1 MACABEOS 16
16
Cu pa'abal u muuk Centebeo tumen u paalal Simón
1Juane' j luk Gezere' ca j bin u ya'al ti' Simón u taata ba'ax cu beetic Centebeo. 2Simone' tu t'anaj ca'a túul u nuuquil u paalal cu kaaba'intico'ob Judas yéetel Juan, ca tu ya'alaj ti'ob: In sucu'uno'ob tin wéetel bey xan tuláacal u láaktzilo'ob in taatae', j ba'atelnajo'on yéetel u aj p'eeco'ob Israel ca'aliquil táanquelemo'one' tac bejela'e', ya'ab u téenel t beetaj u p'áatal ich jéedzel u lu'umil Israel. 3Tene' dzo'oc in nuxibtal, ba'ale' u ch'a'a óotzilil ca'ane' ti' yaan ta wéetele'ex ca'aliquil táanqueleme'exe'. Yanaque'ex tin cúuchil bey xan tu cúuchil in sucu'un, xeene'ex ba'atel tu yo'olal c múuch' caajo'ob. ¡Áanta'aque'ex tumen Ku!
4Simone' tu yéeyaj ti' le lu'umo', veinte mil aj xíimbal oc ba'atelo'ob yéetel cu nat' tzíimino'obe' ca jóoko'ob u nactáantuba'ob tu yéetel Centebeo. Cu dzo'ocol u máansico'ob áakab Modine', 5j líiko'ob piknal u sáastale' ca j bino'ob ti' le táax koomo'. Te'elo' jóok tu táano'ob jun p'éel nojoch múuch' aj ba'atelo'ob yaan cu xíimbal oco'obi' yaan cu nat' tzíimino'obi'. Jun p'éel nojojch u tóoch'bal ja' jatzic le ca'a múuch' aj ba'atelo'obo'. 6Juan yéetel u aj ba'atelo'obe' tu nu'ucbesajuba'ob tu táan le aj p'eeco'obo'; ba'ale' le ca tu yilaj sajac u aj ba'atelo'ob u ch'acte le tóoch'bal ja'o', Juan máan táanil. Le ca tu yilaj bey u aj ba'atelo'obo' tu ch'actajo'ob xan. 7Bey sen ya'ab u aj nat' tzíimino'ob le aj p'eeco', Juane' tu jóokesaj ca'a tzool ti' u xíimbal oc aj ba'atelo'obe' ca tu dzaj chúumuc le cu nat' tzíimino'obo'. 8Jóopsa'an u paaxilo'ob le ba'atelo', ca j pa'ab u muuk Centebeo yéetel u aj ba'atelo'ob. Ya'ab ti'ob lúubo'ob quimeno'obi', le j p'áato'ob cuxa'ano'obo', j púudzo'ob ca j bino'ob ti' le tuulumo'. 9Ichil le ba'atelo' j loobilta'ab Judas u sucu'un Juan. Juane' tu ch'a'apachtaj le púudzo'obo' ca j kuch tac Cedrón, le cúuchil utzquinta'ab tumen Centebeo. 10Le aj p'eeco'ob' tu ta'acbesajuba'ob xan ti' le tuulumo'ob yano'ob tu káaxil Azoto, ba'ale' Juane' tu tóocaj le caajo'. Ca j quíim bey dos mil aj p'eeco'obe', Juane' j suunaj cuxa'an toj u yóol tac Judea.
Simone' cu tu'usul tu yo'olal u quiimsa'al
11Tolomeo u paal Abud, dzo'oc ca'ach u dza'abal u beet u náacomil u táax koomil Jericó. Yaan ya'ab oro yéetel plata ti', 12tumen leti'e' u ja'an u noojoch aj kiino'ob; 13ba'ale' sen chu'up yéetel saawinal óolal ca tu yóoltaj u ti'alinte le múuch' caaj. Ca tu tucultaj u tusic Simón yéetel u paalal u ti'al ca u quiimso'ob. 14Simone' táan ca'ach u máan u yil bix yanil u caajilo'ob le múuch' caajo'obo' u ti'al u yáantic ti' ba'ax kabéeto'obi', ca j kuch Jericó láakinta'an tumen Matatías yéetel Judas u paalal tu once winal, u winal je'elel, ti' ja'ab ciento sesenta y siete.#16.14 Ciento treinta y cuatro ja'ab u bin u taal Cristo 15U paal Abude' tu kamajo'ob yéetel ca'a p'éel ich ti' le chan tuulum cu kaaba'intic Doc, le u beetmaj leti'o', ca tu dzaj jun p'éel nojoch janal ti'ob. Ba'ale' yaan máaco'ob u ta'acbesmajuba'obi', 16le ca j dzo'oc u sen ukulo'ob Simón yéetel u paalo'obe', Tolomeo yéetel u yéet óolo'obe' tu ch'a'ajo'ob u nu'ucul u ba'atelo'obe' ca j ooco'ob ti' le naj tu'ux cu yúuchul le janalo'. Tu puljuba'ob tu yóokol Simone' ca tu quiimsajo'ob pa'ate' yéetel u ca'a túul paalal yéetel dze'edzec u palitzilo'ob. 17Jun p'éel nojoch quiimsaj wíinic tu beetaj tolomeo u ti'al u bo'otic yéetel kaas le utz.
18Tolomeoe' tu dzíibtaj jun p'éel ju'une' ca tu túuxtaj ti' ajaw, tu'ux cu káatic ca túuxta'ac aj ba'atelo'ob ti' u ti'al áantic bey xan ca ku'ubuc tu kab u méektáanil u caajilo'ob le múuch' caajo'obo'. 19Tu túuxtaj xan tu caajil Gezer u láak j xiibo'ob u ti'al quiimsic Juan. Tu túuxtaj xan ju'uno'ob ti' u náacomil le aj ba'atelo'ob ca yanaco'ob tu yéetel, je'el bin u dzáic oro, plata yéetel u láak siibalo'ob ti'obe'. 20U láak jaatze' tu túuxtajo'ob u ch'a'ob u caajil Jerusalén yéetel u pu'uquil kulnaj. 21Ba'ale' yaan máax bin áalcabil táanil ti'ob tu caajil Gezere, ca tu tzicbaltaj ti' Juan dzo'oc u quiimsa'al u taata yéetel u sucu'uno'ob, bey xan dzo'oc u túuxta'al tumen Tolomeoe', máaxo'ob quiimsic. 22Le ca tu yu'ubaj Juan lelo' j p'áat saatal u yóol, tu machaj le máaxo'ob bin quiimsico' ca tu quiimsajo'ob; tumen tu yojéeltaj bin u ca'aj quiimsbil. 23U yalab u tzicbalil juan tu yo'olal ba'atelo'ob yéetel le nucuch ba'alo'ob tu beetaje', bey xan bix úuchic u jenic pako'ob yéetel u láak ba'alo'obe', 24ti' dzíibta'an tu dzíibilo'ob aj kiino'ob likbal ti' le kiin tu beetjubáa u noojoch aj kiino'ob je'el bix ca'ach u beetic u taatae'.
Currently Selected:
1 MACABEOS 16: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.