1 MACABEOS 14
14
Demetrio II cu ma'achal kalbil
1Tu ja'abil ciento sesenta y dose', ajaw Demetrioe' tu much'quintaj u aj ba'atelo'obe', ca j bin tu tojil Media u caxt u láak aj ba'atelo'ob u ti'al u ba'ateltic Trifón. 2Arsaces u ajaw Persia yéetel Mediae', tu yojéeltaj dzo'oc u yocol Demetrio tu lu'um, ca tu túuxtaj jun túul ti' u náacomo'ob u ti'al machic cuxa'an. 3Le náacomo' j bine' ca tu pa'aj u muuk Demetrio, cu dzo'ocole' tu machaj cuxa'ane' ca tu bisaj tu yicnal Arsaces, leti'e' tu kalaj.
U yutzul t'aanil Simón
4Ca'aliquil méektáanaj Simone', yanchaj jéedzel tu lu'umil Judea. Leti'e' meyajnaj u ti'al ca xi'ic utzil ti' u caajal. Le caajo' qui'imacchaj u yóol tuláacal u kiinilo'ob u ajawil. 5Ichil u láak nojbe'en ba'alo'ob tu beetaje', tu pa'aj u muuk u jáal ja'ail caajil Jope, ca tu je'aj bej ti' u múuch' caajilo'ob ka'anab. 6Tu náachcuntaj u xuulilo'ob u lu'umilo'ob
ca tu beetajubáa u yuumil tuláacal le lu'umo'.
7Ya'abcach máaxo'ob bisa'ano'ob ca'ach táanxel lu'umile' tu beetaj u suuto'ob tu lu'umo'ob;
tu ti'alintaj Gezer, Bet-sur bey xan u pakil najil u cananil Jerusalén, tu jóoksaj ichile' tuláacal le ba'axo'ob ma' utz yanilo'obo'.
Ma' yanchaj mix máac u xachubáa tu táani'.
8Le máaco'obo' cu pakico'ob u coolo'ob ich jéedzelil,
le lu'umo' cu tóop'ol u yich u pakalo'ob, u che'ilo'ob le táax koomo' cu yichanquilo'ob.
9Le nuxibo'obo' cu cutalo'ob ti' le kíiwico'obo' cu tzicbaltico'ob bix u bin utzil ti'ob,
ca'aliquil le táanquelemo'obo' cu búucbesicuba'ob yéetel u jadzudz nookilo'ob ba'atel.
10Simone' tu yilaj u yantal janal ti' le caajo'obo',
tu dzaj ti'ob u nu'uculo'ob u cananticuba'ob.
U tzicbalil ba'axo'ob tu beetaje' j kuch tac tu xuul yóokolcaab.
11Tu beetaj u suut le jéedzel ti' le múuch' caajo',
Israele' sen qui'imacchaj u yóol.
12Tu jujun túulile' cu cutal tu bo'oy u pakal higo;
mix máac yaan u ti'al dzáic sajaquil ti'ob.
13Ti' le múuch' caajo' j p'áat mina'an le j meen loobo'obo',
ti' le kiino'obo' j pa'ab u muuk le ajawo'ob aj p'eeco'obo'.
14Tu canantaj u yedza'anilo'ob u caajal, tu míistaj tuláacal le ma' ocsaj óolo'ob yéetel kaakas máaco'obo'.
Tu dzo'ocbesaj yéetel jaaj óolal le a'almaj t'aan,
15tu dzaj u nojbe'enil kulnaj bey xan tu ayikalcuntaj tu yéetel quili'ich nu'uculo'ob.
