1 MACABEOS 15
15
Antíoco Séptimo cu ya'alic ca u ca'a beet Simón u noojoch aj kiino'obe'
1Antíoco u paal Demetrioe', likbal yanil tu jáal ja'e', tu túuxtaj jun p'éel ju'un ti' Simón, u noojoch aj kiino'ob yéetel u méektáan judíob bey xan tuláacal múuch' caajilo'ob. 2Le ju'uno' cu ya'alic beya':
Ajaw Antíocoe', cu te'escuntic Simón u noojoch aj kiino'ob yéetel xan u méektáan u múuch' caajil Judea. 3Kaakas máaco'ob dzo'oc u ch'a'ico'ob u méektáanil in máanja'an ch'i'ibalo'ob, ba'ale' tene' chuca'an in wóol in ca'a ti'alintic, u ti'al ca in wuztquint je'el bix yanil ca'ache'. U ti'al in beetic lelo' dzo'oc in nu'ucbesic dzo'oc in t'anic ya'abcach aj ba'atelo'ob bey xan in nu'ucbesic u cheemilo'ob ba'atel. 4Yaan teen u tuuculil in wéemel tin múuch' caajo'ob u ti'al in jadzic le máaxo'ob tu yóotzilcuntajo'ob in múuch' caajo'ob bey xan tu jenajo'ob ya'ab u caajilo'ob in ajawil. 5Bejela'e' tene' quin p'atiquech jejedzquil tuláacal le ba'ax séeb chi'ita'an teech tumen in máanja'an ch'i'ibalo'ob tu yo'olal ma' ta bo'otic páatan bey xan u láak tziiquilo'obo'. 6Quin cha'ic a beetic taakin u ti'al u yúuchul maan ti' le múuch' caajo'obo'. 7Jerusalén yéetel kulnaje' quin kubic te'ex. Tuláacal le u nu'uculo'ob ba'atel dzo'oc u yantal teech yéetel le tuulumo'ob dzo'oc a beetico'ob le yano'ob tu yáanal a kabo' láili' cu p'áatal a ti'alinte'. 8Likbal bejela'e' cu p'áatal mina'an a p'aax ti' jalach naj bey xan le bíin a p'axo'ob ti' le kiino'ob cu taalo'. 9Le quéen in ca'a ti'alint in ajawile', bíin in dzáa ti' teech nucuch tziiquilo'ob bey xan ti' a caajal bey xan ti' kulnaj, beyo' te'exe' bíin u'uya'ac a tzicbalile'ex tuláacal u xuul yóokolcaab.
10Tu ja'abil ciento sesenta y cuatroe',#15.10 Ciento treinta y ocho u bin u taal Cristo. Antíocoe' j kuch tu múuch' caajo'ob, ca tu much'jubáa tu yicnal tuláacal le aj ba'atelo'obo', chéen jun p'íit j p'áat tu yicnal Trifoni'. 11Antíocoe' tu ch'a'apachtaj, Trifone' yanchaj u ta'acbesicubáa ti' u caajil Dor le yaan tu jáal ka'anabo'. 12Le ca tu yilaj dzo'oc u xúunp'atta'al tumen le aj ba'atelo'obo', Trifone' tu tucultaj sen yaj u yanil. 13Antíocoe' je'el actáan ti' Dor, yéetel ciento veinte mil xíimbal oc aj ba'atelo'ob yéetel ocho mil cu nat' tzíimino'ob. 14Tu bakpachtaj le caaj yéetel u aj ba'atelo'obo', ca'aliquil táan u ch'iino'ob le máaxo'ob yano'ob te j cheemo'ob. Tu bakpachtaj le caaj ti' lu'um bey xan ti' ka'anabo', ma' tu p'ataj u yocol mix xan u jóokol mix máaqui'.
Cu túuxtal u dzíibilo'ob bisajbáil Roma Yéetel Judíob
15Ti' lelo' Numenio yéetel u aj láakinajo'obe' j suunajo'ob ti' u lukbalo'ob Roma táan u bisico'ob dzíibo'ob ti' jejeláas ajawo'ob yéetel múuch' caajo'ob, cu ya'alico'ob beya':
16Luco u nojoch p'is óol Romano'obe', cu te'escuntic ajaw Tolomeo. 17Simón u noojoch aj kiino'ob yéetel u caajil judíob, c éet óolo'ob bey xan c éet bisajbáilo'obe', dzo'oc u túuxtic ti' to'on aj bisaj t'aano'ob u ti'al u túunbencunsico'ob u t'aanil bisajbáil yéetel le nup t'aan c beetmaj úucho'. 18Tu taasajo'ob jun p'éel chimal cuatrocientos kilos u aalil. 19Tu yo'olal lelo', dzo'oc c tucultic túuxtic dzíibo'ob ti' jejeláas ajawo'ob yéetel múuch' caajo'ob u ti'al c ya'alic ti'ob ma' u beetico'ob mix jun p'éel kaas ti' le judíob, mix u bino'ob u ba'atelto'ob u caajilo'ob wa u lu'umil, mix u much'icuba'ob yéetel u aj p'eeco'ob. 20T kamaj le chimal tu taasajo'obo'. 21Wa yaan dze'edzec kaakas máaco'ob puudzulo'ob ti' le caaj u ti'al u ta'acbesjubáa ta wicnale'exo'. kube'ex ti' Simón u noojoch aj kiino'ob u ti'al ca u jadz je'el bix u ya'almaj t'aan le judíobo'.
