1 MACABEOS 12
12
Israele' cu beetic nup t'aan yéetel Roma bey xan yéetel Esparta
1Jonatane' tu yéeyaj dze'edzec j xiibo'ob u túuxte Roma u ti'al u ca'a u jedzo'ob le nup t'aanil bisajbáilo', tumen tu yilaj utz le kiino'ob u ti'al u beetico'. 2Tu túuxtaj xan ju'uno'ob Esparta yéetel u láak cúuchilo'ob u ti'al u beet bey tu yéetelo'obo'. 3Le aj bisaj t'aano'obo' j bino'ob Romae', ca j ooco'ob le tu'ux much'ucbal le u nuuquilo'obo'' ca tu ya'alajo'ob: Jonatán u noojoch aj kiino'ob yéetel u múuch' caajil Judeae' dzo'oc u túuxtico'on u ti'al c ka'ajes tu ca'a téen le u nup t'aanil bisajbáa c beetmaj ta wéetele'exo'. 4Le romano'obo' tu dzajo'ob ti'obe' u ju'unil u ti'al ca utzul ka'amaco'ob tumen u méektáanilo'ob jejeláas cúuchilo'ob, tu'ux cu ya'ala'al ti'ob ca u p'ato'ob u bino'ob tu lu'umil Judea tu yéetel utz. 5Lela' leti' le ba'ax cu ya'alic le ju'un túuxta'ab Esparta tumen Jonatán:
6Jonatán u noojoch aj kiino'ob, u múuch'il u nuuquilo'ob múuch' caaj bey xan u caajil Judíobe', cu te'escuntico'ob espartano'ob le u láako'obo'. 7Jun téenaque' Ario u ajaw Espartae', tu túuxtaj jun p'éel dzíib ti' Onías nojoch aj kiin, u ti'al u ya'alic láaktzil bin ti' to'on. U dzíibil le ju'uno' j ca'a dzíibta'ab tu láak tu'ux. 8Onías tu yutzul kamaj le máax bis le ju'uno', ca tu éejentaj le éet t'aanilo' bey le bisajbáilo'. 9Quex tumen to'one' ma' kabéet to'on le ba'alo'oba', tumen to'one' ti' c caxtic áantaj ti' le quili'ich dzíibo'ob yaan to'ono', 10dzo'oc c tucultic c túuxtic ti' te'ex jun múuch' aj bisaj t'aano'ob u ti'al u ka'ajeso'ob c núup bisajbáilo', u ti'al ma' u lúubul u yóolal le c éet láaktzilo', tumen dzo'oc u yúuchtal c kam le yáax ju'un ta dzíibtaje'exo'. 11To'one' ma' tech u jáawal c ka'asique'ex ichil c kiinbesajilo'ob, bey xan tu kiinilo'ob c kubic quiimsbil ba'alche'ob bey le quéen payalchi'inaco'on, je'el bix u naj u beeta'al tu yo'olal láaktzilo'obe'. 12Sen qui'imac c óol tu yo'olal a nojoch tzicbalile'ex. 13Ba'ale' to'one' bakpachta'ano'on tumen ya'abcach ba'atelo'ob. Le ajawo'ob bakpachtmailo'ono', cu sen pulicuba'ob t óokol. 14To'one' ma' t óoltaj c chi'ichnacunte'exi', mix xan le c núup bisajbáilo'obo', quex tumen yaan to'on le ba'atelo'obo', 15tumen yaan to'on u yáantajil ca'an, cu dzo'ocole' Kue' dzo'oc u toquico'on ti' c aj p'eeco'ob yéetel dzo'oc u t'onquintico'ob, 16T yéeyaj Numenio u paal Antíoco, yéetel Antípatro u paal Jasón, leti'obe' t túuxtajo'ob Roma u ti'al u túunbencunto'ob le bisajbáil yéetel le nup t'aan c beetmaj úuch yéetel le j romailo'obo'. 17T a'alaj xan ti'ob ca xi'ico'ob Esparta, u ti'al u te'escunte'ex bey xan ca u kub te'ex le ju'uno'oba', tumen j káat c túunbencunt c láaktzilil. 18Je'el c dzáic te'ex u nib óolalil ca túuxte'ex to'on u núuc t'aanile'.