Cu ca dzabal u t'aanil bisajbáil yéetel Roma bey xan yéetel Esparta
16Le ca j kuch u tzicbalil tu lu'umil Roma yéetel Esparta dzo'oc u quíimil Jonatane', yanchaj ya'ab okom óolal. 17Ba'ale' le ca ojéelta'ab Simón u yíidzin cu beetic u noojoch noj kiino'ob je'el bix leti' ca'ach, bey xan dzo'oc u ti'alintic tuláacal le múuch' caaj yéetel u caajilo'obo', 18dzíibta'ab ti' tu yóokol baxbil broncee', tu'ux cu ca túunbencunta'al le bisajbáil yéetel le séeb chi' yáax beeta'an yéetel Judas bey xan Jonatán u sucu'uno'ob. 19Le bisaj t'aana' j xo'oc tu táan tuláacal le caaj much'ucbal Jerusaleno'. 20Lela' leti' le ba'ax cu ya'alic le dzíib túuxta'ab tumen le espartano'ob:
U nuuquilo'ob u caajil Espartae' cu te'escuntic u láako'ob, Simón u noojoch aj kiino'ob, u nuuquilo'ob caaj, aj kiino'ob yéetel u chuucáan u caajil Judíob. 21Le aj bisaj t'aano'ob ta túuxtaje'exo'ob ti' c caajalo', dzo'oc u ya'alico'ob ti' to'on a nojochil yéetel a tziiquil. U taalbalo'obe' tu dzaj to'on nojoch qui'imac óolal. 22Dzo'oc c dzíibtic ti' u dzíibilo'ob le múuch' caaja' je'el bix lela': Numenio u paal Antíoco, yéetel Antípatro u paal Jasón, u aj bisaj t'aanilo'ob Judíob, dzo'oc u taalo'ob u túunbencunto'ob u t'aanil bisajbáil t éetel. 23Le caajo' tu tucultaj ma'alob ca ka'amaco'ob yéetel tziiquilo'ob yéetel xan ca líikesa'ac jun p'éel le dzíibo', le tu'ux yaan u dzíibilo'ob le caajo' u ti'al u ka'ajesa'al tumen u caajil Esparta. Dzo'oc xan u jóokesa'al jun p'éel dzíibile' u ti'al Simón u noojoch aj kiino'ob.
24Cu dzo'ocol le ba'ala', Simone' tu túuxtaj Numenio tu caajil Romae', yéetel jun p'éel nojoch chimal beeta'an yéetel oro cu kuchul cuatrocientos treinta kilos aalil, u ti'al u ca'a beetico'ob u nup t'aanil le bisajbáil tu yéetelo'obo'.
Le ba'ax a'ala'ab tu yo'olal u tziiquil Simón
25Le ca tu yu'ubaj le j israelitaob tuláacal lelo' tu ya'alajo'ob: ¿Bix je'el c e'esic nib óolal ti' Simón yéetel u paalalo'obe'? 26Tumen leti'e', u sucuno'ob yéetel u láaktzilo'ob u taatae', ma' lúub u yóolo'ob u ti'al j ba'atel tu yéetel u aj p'eeco'ob Israeli', tu náachcuntajo'ob bey xan tu dzajo'ob tocsajil ti' le caaja'. Leti'ob túune' tu dzíibtajo'ob tu yóokolo'ob baxbil broncee', ca tu dzajo'ob tu yóokol jun p'éel pak tu lu'umil Sión, 27Je'el ba'ax cu ya'alic le ba'ax dzíibta'aba'.
Tu kiinil dieciocho tu winal Elul tu ja'abil ciento sesenta y dos, tu yóox p'éel ja'ab jo'op'oc u beetic u noojoch aj kiino'ob Simón tu caajil Asaramele', 28tu'ux much'laj aj kiino'ob, cajnáalo'ob u náacomilo'ob yéetel u nuuquilo'ob múuch' le caaje', a'ala'ab to'on lela': 29Ca'aliquil ya'abcach ba'atelo'ob chi'ichnajcuntic le múuch' caaja', Simón u paal Matatías u ch'i'ibal Joyarib, bey xan u sucu'uno'obe' tu chokjuba'ob tu táan quíimil u ti'al u xachicuba'ob ti' u aj p'eeco'ob u caajalo'ob, u ti'al u yilico'ob ma' u manba'alcunta'al kulnaj yéetel a'almaj t'aan; beyo' dzo'oc u taasico'ob u nojbe'enil ti' múuch' caaj. 30Jonatane' tu much'quintaj u caajale' ca tu beetjubáa u noojoch aj kiino'ob, tac tu kiinil binic u much'ubáa ti' u máanja'an ch'i'ibalo'ob quimeno'ob. 31Le aj p'eeco'obo' tu tucultajo'ob u yocolo'ob ti' le múuch' caaj u ti'al u ba'atelto'ob kulnaj. 