1 MACABEOS 13
13
Simone' leti' u jeel náacom
1Simone' j kuch u tzicbalil tu xiquin, dzo'oc bin u muchquintico'ob jun p'éel nojoch múuch aj ba'atelo'ob u ti'al u xu'ulsico'ob Judá. 2Le ca tu yilaj jaka'an u yóol le caaj bey xan chuup yéetel sajaquile', j bin Jerusalene' ca tu much'quintaj máaco'ob, 3ca tu dzaj u yóolo'ob táan u ya'alic ti' leti'ob: Te'exe' a wojele'exe' teen, in sucuno'ob yéetel in taatae', t kubaj c óol tu yo'olal a'almaj ta'ano'ob bey xan tu yo'olal kulnaj, ba'atelnajo'on bey xan t mukyajtaj óotzilil. 4Tu yo'olal israele' dzo'oc u láaj quíimil in sucuno'ob, chéen teen cuxa'anen. 5Bejela'e' mix u tuculta'al wa sajaquen ti' quíimil tumen bey dzo'oc c náadzal ti' u chi' quíimil: ¡ma' asab co'oj in tojol ti' in láaktzilo'obi'! 6Ba'ale' bíin ba'atelnaquen tu yo'olal in caajal, tu yo'olal kulnaj, tu yo'olal co'olelo'ob bey xan tu yo'olal a paalale'ex, tumen tuláacal le ma' ocsaj óolo'obo', dzo'oc u much'icuba'ob u ti'al u xu'ulso'ono'ob.
7Le ca tu yu'ubaj le caaj le t'aano'oba' j yanji u yóolo'ob, 8tuláacalo'ob j múuch' awatnajo'ob táan u ya'alico'ob: ¡Teech u jeel c náaco'om, teech bíin beetic le meyaj tu beetajo'ob Judas yéetel Jonatán! 9¡Nu'ucbeso'on u ti'al le ba'atelo', to'one' je'el u'uyaj t'antic ba'axo'ob bíin a wa'ale'! 10Simón túune' tu much'quintaj tuláacal le máaxo'ob u yojelo'ob ba'atelo', ca tu beetaj u séeb dzo'ocsa'al u pakilo'ob Jerusalén, ca tu mu'ukanquintaj u tuulumo'ob. 11Ca tu túuxtaj Jonatán u paal Absalone' tu caajil Jope, yéetel ya'abcach aj ba'atelo'obe', ca tu tojolch'intaj le máaxo'ob caja'ano'obo' ca j p'áat cajtal ichil.
Bix quiimsa'abic Jonatán
12Trifone' jóok tu caajil Tolemaida yéetel ya'abcach aj ba'atelo'ob u ti'al u binbal Judá, táan u bisic Jonatán máax u kalmaj. 13Simone' dzo'oc ca'ach u je'elel tu lu'umil Adid tu jáal táax koom. 14Le ca tu yojéeltaj Trifón dzo'oc u yantal Simón tu táan le caaj je'el bix ca'ach Jonatán u sucu'un, bey xan dzo'oc u nu'ucbesicubáa u ti'al le ba'atelo', tu túuxtaj aj bisaj t'aano'ob a'alic ti': 15C kalmaj Jonatán a sucu'un, tumen u p'axmaj taakin ti' u ayikalil jalach naj, tu yo'olal le meyaj cu beetic ca'acho'. 16Túuxt ti' to'on tres mil trecientos kilos plata yéetel ca'a túul u paalal Jonatán u ti'al c bisej, tu yo'olal beyo' ma' bíin u ca'a xachjubáa ti' to'oni', cu dzo'ocole' je'el c jáalkabtique'. 17Quex tumen Simón tu yilaj chéen jun p'éel tuuse', tu túuxtaj ch'a'abil le taakino' bey xan le ca'a túul xi'ipalalo'obo', tu yo'olal ma' u p'ecta'al tumen le máaco'obo', 18tu yo'olal xan ma' u ya'ala'al dzo'oc u quiimsa'al Jonatán tumen ma' tu túuxtaj le taakin yéetel le ca'a túul j xi'ipalalo'obo'. 19Bey túuno' tu túuxtaj le ca'a túul j xi'ipalalo'obo' bey xan le tres min trecientos kilos platao'; ba'ale' Trifone' ma' tu dzo'ocbesaj ba'ax tu ya'alaji', ma' tu jáalkabtaj Jonatani'.
