Hechos 5

U keban Ananías yéetel Safira

1Ba'ale' jun túul máac Ananías u kaaba'e' yéetel Safira u yatane', tu conajo'ob jun p'éel lu'um. 2Le máaca' j p'áat yéetel dze'edzec u tojol le lu'umo' ca tu bisaj u yalab ti' le apóstolo'obo'. U yatane' u yojel xan lela'. 3Pedroe' tu ya'alaj túun ti': Ananías ¿ba'axten j chu'up a pucsi'ikal tumen Satanás ca tu beetaj a tusic Quili'ich Pixan u ti'al ca p'áatac teech dze'edzec le taakin bo'ota'ab teech tu yo'olal le lu'umo'? 4¿Ma' wa a ti'al le lu'umo'? cu dzo'ocol a conique' ¿ma' waa ti'al u taakinili'? ¿Ba'axten ta tucultaj a beetic lela'? Ku ta tusaj, ma' wíinico'obi'.

5Ananíase' le ca tu yu'ubaj lela' j lúub quimen. Tuláacal le máaxo'ob kuch u yojéelto'ob lela', jach sajacchajo'ob. 6Ca j taal dze'edzec táanquelem xi'ipalalo'obe', tu to'ajo'ob le wíinclilo' ca tu bisajo'ob u muco'ob.

7Cu dzo'ocol u máan óox p'éel orae' ca j ooc u yatan Ananías, ba'ale' ma' tu yojéeltaj ba'ax dzo'oc u yúuchuli'. 8Pedroe' tu káat chi'itaj ti': A'al teen, ¿ta conaje'ex le lu'um ti' le tojol ta wa'alaje'exo'? Leti'e' tu núucaj: beyo', bey t conajilo'.

9Pedroe' tu ya'alaj ti': ¿Ba'axten queetchaj a tuucule'ex u ti'al a túuntique'ex u yóol u Quili'ich Pixan Yuutzil? Je'el yano'ob táancab le máaxo'ob tu biso'ob u muco'ob a wíichamo'; beoraa' binuca'ajo'ob u bisecho'ob u muquecho'ob tac teech.

10Ti' le súutuco' j lúub quimen Safira tu ni' u yooc Pedro. Le ca j ooc le táanquelem xi'ipalalo'obo' tu yilajilo'ob quimen, tu jóokesajo'obe' ca tu muco'ob tu tzéel u yíicham. 11Tuláacal u máaquilo'ob le iglesiao', yéetel tuláacal le máaxo'ob tu yojéeltajo'ob le ba'alo'oba' jach sajacchajo'ob.

Ya'ab jakbe'en ba'alo'ob yéetel chíiculalo'ob

12Le apóstolo'obo' tu beetajo'ob ya'abcach chíiculalo'ob yéetel jakbe'en ba'alo'ob ichil le máaco'obo'. Láaj much'lajo'ob yéetel jun p'éelili' tuucul tu jool caajil Salomón. 13Mix jun túul ti' le u láak máaco'ob tu yóoltaj u much'ubáa yéetelo'obi', ba'ale' jach utzil t'aanajico'ob le máaco'obo'. 14Ya'ab máaxo'ob tu yocsaj óoltajo'ob Yuumtzil, ichilo'obe' yaan xiibo'ob bey xan co'olelo'ob. 15Tac le máaxo'ob koja'ano'obo' cu jóokesa'alo'ob tu yóokol le bejo'obo' cu dza'abalo'ob ti' kóoch che'ob yéetel ti' póopo'ob, u ti'al beyo' le quéen máanac Pedroe' quex chéen u yoochel ca máanac yóokol wa máacal máac ti'obi'. 16Bey xan ya'abcach ti' u cajnáalilo'ob le caajo'ob naadztaco'obo' j taalo'ob Jerusalén, táan u taasico'ob u j kooja'ano'ob yéetel le máaxo'ob cu beeta'al u mukyajo'ob tumen kaakas pixano'obo'; tuláacalo'ob j dza'ab u toj óolalo'ob.

Pedro yéetel Juane' cu ch'a'apachta'alo'ob

17U noojoch le j kiino'ob yéetel tuláacal u tzaypacho'ob le saduseob yano'ob tu yicnalo', j chu'upo'ob yéetel loolob tuucul, 18ca tu mach u biso'ob le apóstolo'obo' ca tu kalajo'ob ti' u najil chúumuc caaj. 19Ba'ale' jun túul u ángel Yuumtzile' tu je'ekabtaj u jool najilo'ob le naj yéetel áakabe' ca tu jóokeso'ob, táan u ya'alic ti'ob:

20Xeene'ex, wa'alene'ex kulnaj ca a tzicbalte'ex ti' le máaco'obo' tuláacal u t'aanilo'ob le túumben cuxtala'.

