2 MACABEOS 3
3
Kue' cu canantic u ayikalilo'ob kulnaj
1Tu kiinilo'ob Onías u noojoch aj kiino'obe', u quili'ich caajil Jerusalene' cu qui' cuxtal ca'ach ich jéedzelil, le a'almaj t'aano'obo' cu dzo'ocbesa'alo'ob ca'ach jach je'el bix unaje', tumen leti'e' jach u kubmaj u yóol ti' Yuum Ku, u p'ectmaj le loobilo'. 2Tac le ajawo'ob ca'ach tziquic le kulnajo', beyo' cu nojochquintico'ob u nojbe'enil kulnaj yéetel u co'ocoj siibalo'ob. 3Tac Seleuco, u ajaw Asiae', cu bo'otic yéetel u páatano'ob u kiinbesajilo'ob le quíimsbil ba'alche'obo'.
4Ba'ale' jun túul wíinic cu kaaba'intic Simón, ti' u taal tu múuch'ul u aj kiinilo'ob Bilgae', leti' máax ilic u meyajta'al kulnaj, leti'e' chi'ichnacchaj tu yéetel Onías u noojoch aj kiino'ob tu yo'olal u yila'al u meyajil u kíiwiquil le caajo'. 5Tumen ma' páatchaj u t'onquintic Oníase', bin j t'aan tu yéetel Apolonio j tarsoil, cu beetic u náacomil Celesiria yéetel Fenicia ti' le kiino'obo', 6ca tu tzicbaltaj ti' yaan nucuch ayikalilo'ob tu kulnajil Jerusalén, u taakinile' mina'an u xooquil, asab ya'ab ti' buca'aj kabéet u ti'al le quíimsbil ba'alche'ob cu ku'ubla'ajalo', bey túuno' le ajawo' je'el u páajtal u ch'a'ic le taakino'. 7Apolonioe' j bin u yil le ajawo' ca tu tzicbaltaj ti' buca'aj u ayikalil le kulnajo'. Ajaw túune' tu ya'alaj ti' Eliodoro, u nojoch aj meyaje', ca xi'ic u ch'a'a le ayikalilo'obo'.
8Eliodoroe' séeba'an binic, tu ya'alaj táan u bin u xíimbalt u caajilo'ob Celesiria yéetel fenicia, ba'ale' u jaajile' leti'e' j bin u beet ba'ax a'ala'ab ti' tumen ajaw. 9Le ca j kuch Jerusalene' j ka'am yéetel qui'imac óol tumen u noojoch aj kiino'ob bey xan tumen le caaj, leti'e' tu tzicbaltaj ti'ob ba'ax a'ala'ab ti' tu yo'olal u ayikalil kulnaj, tu ya'alaj xan ti'ob ba'ax o'olal j taali. Tu káataj túun ti'ob wa jaaj le ba'ax tzicbalta'ab ti'o'. 10U noojoch le aj kiino'obo' tu tzolaj ti'e', le taakin kuba'ano' u ti'al x quimen íichamo'ob yéetel ma' yuumo'ob, 11cu dzo'ocole' jun jaatze' u ti'al Ircano, u paal Tobías, jun túul máac ilic nojoch meyaj. Bey túuno' le ba'ax tu ya'alaj le ma' ocsaj óol Simono' chéen tuuso'ob. Tu tzolaj ti'e' le taakin kuba'ano' cu kuchul u xooquil trece mil docientos kilos plata yéetel seis mil seiscientos kilos oro, 12cu dzo'ocole' ma' tu páajtal beeta'al bey ti' máaxo'ob u yoquesmaj u yóolo'ob ti' jun p'éel quili'ich cúuchil, ma' tu páajtal u manba'alcunta'al, tumen le kulnaj je'elo' tzica'an tumen tuláacal yóokolcaab. 13Ba'ale' Eliodoroe', tu yo'olal a'ala'ab ti' tumen ajaw ca u ch'a'a le taakino', tu sen a'alaj kabéet u bisa'al ichil u ayikalil jalach naj.
