Hechos 4

Pedro yéetel Juan tu táan le jalach wíinico'obo'

1Ca'alilquil Pedro yéetel Juan táan u t'aano'ob yéetel le máaco'obo' j taalo'ob le kiino'obo' yéetel u noojoch máaxo'ob canantic le kulnaj yéetel xan le saduceobo'. 2Táan u kuuxilo'ob tumen Pedro yéetel Juane' táan u ca'ansico'ob le máaco'obo', táan xan u ya'alico'obe' le ca'a púut cuxtalo' dzo'oc u jaajcunta'al yéetel u ca'a púut cuxtal Jesús. 3Ca tu machajo'ob Pedro yéetel Juane' ca tu bisajo'ob u kalo'ob tac tu jeel kiin, tumen ta'itac u bin kiin. 4Ba'ale' ya'abo'ob ti' le máaxo'ob tu yu'ubajo'ob le ma'alob péectzilo' ocsaj óolnajo'ob; le máaxo'ob ocsaj óolnajo'obo', wa cu xo'ocol chéen u j xiibilo'obe', yaan míin cinco mil.

5Tu jeel kiine' tu much'juba'ob u nuuctaquilo'ob le judíobo', le anciano'obo' yéetel u j ca'anbesajilo'ob le a'almaj t'aano'. 6Ti' yaan xan Anás, máax u j noojoch le j kiino'obo', Caifás, Juan, Alejandro, yéetel tuláacal u láaktzilo'ob u nuuctaquil le jkiino'obo'. 7Lelo'oba' tu túuxtajo'ob taasbil Pedro yéetel Juane' tu dzajo'ob chúumuque' ca tu káatajo'ob ti'ob: ¿Yéetel ba'ax páajtalil wa tu kaaba' máax ta beetaje'ex lela'?

8Pedro túune' chuup yéetel Quili'ich Pixane', tu ya'alajti'ob: U nuuctaquile'ex le caaja', yéetel u ancianoile'ex Israel: 9bey táan káatique'ex ti' to'on tu yo'olal jun p'éel utz beeta'ab ti' jun túul máac koja'an, u ti'al a wojéeltique'ex bix úuchic u yantal u toj óolale'. 10Ojéelte'ex tumen tuláacale'ex yéetel ojéelta'ac tumen tuláacal u cajnáalilo'ob Israele', le máac yaan ta táane'exa' yaan tojóolal tu yo'olal u kaaba' Jesucristo nazaretil, le máax ta sinaje'ex ti' cruz yéetel máax ca'a púut cuxquinta'ab tumen Ku. 11Le Jesusa' leti' le tuunich, te'ex j pakbale'ex tap'ectaje'exo', ba'ale' j kuch u beet u noj tuunichil le chuun pako'. 12Mina'an u láak máac cu dzáic tocsajil; tumen ma' dza'an ti' máaco'ob u láak kaaba' way yóokolcaabe', u ti'al ca páatac u yantal to'on tocsajil.

13Le jalach wíinico'obo', le ca tu yilajo'ob le kub óolal iquil u t'aano'ob Pedro yéetel Juane', ja'ak u yóolo'ob tumen kajóolta'abo'ob ma' xoocnaja'ano'obi' bey xan chéen ichil meyajil máaco'ob u taalo'ob. Tu yojéeltajo'ob túune' leti'obe' j máano'ob yéetel Jesús. 14Le máac xan dzaab u toj óolalo' wa'alcbal tu yicnal Pedro yéetel Juan te'elo', le o'olale' ma' tu páajtal u mix ba'alcunta'al u t'aano'ob.

15A'ala'ab ti'ob ca jóokoco'ob; le jalach wíinico'ob túuno'j p'áato'ob táan u t'anal t'aano'ob tu baatzilo'ob. 16Ca tu ya'alajo'ob: ¿Ba'ax bíin c beet yéetel le máaco'oba'? Tumen tuláacal le máaxo'ob cajnáalo'ob Jerusaleno' u yojelo'ob dzo'oc u beetico'ob le jakbe'en chíiculala', cu dzo'ocole' ma' tu páajtal c mixba'alcuntic. 17Ba'ale' u ti'al ma' u bin u t'i'it'pajal ichil máaco'ob le ba'ala', co'ox ja'asic u yóolo'ob, u ti'al ma' u suut u tzicbalto'ob u kaaba' Jesús ti' mix máac.

18J ta'ano'ob túune' ca j a'ala'ab ti'ob ma' u suuto'ob j t'aan, mix u ca'ansajo'ob jun puli' tu kaaba' Jesús. 19Ba'ale' Pedro yéetel Juane' tu núucajo'ob: Tuculte'ex ba'ax ma'alob tu táan Ku: c u'uyic a t'aane'ex wa c u'uyic u t'aan Yuum Ku. 20Tumen to'one' ma' tu páajtal u jáawal c a'alic le ba'alo'ob c ilmaj yéetel c u'uymajo'.