32Simón túune' tu dzajubáa táanile' ca j ba'atelnaj tu yo'olal u múuch' caajal; tu xupaj ya'ab u taakin u ti'al u manic u nu'ucul ba'atel bey xan u ti'al u bo'otic u aj ba'atelilo'ob le múuch' caaj; 33tu dzaj u tuulumilo'ob Judea yéetel Bet-sur tu xuul u lu'umil Judea, tu'ux ca'ach yaan u nu'ucul u ba'atel le aj p'eeco', ca tu dzaj judíob canantic. 34Tu tuulumtaj xan Jope le yaan tu jáal ja' tu'ux cu je'elel cheemo'ob, bey xan Gezer le yaan tu xuul u lu'umil Azoto, te'elo' ti' yaan ca'ach le aj p'eeco'obo', tu dzaj judíob te'elo', ca tu dzaj tuláacal ba'ax kabéet u ti'al u yutzquinta'al le caajo'. 35Le ca tu yilaj le caaj u kub óol Simón yéetel bix u káat ca yanac u tziiquil u múuch' caaje', tu dzajo'ob u beet náacomil, bey xan u ti'al u beet u noojoch aj kiino'ob, u ti'al u bo'olil tuláacal ba'axo'ob dzo'oc u beetic, tu yo'olal u tojil, bey xan le kub óolal tu ye'esaj ti' le múuch' caajo' yéetel u meyajo'ob tu yo'olal u nojochtal le caajo'. 36Tu kabe' j bin utzil le ba'atel u ti'al u míista'al ti' le lu'um le ma' ocsaj óolo'ob cajlajo'ob ca'ach tu Caajil David, tu'ux beeta'ab jun p'éel tuulum caaj, te'elo' cu jóokolo'ob ca'ache' cu kascuntico'ob yéetel ba'al cu beetico'ob tuláacal u bakpach kulnaj, beyo' cu poch'ico'ob u quili'ichil le cúuchilo'. 37Tu dzaj aj ba'atelo'ob judíob ti' le pakil najil u cananil, tu tuulumtaj u ti'al u canantic le múuch' caaj yéetel le caaj, bey xan tu líikesaj pako'ob tu bakpach Jerusalén. 38Ajaw Demetrioe' tu ya'alaj ti' ca p'áatac u beet u noojoch aj kiino'ob, 39tu beetaj u yantal ichil u yéet óolo'ob ajaw, bey xan tu dzaj nucuch tziiquilo'ob ti', 40tumen tu yojéeltaje', le j romano'obo' dzo'oc u ya'alico'ob u yéet óolo'ob le judíob, bey xan u yéet ba'atelo'ob yéetel xan láaktzilo'ob, u láakile' tu kamajo'ob yéetel tziiquil u aj bisaj t'aano'ob Simón; 41le judíob yéetel le aj kiino'obo' tu ya'alajo'obe', Simón bíin u beet u aj kiinil tuláacal kiin ca'aliquil u pa'atico'ob u taal jun túul aj bóobat dza'an páajtalil ti', 42-43leti' bíin u beet u náacomil bey xan u ti'al yila'a kulnaj, ca xan u yila'a u beeta'al u meyajil, bey xan u yila'al u meyajilo'ob múuch' caaj, u nu'uculo'ob ba'atel, tuulumo'ob, yéetel ca u'uya'ac u t'aan tumen tuláacal máac; bey xan ca beeta'ac tuláacal u ju'unilo'ob múuch' caaj tu kaaba', yéetel ca u búuquint chacjome'en nook bey xan le x t'ilib beeta'an yéetel oro.
44Mix le caajo', mix le aj kiino'ob je'el u páajtal u manba'alcuntic le ba'axo'ob dzo'oc ya'ala'alo', mix u xachicuba'ob ti' ba'ax cu ya'alic Simón, mix ti' u much'quinta'al caaj wa ma' u káat letii', mix xan u búuquintic chacjope'en nook yéetel le x t'ilib beeta'an yéetel oro. 45Le máaxo'ob bíin ma'a u'uyaj t'antic le ba'axo'ob a'ala'an wa tu yo'olal ma' tu dzo'ocbesique', bíin ja'adzac. 46Tuláacal le caaj much'ucbale' cu ya'alico'obe', Simone' je'el u páajtal u meyaj je'el bix dzo'oc u ya'ala'alo'. 47Simone' dzo'oc u éejentic tu jaajil u yóol u beetic u meeyjul u noojoch aj kiino'ob, u náacomil aj ba'atelo'ob yéetel u méektáanil Judíos yéetel aj kiino'ob, bey xan u yantal tu táan tuláacal u ba'alubáilo'ob.
48A'ala'ab xan yaan u dzíibta'al tu yóokol bronce, u ti'al j dzaabilo'ob tu cúuchil tu'ux yaan kulnaj, tu'ux ma'alob chica'anil u yila'al, 49bey xan ca dza'abac u láak le dzíibo'oba' le tu'ux cu líikesa'al taakin tu'ux je'el u páajtal u yilic simón yéetel u paalalo'obe'.
Currently Selected:
1 MACABEOS 14: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.