14Ti' le kiin tu ya'alaje', ooc ich kulnaj u dzíibte buca'aj le ayikalilo', tuláacal le caaj chi'ichnacchajo'. 15Le aj kiino'obo', u búuquintmaj u nookilo'ob u kultajo'obe', xolocbalo'ob tu táan u multuunil kultaj payalchi' ti' Yuum Ku, u yuumil le taakino'ob líikesa'ano', táan u káat óoltico'ob ti' ca u canant ma' u ch'a'abal u ayikalilo'ob le máaxo'ob u p'atmajo'ob te'elo'. 16U paacat u noojoch le aj kiino'obo' jach chica'an u yila'al u yaj óol tumen máaxo'ob pactic: u sacpile'enil u táan yiche' cu ye'esic buca'aj u chi'ichnaquil u pixan; 17le sajaquil yéetel u péec óol yaan tu pucsi'ikalo' chica'an u yila'al tumen máaxo'ob ilic u muunil u pucsi'ikal. 18Le caajo' cu jóokol u yáalcabo'ob u ti'al payalchi' te j bejo'ob tu yo'olal le kulnaj, ta'itac u manba'alcunta'alo'. 19Le x co'olelo'ob u búuquintmajo'ob u nookilo'ob okom óolalo', u chupmajo'ob le bejo'obo'. Le lo'obayeno'ob suuc u beeta'al u kalicuba'ob tu yotocho'obo', dze'edzec ti' leti'obe' cu bin u yáalcabo'ob tac jool naj, u láako'obe' cu na'acalo'ob yóokol le pako'obo' wa quex cu ch'eenebo'ob ti' calom kiin, 20tuláacalo'ob u líikesmajo'ob u kabo'ob j ca'ane', cu payalchi'ob. 21Cu ch'a'abal óotzilil u yila'al le caajo', xolocbalo'ob yéetel xa'aka'an yanilo'ob, cu dzo'ocole' u noojocho'ob le aj kiino'obo' jaka'an u yóol yéetel sen chi'ichnac.
22Ca'aliquile' táan u sen káat óolta'al ti' Yuumtzil u yuumil tuláacal páajtalil ca u canant ma' u ch'a'abal mix jun p'íit le ayikalilo'ob kuba'ano'ob u ti'al canantbil ti' le kulnajo', 23Eliodoroei' tu nu'ucbesubáa j bin u beet ba'ax u tucultmaj. 24Ba'ale' le ca j kuch leti' yéetel u aj láakinajo'ob tu yicnal tu'ux yaan le ayikalilo', u Yuumtzil pixano'ob bey xan tuláacal páajtalile', tu ye'esajubáa yéetel tuláacal u nojbe'enil, bey túuno' tuláacal le máaxo'ob tu patajuba'ob j ocolo', sajaccunta'abo'ob tumen u páajtalil kue', ca j lúub u muuko'ob yéetel u j xibil máaquilo'ob. 25Tumen chíicpaj ti'ob jun túul tzíimin, jadzutzquinta'an yéetel co'ocoj ba'alo'ob nat'a'an tumen jun túul sajbe'en aj nat' tzíimin, tu líikesaj u maayo'obe', ca tu puljubáa yéetel tuláacal u muuk tu yóokol Eliodoro. U búuc le aj nat' tzíimino' láaj oro u ca'aj. 26Chíicpaj xan ca'a túul j xi'ipalo'ob sen mu'uka'ano'ob bey xan qui'ichquelemtaco'ob, jadzutz u búuco'ob. Wa'alajo'ob tu jujun túulilo'ob tu tzéel Eliodoroe' ca jo'op' u jadzico'ob x ma' je'elelil, tu kolajo'ob Eliodoro. 27Eliodoroe' séeba'an lúubic j lu'um, j p'áat ma' tu paacat jun puli'. Tu séeblaquil líikesa'abe' ca j chicunta'ab ti' jun p'éel táas che'. 28Beyo' Eliodoro le máax ooc láakinta'an tumen tuláacal u aj canano'ob ti' le máacan tu'ux líikesa'an le ayikalilo', yanji u bisa'al cucha'an, ma' tu páajtal u beetic mix ba'al, ca'aliquil táan u ma'alob yilico'ob u páajtalil Ku.