20Cu dzo'ocole', Trifone' jo'op' u bin tu tojil le múuch' caaj u ti'al ca u xu'ulse, ba'ale' yanchaj u bakpachtic u binbal tu bejil Adoraim, tumen tuláacal tu'ux cu yóoltic máane' cu ka'alal u beel tumen u aj ba'atelo'ob Simón. 21Ca'aliquile' u aj ba'atelilo'ob u pakil najil u cananil Jerusalene', tu túuxtajo'ob bisaj t'aano'ob ti' Trifón, ca tu káat óolto'ob ti' ca xi'ic tac tu yicnalo'ob ti' u bejil x tocoy lu'ume', u ti'al ca u bis janal ti'ob. 22Trifone' tu nu'ucbesaj u aj nat' tziimino'ob u ti'al u binbali', ba'ale' le áakabo' sen káax ye'ebe', ma' páatchaj u kuchuli'. Leti' túune' j luk tu lu'umil Galaad. 23Chéen p'el úuchic u náadzal Bascamae', tu quiimsaj Jonatane', ca j mu'uc te'elo'. 24Cu dzo'ocole' Trifone' j suunaj tu lu'um.
25Simone' tu túuxtaj ch'a'abil u wíinclil Jonatán u sucu'une' ca tu mucaj tu caajil Modín u caajal u máanja'an ch'i'ibalo'ob. 26Tuláacal Israel okolte ya'abcach kiino'ob, yéetel nojoch okom óolal. 27Simone' tu líiksaj jun p'éel nojoch pak tu yóokol u mucnal u taata yéetel u sucu'uno'ob, ma'alob chica'anil, beeta'an yéetel póolbil tuunich tu ca'a tzéelil. 28Tu líikesaj xan siete piramides, ca'a tzoolile', u ti'al u taata yéetel u maama yéetel u can túul sucu'uno'ob. 29Cu dzo'ocole' tu wa'acuntaj jadzutz ocom tuunicho'ob tu bakpach le ni' najo'ob, tu yóokol le ocom tuunicho'obo' tu dzaj chimalo'ob yéetel u nu'ucul ba'atelo'ob u ti'al ka'asajil ti' kiino'ob mina'an u xuul. Tu tzéel le chimalo'ob yéetel u nu'ucul ba'atelo'obo', yaan ca'ach cheemo'ob asab jadzutz dza'anilo'ob tu yo'olal u yila'alo'ob tumen tuláacal máax cu bin yóok ja' 30Le nucuch mucnalo'ob beeta'ano'ob tu caajil Modino, dzaca'ano'ob tac bejela'e'.
Cu ca'a úuchul ca'a bisajbáil yéetel Demetrio II
31Trifone' tu manba'alcuntaj le t'aan u beetmaj tu yo'olal le táanquelem Antíoco' ca tu quiimsaj 32ca ajawnaj tu jalach káanche', tu dzaj tu pool u péet jo'ol Asia. Tu sen beetaj loob ti' le múuch' caajo'.
33Simone' tu yutzquintaj u tuulumilo'ob Judea, tu dzaj u witzil najilo'ob, u ca'anal pakilo'ob, u jool najilo'ob yéetel u x katab che'ilo'ob, cu dzo'ocole' tu p'ataj janalo'ob ti' le witzil najo'obo'. 34Tu yéeyaj aj bisaj t'aano'obe' ca tu túuxtajo'ob u yilo'ob ajaw Demetrio, u ti'al u ca u káat ti' ma' u tza'abal u páatanilo'ob le múuch' caajo' tumen Trifone' chéen j bin u yocolt tuláacal ba'ax yaan te j múuch' caajo'. 35Ajaw Demetrioe' j dzíibnaj tu'ux ca ya'alic ti'ob beya':
36Ajaw Demetrioe' cu te'escuntic Simón u noojoch aj kiino'ob, u yéet óol ajawo'ob, bey xan u nuuquilo'ob le caajo' yéetel tuláacal u múuch' caajil Judíob. 37Dzo'oc in kamic le péet jo'ol beeta'an yéetel oro, bey xan le u le' xa'an ta túuxtaje'ex teno', tene' chuca'an in wóol u ti'al ca yanac teen jéedzel ta wéetele'ex, bey xan bin in ca'aj in dzíibt ti' u nuuquilo'ob in aj meyajo'ob ma' u tzáic te'ex u bo'olil páatano'ob. 38Tuláacal le séeb chi' dzo'oc in beetic ta wéetele'exo' bey bíin úuchac, te'ex xane' je'el u páajtal u p'áatal ta kabe'ex tuláacal le tuulumo'ob dzo'oc a beetique'exo'. 39Quin sa'atsic xan te'ex tuláacal le si'ipilo'ob dzo'oc a najmatique'ex tac tu kiinil bejela'o'. Quin sa'atsic te'ex u p'aaxil páatanil le jalach naj. Ma' bíin tza'abac ti' te'ex u bo'olil mix jun p'éel ti' le páatano'ob ca bo'otique'ex ca'ach tu yo'olal u caajil Jerusaleno' 40Wa yaan dze'edzec ti' te'ex nu'uca'an u ti'al antal ichil le aj ba'atelo'ob canantiqueno', u dzáa u kaaba'. Yanac jéedzel ichilo'on.