22Bey dzíibnajic xan ti' ajaw Demetrio, ti' Atalo, ti' Ariarate, ti' Arsaces 23yéetel ti' tuláacal múuch' caajo'ob: ti' Sampsame, Esparta, Delos, Mindos, Sición, Caria, Rodas, Faselis, Cos, Side, Arvad, Gortina, Cnido, Chipre yéetel Cirene. 24Túuxta'ab xan jun p'éel le ju'una' ti' Simón u noojoch aj kiino'ob.
Antíoco Séptimo cu wet'ic u bisicubáa yéetel Simón
25Ajaw Antíocoe' je'el ti' jun p'éel caaj naadz ti' Dor, ca jo'op' u sen pulicubáa tu yóokol; tu beetaj u nucuch ba'alilo'ob ba'atele', ca tu bakpachtaj le tu'ux yaan Trifón u ti'al ma' u páajtal u jóokol mix u yocol mix máac.
26Simone' tu túuxtaj ti' Ántíocoe', dos mil u asab ma'alobil aj ba'atelo'ob u ti'al áantic, bey xan tu túuxtaj plata, oro yéetel u nu'uculo'ob ba'atel. 27Ba'ale' Antíocoe'. ma' tu yóoltaj u kami', ba'ale' tu manba'alcuntaj tuláacal le séeb chi'ob u beetmaj ca'ach yéetel Simono', ca tu xotaj u bisicubáa tu yéetel. 28Tu túuxtaj Atenobio, jun túul ti' u yéet óolo'ob ajawe', u ti'al tzicbal yéetel Simón. Tu túuxtaj u bis le t'aana': Te'exe' dzo'oc a ch'a'ique'ex Jope, Gezer, yéetel u pakil najil u cananil Jerusalén, u caajilo'ob in ajawil. 29Dzo'oc a kascuntique'ex le lu'umo'obo', dzo'oc a beetique'ex ya'ab kaaso'ob ti' le múuch' caajo' yéetel dzo'oc a ch'a'ique'ex a ti'alinte'ex ya'ab u cúuchilo'ob in ajawil. 30Bey túuno' kube'ex ti' teen bejela'e' le caajo'ob dzo'oc a ch'a'iquexo', kube'ex xan le páatano'ob dzo'oc u bo'ota'al ti' te'ex ti' le cúuchilo'ob yano'ob naadz ti' u lu'umil Judeao'. 31Wa ma'e', bo'ote'ex tu yo'olalo'obe' dieiseis mil quinientos plata, yéetel u láak bo'olo'ob tu yo'olal le kascunaj ta beetaje'exo' bey xan tu yo'olal u páatanilo'ob le caajo'obo'. Wa ma' ta beetique'exe', quin taal in ba'atelte'ex.
32Atenobio u yéet óol ajawe' j bin Jerusalén, cu dzo'ocol u yilic yéetel jak óolal u qui'ichquelemil bix yanic Simón, bey xan u nu'uculo'ob beeta'ano'ob yéetel oro, plata bey xan tuláacal u ayikalilo'obe', tu ya'alaj ti' Simón u túuxtaj t'aan ajaw. 33Simone' tu núucaj: To'one' ma' t ch'a'a mix jun p'éel lu'um ma' c ti'ali', mix xan t ch'a'aj ba'alo'ob ma' c ti'alo'obi', ba'ale' le ba'axo'ob tu p'atajo'ob c máanja'an ch'i'ibalo'ob, to'oc to'on jun jeedzac tumen c aj p'eeco'ob quex ma' unaj u ch'a'aico'ob ca'achi'. 34To'one' le ca t ilaj je'el u páajtale' t ca'a tocaj le ba'ax tu p'ataj to'on c máanja'an ch'i'ibalo'ob. 35Wa tu yo'olal Jope yéetel Gezer ca káatico': le caajo'obo' tu beetajo'ob ya'ab kaaso'ob ti' c caajal yéetel ti' c múuch' caaj. Tu yo'olalo'obe' je'el c dzáic tres mil trecientos platae'.
36Atenobioe' ma' tu núucaj mix ba'ali'. Kuuxchaja'an ca j suunaj tu'ux yaan ajaw, ca tu ya'alaj ti' ba'ax tu núucaj Simón, bey xan le qu'ichquelemil yanique', leti'e' tu láaj a'alaj ba'ax tu yilaj. Le ajawo' sen kuuxchaji.
37Ba'ale' Trifone' j na'ac ti' jun p'éel cheeme' ca púudz u binbal Ortosia. 38Ajaw túune' tu t'anaj Centebeo jun túul náacom u nojochil tuláacal u jáal ja'e', ca tu kubaj tu kab aj xíimbal oc ba'atelo'ob yéetel cu nat' tzíimino'obe' 39ca tu ya'alaj ti'ob ca yanaco'ob tu táan Judea, ca u yutzquinto'ob Cedrón, ca u mu'ukanquinto'ob u jool caajilo'ob, u ti'al ca u ba'atelto'ob u caajil le judíob. Ca'aliquil ajawe' bíin xi'ic u ch'a'apacht Trifón. 40Centebeoe' j kuch Jabniae', ca tu cáajsaj u caxtic ba'atel ti' judíob, jo'op' u bin judea u mach judíob u kal yéetel u quiimse ya'ab ti' leti'obi'. 41Tu yutzquintaj Cedrone' ca tu p'ataj aj nat' tziimino'ob yéetel u láak aj ba'atelo'obi', u ti'al u bino'ob tu bejilo'ob judea je'el bix tu ya'alajil ajawo'.
Currently Selected:
1 MACABEOS 15: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.