óoltique'ex tu yo'olal wa máaxe' sa'atse'ex ti', u ti'al ca sa'atsa'ac xan a kebane'ex tumen a Taataex yaan te j ca'ano'. 26Ba'ale' wa ma' ta sa'atsaje'exe', a Taataex yaan te j ca'ano' ma' bíin u sa'ateste'ex a kebane'exi'.

U páajtalil Jesús

(Mt 21.23-27; Lc 20.1-8)

27J suunajo'ob túun Jerusalén. Ca'aliquil táan u máan Jesús te j kulnajo', ca tu nadzajuba'ob tu yicnale' u nuuctaquil le aj kiino'obo', u aj ca'anbesajilo'ob le a'almaj t'aano' yéetel anciano'obo' 28ca tu káat chi'ito'ob ti': ¿Yéetel ba'ax páajtalil ca beetic le ba'alo'oba'? ¿Máax dzáa ti' teech páajtalil u ti'al a beetico'ob?

29Jesuse' tu núucaj ti'ob: Bey xan teen bin in ca'aj in káat chi'ite'ex jun p'éel ba'al; wa ca núuquique'ex tene', quin wa'alic ti' te'ex xan yéetel ba'ax páajtalil quin beetic le ba'alo'oba'. 30¿Máax túuxt Juan u ti'al u dzáa ocja'? ¿Ku wa chéen wíinico'ob? núuque'ex ti' teen.

31Jo'op' túun u ba'atel t'aano'ob tu baatzilo'ob, táan u ya'alico'ob: Wa c a'alic Ku túuxte, yaan u núuquic ti' to'on: ¿Ba'axten túun ma' ta wocsaj óolte'exi'? 32¿Unaj wa túun c a'alic chéen máaco'ob j túuxte? Ba'ale' sajaco'ob ti' le máaco'obo', tumen tuláacalo'ob u yocsaj óoltmajo'ob tu jaajil Juane' t'aanaj tu yo'olal Ku. 33Bey túuno' tu ya'alajo'ob ti' Jesús: Ma' c ojeli'. Jesuse' ca tu ya'alaj ti'ob: Mix xan teen quin wa'alic te'ex yéetel ba'ax páajtalil quin beetic le ba'alo'oba'.

Currently Selected:

MARCOS 11: MAYADC

Highlight

Copy