2 MACABEOS 8
8
Bix úuchic u lik óol Judas Macabeo
1Ti' lelo' Judas Macabeo yéetel u j láakinajo'obe' jo'op' u yocolo'ob ta'acunbáil ti' cajtalilo'ob u t'ano'ob u láako'ob, tu much'quintaj u láak máaco'ob ca'aliquil u yoquesmaj u yóolo'ob ti' judaismo', ca tu chucajo'ob bey seis milo'obe'. 2Tu káat óoltajo'ob ti' Yuumtzil ca u pact le caaj ch'a'apachta'an tumen tuláacal máaco', bey xan ca u ch'a'a óotzilil ti' le kulnaj manba'alcunta'an tumen ma' ocsaj óol wíinico'obo', 3ca u ch'a'a óotzilil ti' le caaj óotzilcuna'an ta'ita'ac u je'enelo', ca u ch'en xiquint le caaj cu káat óoltic p'is óolo', 4ca ka'ajac ti' bix u quíimil mejen paalal mina'an u si'ipilo'ob bey xan u po'och'ol u kaaba', yéetel ca u ye'es u p'ectmaj ba'ax kaas.
5Le ca tu dzajubáa Macabeo tu táan jun múuch' aj ba'atelo'obe', ma' páatchaj u pa'abal u muuk tumen le ma' ocsaj óolo'obo', tumen Yuumtzile' tu kexaj u p'uja'anil yéetel ch'a'a óotzilil. 6Cu téec kuchul ti' caajo'ob yéetel cajtalilo'obe' cu tóocláantic; cu ch'a'ic ma'alob cúuchilo'obe' cu beetic u púudzul ya'ab u aj p'eeco'ob, 7tumen cu pulicubáa tu yóokolo'ob yéetel áakab. U tzicbalil u j xibil máaquile' ojéelta'ab tuláacal tu'ux.
Nicanor yéetel Gorgiase' cu pulicuba'ob u ba'atelto'ob Jerusalén
(1 Mac 2.38-45)
8Le ca tu yilaj Filipo jujun p'íitil u bin ya'abtal u pa'a muuk, bey xan xi'ic u bin u ya'abtal u pa'a muuke', dzíibnaj ti' Tolomeo, u náacomil Celesiria yéetel Fenicia, u ti'al ca talac áantaj ti' u ba'aluba'ob ajaw. 9Tolomeoe', tu séeblaquile' tu yéeyaj Nicanor, u paal Patroclo, tumen leti'e' jun túul u nadza'an éet óol ajaw, ca tu túuxtaj tu táan bey veinte mil aj ba'atelo'ob ti' ya'ab u jejeláasil múuch' caajo'ob, u ti'al ca u xu'ulso'ob le judíobo'. Yéetel leti' tu túuxtaj Gorgias, jun túul náaco'om jach nu'uca'an ti' ba'atelo'ob. 10Nicanore' cu tucultic ca'ach u bo'otic p'aax, le quéen u con le judíob bíin u mache', u p'axmaj ca'ach u páatanil sesenta y seis mil kilos plata ti' le Romanoilo'ob. 11Tu séeblaquil tu túuxtaj páay óoltbil u caajilo'ob jáal ja', u ti'al ca u mano'ob le judíob bíin u mache', tu ya'alaj ti'ob je'el u conic óox túul palitzil tu yo'olal jun p'éel kilo plata, ma' tu tucultaj le jaadz bíin túuxta'ac ti' tumen Yuumtzilo'.
12Judase' tu yojéeltaj táan u náadzal Nicanor, tu ya'alaj ti' u aj ba'atelo'ob naadz yaan le aj p'eeco'. 13Bey túuno' le sajac wíinico'ob yéetel le máaxo'ob ma' u yocsmajo'ob u yóolo'ob ti' u p'is óol Kuo', j bino'ob u ta'acbesuba'ob ti' u láak cúuchil. 14U láako'obe' cu conico'ob ba'axo'ob p'aatal ti'obe', cu káatico'ob ti' Yuumtzil ca to'ococo'ob tu kab le ma' ocsaj óol Nicanor, le máax conmailo'ob ma'ili' úuchuc le ba'atelo'; 15cu káat óoltico'ob ca'ach ti' Ku, wa ma' u káat u beet tu yo'olalo'ob leti'obe', u beet tu yo'olal u nup t'aan u beetmaj ti' u máanja'an ch'i'ibalo'ob, yéetel tu yo'olal le quili'ich nojbe'enil kaaba' yaan ti' leti'obo'.