41Tu ja'abil ciento sesentae', Israele' jáaw u t'onquintal tumen le ma' ocsaj óolo'obo'. 42Le caaj túuno' jo'op' u dzíibtico'ob u ju'unil lu'umo'ob yéetel u ju'unil meyajo'ob: Lelo' tu yáax ja'abil Simón u noojoch aj kiino'ob bey xan leti' u náacom yéetel u aj nu'ucbesaj aj ba'atelo'ob yéetel judíob.
Cu ch'a'abal Gezer
43Ti' le kiino', Simone' tu puljubáa tu yóokol Gezere' ca tu bakpachtaj tu yéetel u aj ba'atelo'ob. Tu beetaj jun p'éel witzil naj u ti'al u yocol u ch'a'a le caajo', tu bakpachtaj le caajo', ca tu je'aj jun p'éel bej ti' jun p'éel le witzil najo', ca tu ch'a'a le caajo'. 44Le máaxo'ob yano'ob ti' u witzil najil le ba'atelo', j ooco'ob ichil le caajo', ca j yanchaj jun p'éel x wo'oquin ti' le caajo'. 45U cajnáalilo'ob le caajo', u co'olelilo'ob yéetel u mejen paalalilo'obo', j na'aco'ob ti' le pako'ob u jatmaj u nooko'ob ca tu yawat a'alajo'ob ti' Simón, je'el u kubcuba'obe', 46tu ya'alajo'ob ti': ¡Ma' a beetic to'on je'el bix u najmatic c si'ipilo'obe', ba'ale' beet je'el bix a wutzile'! 47Simone' tu beetaj kax t'aan tu yéetelo'obe' ca jáaw u ba'ateltico'ob. Ba'ale' tu beetaj u jóokolo'ob ti' le caajo' ca tu yutzquintaj le najo'ob tu'ux ca'ach yaan le beetbil kuo'obo', cu dzo'ocole' j ooc ichil le caaj táan u kayic u kaayilo'ob qui' t'aan. 48Tu láaj jóokesaj ichile', le ba'axo'ob ma' utz yanilo'obo', ca tu dzaj ichilo'obe' máaco'ob cu dzo'ocbesico'ob a'almaj t'aan, tu dzaj u pakilo'ob le caajo' ca tu beetaj u yotochi'.
Simone' cu ch'a'ic u pakil najil u cananil Jerusalén
49Bey tumen le aj ba'atelo'ob yaan ti' pakil najil canan ma' tu páajtal u jóokolo'ob j káax mix tu páajtal u ca'a ocolo'ob, mix tu páajtal u coonolo'ob mix u maano'obi', jo'op' u mukyajtico'ob wi'ij, ca j quíim ya'ab ti'obe' tu yo'olal lelo'. 50Leti'ob túune' tu kax t'antajo'ob ti' Simón u kubicjuba'ob, leti'e' tu éejentmaje'; cu dzo'ocole' ca tu beetaj u jóokolo'obe', ca tu yutzquintaj yanil le cúuchilo'. 51Tu kiinil veintitres ti' u ja'abil ciento sesenta y unoe', j ooc Simón ti' le pakil naj cananil yéetel u kaayilo'ob qui' t'aano'ob u machmajo'ob le xa'ano'ob táan u paxico'ob arpaob, platillo'ob, cítaraob yéetel kaayo'ob, tumen Israele' dzo'oc u p'áatal jáalkab ti' le sajbe'entzil aj p'eeco'. 52Simone' tu ya'alaj yaan u kiinbesa'al jujun ja'ab yéetel qui'imac óol le kiinilo'. Tu mu'ukanquintaj u pu'uquil kulnaj le yaan tu tzéel u pakil najil u cananil Jerusalen, beyo' leti' yéetel u aj láakinajo'obe' j cajlajo'obi'. 53Le ca tu yilaj Simón dzo'oc u j xiibtal Juan u paale', tu dzaj u beet u náacomil tuláacal u aj ba'atelo'ob yano'ob Gezero'.
Currently Selected:
1 MACABEOS 13: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.