21Le ca tu yu'ubajo'ob lela', jach u ti'al u sáastal tu jeel kiine' j bino'ob kulnaj ca jo'op' u ca'ansajo'ob. Ca'aliquile' u noojoch le j kiino'obo' yéetel le máaxo'ob yano'ob tu yéetelo' tu much'quintajo'ob u nuuquilo'ob le caajo', lelo'oba' tuláacal u ancianoilo'ob u caajil Israel, ca tu túuxtajo'ob ch'a'abil le apóstolo'obo' te j naj tu'ux kala'ano'obo'. 22Ba'ale' le ca j kuch le j canan máaco'ob te j najo' mix máac tu yilajo'obi' ca j suunajo'ob yéetel u péectzilil, 23táan u ya'alico'ob: T ilaj le naj tu'ux dza'ano'obo' jach ma'alob kala'anil, le aj ba'atelo'ob xano' ti' yano'ob tu jool le kalab najo' táan u canantico'ob ma'alob; ba'ale' le ca t je'aje', mix máac t ilaj ichil. 24U noojoch le máaxo'ob cu canantico'ob le kulnaj', yéetel u nuuctaquil le j kiino'obo', le ca tu yu'ubajo'ob lela', jo'op' u tucultico'ob tac tu'ux cun kuchul tuláacal le ba'alo'oba'. 25Ti' le súutuco' j kuch jun túul máaque' ca tu ya'alaj ti'ob: Le máaco'ob ta kale'exo', ti' yano'ob kulnaje' táan u ca'ansico'ob le caajo'.

26U noojoch le j canano'obo' bin tu yéetel le j canano'obo' ca tu taasajo'ob le apóstolo'obo', ba'ale' x ma' mukulmuukili', tumen sajac u muluchtuunta'alo'ob tumen le máaco'obo'. 27Le ca j taasa'abo'obe' j dzaabo'ob tu táan u nuuctaquil le caajo'. U noojoch le j kiino'obo' tu ya'alajo'ob túun ti'ob: 28To'one' jach tu jaajil t a'alaj ti' te'ex ma' a ca'ansaje'ex ti'le kaaba'o'. ¿Ba'ax túun dzo'oc a beetique'ex? Dzo'oc a chupque'ex Jerusalén yéetel a ca'ansaje'ex, a káat a dza'ex xan t óokol u ki'ikel le máaco'.

29Pedro yéetel u láak apóstolo'obo' tu núucajo'ob: Unaj c u'uyic u t'aan Ku, ma' u t'aan máaco'obi'. 30U Ku le c úuchben láako'obo' tu ca'a púut cuxquintaj Jesús, máax ta quiimsaje'ex le ca ta sinaje'ex te j cruzo'. 31Kue' dzo'oc u dzáic ca'anal, tu x no'oj kab, u ti'al ca u beet u j nojochil yéetel j tocsajil, u ti'al u dzáic ti' u caajil Israele' kex tuucul yéetel sa'atsaj si'ipil. 32To'one' u jaajcunajo'on ti' lela', bey xan le Quili'ich Pixano', máax dza'an tumen Yuum Ku ti' tuláacal le máaxo'ob cu yu'ubico'ob u t'aano'.

33U nuuctaquil le caajo', le ca tu yu'ubajo'ob lela', j kuuxilnajo'ob ca tu yóoltajo'ob u quiimso'ob. 34Ba'ale' ti' yaan ichilo'obe' jun túul fariseo u kaaba'e' Gamaliel, lela' jun túul u ca'anbesajil le a'almaj t'aano', máax jach tzica'an tumen le máaco'obo'. Wa'alaje', ca tu ya'alaj, ca jóokesa'aco'ob táancab jun súutuc le apóstolo'obo'.

35Cu dzo'ocole' tu ya'alaj ti'ob: U cajnáalile'ex Israel, tuculte'ex ma'alob ba'ax can a beete'ex yéetel le máaco'oba'. 36Ka'ajac te'exe' ti' le kiino'ob dzo'oc u máano'obo' j líik Teudas táan u ya'alicubáa nojoch máac, tu paache' j bino'ob míin cuatrocientos wíinico'ob. Ba'ale' j quiimsabe' ca láaj ki'itpaj tuláacal le máaxo'ob j tzaypachto' ca j xu'ul tuláacal. 37Cu dzo'ocole' tu kiinilo'ob ca j beeta'ab le censo', j líik Judas le j Galileaile', ca j bin ya'ab máaco'ob xan tu paach; j quiimsa'ab xane' ca láaj ki'itpaj le máaco'ob j tzaypachto'. 38Le o'olale', p'ate'ex le máaco'oba', ma' a wocsicaba'ex tu yéetelo'ob, tumen le ba'ala' wa ti' máaco'ob u taale' yaan u xu'ulul; 39ba'ale' wa ti' Ku u taale' ma' tu páajtal a xu'ulsique'ex. Canantaba'ex bic úuchuc wa táan a ba'atele'ex tu contra Ku.

40Tuláacalo'ob tu chíinpooltajo'ob lela'. T'a'an túun le apóstolo'obo' ja'ajadza'abo'obe' ca j a'ala'ab ti'ob ma' u suuto'ob t'aan tu kaaba' Jesús, cu dzo'ocole' ca jáalkabta'abo'ob. 41Le apóstolo'obo' jach qui'imac u yóolo'ob úuchic u lukulo'ob tu táan le jalach wíinico'obo' tumen Kue' tu yóoltaj ca u mukyajto'ob sublaquil tu kaaba' Jesús. 42Ma' jáaw u ca'ansico'ob yéetel u tze'ectico'ob u kaaba' Jesucristoi', sáamsamal te j kulnaj bey xan te j najo'obo'.

Currently Selected:

Hechos 5: MAYADC

Highlight

Copy