U yáax pa'a muuk judíob tu yóokol Nicanor
16Macabeoe' tu much'quintaj u aj ba'atelo'ob, seis milo'ob tuláacalo'ob, tu ya'alaj ti'ob ma' u lúubul u yóolo'ob tu táan le aj p'eeco', mix u cóojol sajaquil ti'ob tu táan le ya'ab ma' ocsaj óolo'ob cu pulicuba'ob tu yóokolo'ob quex mina'an u si'ipilo'obo', ba'ale' xiibchajco'ob, 17ka'ajac ti'ob le manba'alcunajil j beeta'ab ichil le kulnaj tumen le ma' ocsaj óolo'obo', le yaayaj óolal yéetel le pooch'ilo'ob j beeta'ab ti' le caajo', tu dzooque' lukesa'ab xan le ba'axo'ob suuc u beeta'alo'ob tumen u máanja'an ch'i'ibalo'obe'. 18Leti'obe', tu ya'alaj: u kubmajo'ob u yóolo'ob ti' u nu'ucul u ba'atelo'ob yéetel ti' u na'ato'ob. To'one', c dzáic c alab óolal ti' Ku u yuumil tuláacal páajtalil, tumen leti'e' chéen yéetel u t'aane' je'el u pa'ic u muuk le máaxo'ob cu taalo'ob t óokolo', bey xan tuláacal u yóokolcaab. 19Tu ka'ajsaj ti'ob bix úuchic u cananta'al u máanja'an ch'i'ibalo'ob, le ba'ax úuch ti' Senaquerib, le ca j quíim ciento ochenta y cinco mil u aj ba'atelo'ob, 20bey xan le ba'ax úuch Babilonia le ca'a úuch ba'atel yéetel galatailo'ob. Ti' le jeedzaco' ocho mil judíob j ba'atelnajo'ob tu tzéel cuatro u aj ba'atelo'ob Macedonia, ca'aliquil le j macedonioilo'ob ma' tu caxtajo'ob ba'ax u beeto'obo', le judíobo' yéetel u yáantaj Kue' tu pa'ajo'ob u muuk ciento veinte mil aj p'eeco'obe' ca tu ch'a'ajo'ob jun p'éel nojoch ayikalil.
21Cu dzo'ocol u dzáic u yóolo'ob yéetel u t'aano'ob, bey xan tu nu'ucbesajo'ob u ti'al j quíimil tu yo'olal u ya'almaj t'aano'ob u caajalo'obe', tu t'oxaj u aj ba'atelo'ob ich can jaatzil. 22Tu táan tu jujun jaatze' tu dzáa jun túul u yíidzini', Simón, José yéetel Jonatán, tu dzaj mil quinientos aj ba'atelo'ob ti' cada jun túul. 23Cu dzo'ocole' tu ya'alaj ti' Azarías ca u xoc le quili'ich dzíib, cu dzo'ocol u ya'alic ti'ob le t'aano'ob je'ela': Ku bíin áantico'on, tu ch'a'aj le yáax jun jaatz aj ba'atelo'obo' ca tu puljubáa tu yóokol Nicanor. 24U Yuumil tuláacal páajtalilo' j ba'atelnaj tu yo'olalo'ob, ca tu quíimsajo'ob máanja'an nueve mil aj p'eeco'ob, tu xe'exet'o'ob yéetel tu loobiltajo'ob máanja'an táancoch ti' u aj ba'atelo'ob Nicanor, ca tu beetaj u láaj púudzulo'ob. 25U láak ba'ale' tu tocajo'ob u taakin le máaxo'ob taalja'ano'ob manico'ob ca'acho'. Cu dzo'ocol u náachtal u ch'a'apachtico'obe' j yanchaj u suuto'ob tumen táan u t'úubul kiin. 26Dzo'oc u náadzal u kiinil je'elel le o'olal tu p'atajo'ob u ch'a'apachtico'ob. 27Cu dzo'ocol u molico'ob u nu'ucul u ba'atel u aj p'eeco'ob