21Cu dzo'ocol u ke'ekeya'alo'ob u ti'al u ja'asa'al u yóolo'ob tumen le jalach wínico'obo', jáalkabta'abo'ob. Ma' caxta'ab ba'ax o'olal je'el u páajtal u ja'adzalo'obe' tumen tuláacal le máaco'obo' táan u qui'iqui' t'antico'ob Junab Ku tu yo'olal le ba'ax dzo'oc u yúuchulo'. 22Le máac j dza'ab u toj óolal yéetel le chíiculala' maanal cuarenta u ja'abil.

Le j ocsaj óolo'obo' cu káat óoltico'ob kub óolal yéetel xan páajtalil

23Pedro yéetel Juane', cu dzo'ocol jáalkabta'alo'obe', j bino'ob tac tu'ux yaan u yéet j canbalo'obe' ca tu tzicbaltajo'ob tuláacal ba'ax j a'ala'ab ti'ob tumen u nuuctaquil le j kiino'obo' yéetel le anciano'obo'. 24Le ca tu yu'ubajo'obe', túulacalo'ob jun múuch' payalchi'inajo'ob ti' Ku, táan u ya'alico'ob: C Yuumtzil teech leti' le Junab Ku ta beetaj le ca'ano', le lu'uma', le ka'anabo' bey xan tuláacal ba'al. 25Teche', yéetel a Quili'ich Pixane' tu chi' a palitzil Davide' ta wa'alaj:

¿Ba'axten cu wo'och'lantáanbal le caajo'obo',

yéetel chéen cunel ba'alo'ob cu tuclic le máaco'obo'?

26J líiko'ob u ajawilo'ob yóokolcaab, yéetel j much'laj u nuuctaquil le caajo'obo' tu contra Yuumtzil yéetel tu contra u Cristo.

27Tu jaajile' Herodes yéetel Poncio Pilatoe' j much'lajo'ob way caaje' yéetel le táanxel lu'umilo'obo', tu contra Jesús a quili'ich Paal, máax a yéeymaj. 28Yéetel lelo' tu beetajo'ob tuláacal ba'al a tucultmaj yéetel a dzaamaj ca úuchuc. 29Beora', Yuumtzil, il a wil bix u káato'ob u ja'aso'ob c óol, dzáa túun a kub óolal ti' a palitzilo'ob u ti'al ca u tze'ecto'ob a ma'alob péectzil x ma' sajaquil; 30yéetel túun a páajtalile' ca u dza'ob toj óolal ti' le kebano'obo', yéetel ca u beeto'ob chíiculalo'ob yéetel jakbe'en ba'alo'ob tu kaaba' Jesús a quili'ich paal.

31Le ca j dzo'oc u payalchi'obe', le cúuchil tu'ux much'ucbalo'obe' quíilbanaji, ca láaj chu'upo'ob yéetel Quili'ich Pixan, ca tu tze'ecto'ob yéetel kub óolal u ma'alob péectzil Ku.

Tuláacal ba'al u ti'al tuláacal

32Tuláacal le dzo'oc u yocsaj óolo'obo' jun p'éelili' u tuuculo'ob jun p'éelili' xan u pucsi'ikalo'ob. Mix jun túul cu ya'alic wa chéen u ti'al u ba'aluba'ob, ba'ale' tuláacal ba'ax yaan ti'obe' u ti'al tuláacalo'ob. 33Le apóstolo'obo' láili' táan u tze'ectico'ob u ca'apúutcuxtal Yuumtzil Jesús yéetel nojoch páajtalil; tuláacalo'ob túune' táan u sen qui'iqui' t'anta'alo'ob tumen Ku. 34Ichilo'obe' mix máac cu bineltic wa ba'ax ti'; 35tumen tuláacal le yaan u lu'umo'ob wa u yotocho'obo' cu conico'obe' beyo' cu taasico'ob u tojol u ti'al u kubo'ob ti' le apóstolo'obo'; cu dzo'ocole' cu t'o'oxol ichil tuláacal je'el bix káabetil ti'obe'. 36Ichilo'obe' yaan jun túul levitae' u kaaba'e' José, máax sijnal Chipre, máax pa'at u kaaba' Bernabé tumen le apóstolo'obo', lela' u káat u ya'ale' máax cu qui'imaccunsaj óol; 37Le máaca' tu conaj jun p'éel lu'um yaan ti'e', tu taasaj u tojole' ca tu kubaj ti' le apóstolo'obo'.

Currently Selected:

Hechos 4: MAYADC

Highlight

Copy