Hechos 6

Cu yéeya'al le siete diacono'ob

1Ti' le kiino'obo', tu yo'olal táan u ya'abtal le j canbalo'obo', le máaxo'ob griego u t'aano'obo', jo'op' u kuuxilo'ob ti' le máaxo'ob hebreo u t'aano'obo', tumen táan u ya'alico'obe' u x quimen íicha'amo'obe' ma' tu táan óolta'alo'ob ma'alob le quéen t'o'oxoc le ba'ax kabéet sáamsamalo'. 2Le doce apóstolo'ob túuno' tu much'quintajo'ob tuláacal le j canbalo'obo' ca tu ya'alajo'ob ti'ob:

Ma' utz ca c p'at u ma'alob péectzil Kui' u ti'al c táan óoltic le mayac che'obo'. 3Sucu'une'ex, le o'olale' caxante'ex siete j xiibo'ob ichile'exe', máaco'ob cu yúuchul t'aan ma'alo'ob tu yo'olalo'ob, yaan u na'ato'ob yéetel chuup u cuxtalo'ob yéetel Quili'ih Pixan, u ti'al ca c kubent ti'ob le meyaja'. 4To'on túune; c kubicbáa u ti'al c payalchi' yéetel u ti'al c ca'ansic u ma'alo'ob péectzil Ku.

5Tuláacalo'ob tu yutzil éejemto'ob le ba'ax a'alabo', ca tu yéeyajo'ob Esteban jun túul j xiib chuup u pucsi'ikal yéetel ocsaj óolal bey xan yéetel Quili'ich Pixan; tu yéeyajo'ob xan Felipe, Prócoro, Nicanor, Timón, Parmenas yéetel Nicolás jun túul antioquíal máax u kamaj ca'ach u yocsaj óolal le Judíobo'. 6Cu dzo'ocole' tu taasajo'ob tac tu'ux yaan le apóstolo'obo', lelo'oba' j payalchi'inajo'obe' ca tu dzaj u kabo'ob tu yóokolo'ob. 7U ma'alob péectzil Kue' táan u t'i'it'pajal, yéetel u múuch'ul j canbalo'obo' táan u jach ya'abtal Jerusalén, ya'ab xan ti' le jkiino'ob judíob tu kamajo'ob le ocsaj óolalo'.

Estebane' cu ma'achal u ti'al j bisbil

8Estebane' jun túul máac chuup yéetel páajtalil beyxan yéetel u yutzil Kue', táan u beetic jakbe'en ba'alo'ob yéetel chíiculalo'ob ichil le máaco'obo'. 9Dze'edzec túun ti' le máaxo'ob yano'ob ti' le Sinagoga cu kaaba'inta'al palitzilo'ob jáalkabo'ob, bey xan dze'edzec Cireneilo'ob, Alejandriáilo'ob, Ciliciailo'ob yéetel Asiailo'obe' jo'op' u ba'atel t'aano'ob yéetel Esteban. 10Ba'ale' ma' páatji u mixba'alcuntico'ob u t'aani', tumen táan u t'aan yéetel le na'at cu dza'abal ti' tumen Quili'ich Pixan. 11Bey túuno' tu bo'otajo'ob dze'edzec máaco'obe' u ti'al ca u ya'alo'obe' dzo'oc u yu'ubico'ob u ya'alic Esteban kaakas t'aano'ob tu contra Moisés yéetel tu contra Ku. 12Bey túuno' tu p'u'usajo'ob le máaco'obo', bey xan le anciano'ob yéetel u ca'anbesajilo'ob le a'almaj t'aano'; ca j téec taalo'obe' ca tu machajo'ob Estebane', ca tu bisajo'ob tu táan u nuuctaquil le caajo'. 13Tu caxtajo'ob máaco'ob j tuuso'ob u ti'al u ya'alo'ob: Le máaca' ma' tu jáawal u poch'ic le quili'ich kulnaja' bey xan le a'almajt'aano'. 14Dzo'oc c u'uyic u ya'alique' le Jesús Nazaretilo' bin u ca'aj u jen le kulnaja' yéetel bin u ca'aj u kex le ba'alo'ob suuc c beetico' je'el bix u ya'almaj to'on Moiseso'.

15Le jalach wíinico'ob túuno' yéetel tuláacal le máaxo'ob culucbalo'ob te'elo', le ca tu pactajo'ob Estebane', tu yilajo'ob u táan iche' bey jun túul angele'.

Currently Selected:

Hechos 6: MAYADC

Highlight

Copy