29Bey túuno' tu yo'olal u muuk Kue' le máaco' j p'áat luubul lu'um, toot bey xan mina'an jech quíimilil ti', 30Le judíobo' tu dzajo'ob nib óolal ti' Yuumtzil tumen tu ye'esaj u nojbe'enil ichil u quili'ich naj; bey xan tu kulnaj tu'ux dzo'oc u sen ocol sajaquil yéetel sat óolal ca'acho', behora' chuup tu yéetel qui' óolal bey xan qui'imac óolal tu yo'olal tu ye'esajubáa Yuumtzil u yuumil tuláacal páajtalil.
31U yéet óolo'ob Eliodoroe' j bino'ob áalcabil u káat óolto'ob ti' Onías ca payalchi'inac ti' Ku aj sen ca'anil tu yo'olal u cuxtal Eliodoro, dzo'oc u kuchul ti' u chi' quíimil. 32U noojoch le aj kiino'obo', bey tumen sajac ca tuculta'ac tumen ajaw leti' le judíob j beet loob ti' Eliodoro', tu kubaj jun p'éel quíimsbil ba'alche' tu yo'olal u yutztal. 33Le ca'a j ku'ub tumen le aj kiin u quíimsbil ba'alche'il le kebano', le ca'a túul táanquelem xi'ipalalo'ob u búuquintmajo'ob láili' le nooko'ob yáan ti'ob ca'a yáax chíicpajo'obe', ca'a j chíicpajo'ob ti' Eliodoro, j wa'alajo'ob tu tzéele' ca tu ya'alajo'ob ti': Sen dzáa nib óolal ti' Onías u noojoch aj kiino'ob; tu yo'olal u payalchi'e' cu sa'atsa'al a cuxtal tumen Yuumtzil. 34Bejelae' bey dzo'oc a kamic u jaadz Kuo', ka'ayt ti' tuláacal máac u nojoch páajtalil. Le ca'a j dzo'oc u ya'alico'ob le t'aano'oba', j sa'ato'ob.
35Eliodoroe' tu kubaj jun p'éel quíimsbil ba'alche' bey xan tu beetaj nucuch séeb chi'ob ti' Yuumtzil tumen ma' xot kinta'ab u cuxtali', tu ya'alaj ti' Onías táan u lukul tu yicnale' ca j suunaj tu yéetel u aj ba'atelo'ob tu yicnal ajaw. 36Ti' tuláacal máax cu tzicbaltic ba'ax tu beetaj aj sen ca'anal Yuum Ku, yéetel leti' bine' tu yilaj tu yichil.
37Ajaw túune', tu káat chi'itaj ti' Eliodoro máax je'el u páajtal u ca'a túuxtic Jerusalene', leti'e' tu núucaj ti': 38Wa a tzicbe'enil yaan u aj p'eec wa quex yaan máax taac u toquic a méektáanile', túuxt te'elo', wa ma' j quíime' bin suunac tu yicnal a Tzicbe'enil tzi'itzica'an tu yéetel jaadz, tumen tu jaajile' ti' le cúuchilo' yaan quili'ich páajtalili'. 39Le máax cajnáal te j ca'ano', cu ch'úuctic le cúuchilo' yéetel cu canantic; le máaxo'ob cu bino'ob yéetel kaakas tuuculo', cu ko'okola'alo'ob, cu beetic u quíimilo'ob. 40Lela' leti' u tzicbalil Eliodoro bey xan bix úuchic u cananta'al u ayikalil kulnaj.
Currently Selected:
2 MACABEOS 3: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.