pa'ate' yéetel taakine', tu kiinbesajo'ob u kiinil je'elel, ca'aliquil u qui' t'antico'ob yéetel u dzáico'ob nib óolal ti' Yuumtzil tumen cu p'a'atal u cuxtalo'ob tac ti' le kiino', tumen dzo'oc u cáajal u ye'esic u ch'a'a óotzilil ti' leti'ob. 28Cu dzo'ocol u kiinil je'elele', tu t'oxajo'ob le taakino', jun jaatze' tu dzajo'ob ti' le máaxo'ob cu mukyajtico'ob ch'a'apachtajilo', ti' x quimen íichamo'ob, ti' j ma' yuumo'ob, yéetel u yalabe' tu t'oxajo'ob tu baatzilo'ob yéetel ti' u paalalo'ob. 29Cu dzo'ocol u beetico'ob lela', tuláacalo'ob tu much'juba'ob j payalchi' ti' Yuumtzil le máax cu ch'a'a óotzilil, u ti'al ca u káat óolto'ob ti' ca u ca'a bisubáa yéetel tuláacal u palitzilo'ob.
Cu pa'abal u muuk Timoteo yéetel Báaquides
30Ichil ba'atelnajic yéetel u aj ba'atelo'ob Timoteo yéetel Báquidese', tu quíimsajo'ob máanja'an veinte mil wíinico'ob ca tu qui' ch'a'ajo'ob le tuulumilo'ob ca'analtaco'obo'. Cu dzo'ocole' tu t'oxajo'ob u taakinil ichil ca jaatz queet u ya'abilo'ob, jun jaatz u ti'alo'ob leti'obi', yéetel u láak jun jaatze' ichil máaxo'ob cu mukyajtico'ob ch'a'apachtajil, ma' yuumo'ob, x quimen íichamo'ob yéetel nuxibo'ob. 31Tu ma'alob molajo'ob u nu'uculo'ob u ba'atel u aj p'eeco'obe' ca tu ta'acajo'ob ti' ma'alob cúuchilo'ob, u yalabe' tu bisajo'ob Jerusalén. 32Tu quíimsajo'ob u náacom u aj ba'atelo'ob Timoteo, jun túul u asab ma' ocsaj óolil wíinico'ob, tu beetaj u sen mukyaj le judíobo'. 33Ca'aliquil táan u kiinbesico'ob le pa'a muuk tu caajil Jerusaleno', tu tóocajo'ob le máaxo'ob tóoc u jool najilo'ob kulnaj, tu tóocajo'ob xan calístenes, u ta'acbesmajubáa ca'ach ti' jun p'éel pasel; beyo' tu kamaj le jaadz cu najmatic u manba'alcunaj.
Bix púudzic Nicanor
34Nicanor, le ma' pucsi'ikal tu taasaj ca'ach mil man coonolo'ob u ti'al u mano'ob le judíobo', 35j t'o'onanquinta'ab yéetel u yáantaj Yuumtzil tumen le máaxo'ob jach mix ba'al u yilico'ob ca'ache', u pitmaj u jadzutz nook, puudzul yéetel tu juunale', áalcabnaj ti' le káaxo'obo' ca j páatchaj u kuchul tac Antioquía, asab ma'alob binic ti' leti', ma' bey u aj ba'atelo'obi', leti'obe' j xu'ulsa'abo'ob. 36Beyo', le máax tu séeb chi'itaj ti' le Romano'ob u bo'otic páatan yéetel u tojol le máaco'ob jerusalenilo'ob bíin u mach u cone', tu ka'aytaj yaan máax toquic le judíobo', yéetel ma' bin tu páajtal u pa'abal u muuko'ob tu yo'olal cu dzo'ocbesico'ob u ya'almaj t'aano'ob Ku, u aj tocsajo'ob, u dzaamaj ti'obo'.
Currently Selected:
2 MACABEOS 8: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.