19Le dzíiba' láili' je'el bix le túuxta'ab ti' Onías:
20Ario u ajaw Espartae', cu te'escuntic Onías u noojoch aj kiino'ob. 21Dzo'oc in caxtic jun p'éel dzíib tu'ux cu ya'alique', le espartailo'ob yéetel le judíobo' láaktzilo'on, tuláacalo'on u ch'i'ibalo'ob Abraham. 22Bejela'e' dzo'oc in wojéeltic lela', jach je'el in dzáic u nib óolal ti' te'ex ca dzíibnaque'ex ti' teen yéetel ca dza'ex in wojéelt bix yanile'ex. 23Tene' quin dzíibtic te'ex: Wa a wacaxe'ex yéetel a ayikalile'ex c ti'ale', le ba'ax c ti'ale' a ti'ale'ex xan. Bey túuno' dzo'oc in wa'alic ca bisa'ac te'ex le bisaj t'aan'.
Jonatane' cu yantal u láak ba'atelo'ob ti'
24Jonatane' tu yojéeltaje', u náacomo'ob Demetrioe' dzo'oc u suuto'ob yéetel asab ya'ab aj ba'atelo'ob ti' le tu yáax taasaje' u ti'al u ba'ateltic. 25Jonatane' jóok tu caajil Jerusalén u ti'al u nactáantico'ob tu lu'umil Amat, tu yo'olal ma' u cha'ic u kuchulo'ob tu lu'umil Judea. 26Tu túuxtaj aj ch'úuco'ob le tu'ux cu je'elelo', le ca j suunajo'obe' tu tzicbaltajo'ob ti' dzo'oc u nu'ucbescuba'ob u puljuba'ob tu yóokolo'ob yéetel áakab. 27Chéen p'el t'úubic kiine', tu ya'alaj ti' u aj ba'atelo'ob ca ch'úucnaco'ob bul áakab u machmajo'ob u nu'ucul u ba'atelo'ob, tu dzaj aj ch'úuco'ob ti' tuláacal tu'ux cu je'elelo'obo'. 28Le ca tu yojéeltaj le aj p'eec u nu'ucbesmajubáa Jonatán yéetel u aj ba'atelo'obe' tu ch'a'ajo'ob sajaquil; j luk u j xiixib máquilo'obe' ca tu t'abajo'ob káako'ob le tu'ux cu je'elelo'obo' ca j púudzo'ob. 29Jonatán yéetel u aj ba'atelo'obe' bey tu yilajo'ob le káako'ob t'aba'ano'obo' ma' tu séeb ilo'ob le ba'ax cu yúuchulo', dzo'oc u sáastal tu láak kiin ca tu yilajo'ob. 30Jonatán túune' j bin u ch'a'apachto'ob, ba'ale' ma' páatchaj u nacpachtico'obi', tumen dzo'oc u ch'actico'ob u áalcab ja'ail Eléutero. 31Jonatán túune' tu tojtáantaj u ch'i'ibal j arabeob cu kaaba'intico'ob zabadeos, ca tu pa'a u muuko'ob ca tu tocaj ba'axo'ob yaan ti'ob. 32Cu dzo'ocole' tu líikesaj u cúuchil tu'ux cu je'elele', ca j kuch tac Damasco, ca tu xíimbaltaj tuláacal le cúuchilo'.
33Simón xane' dzo'oc u bin j ba'atel tac Ascalón yéetel le tuulumo'ob yano'ob tu tzéelo'obo'. Cu dzo'ocole' j bin tac tu caajil Jopei', ca tu ch'a'aj, 34tumen tu yu'ubaj u ya'ala'ale' le cajnáalo'ob te'elo' u káat u kubo'ob le tuulumo'ob ti' u aj ba'atelo'ob Demetrio. Te'elo' tu p'ataj máaxo'ob canantic.
35Le ca j suunaj Jonatane', tu t'anaj u nuuquilo'ob le caajo', ca tu tucultaj tu yéetelo'obe' u líiksic pakil najo'ob u ti'al canan tu lu'umil Judea, 36bey xan u ca'analcuntic u pakilo'ob Jerusalén bey xan u líiksic jun p'éel ca'anal pak u ti'al jatzic u caajil Jeruslén ti' j pakil najil canan, tu yo'olal beyo' le aj ba'atelo'ob yano'ob ti' le pakil najo' ma' bíin máanaco'ob mix bíin coonolnaco'ob ichil le caajo'. 37Le máaco'obo' tu much'juba'ob u ti'al u cáajso'ob u meeyjul u utzquinta'al le pako'. Jun jaatz ti' le pak yaan j lakin tu tojil le chan áalcab ja'ob dzo'oc ca'ach u jéenel. Tu yutzquintaj xan le cúuchil cu kaaba'intic Cafenata. 38Simón xane' tu yutzquintaj yéetel tu mu'ukanquintaj Adid tu táax koomil u jáal ja', ca tu dzaj u jool najilo'ob yéetel u x katab che'ilo'ob.
Bix quíimic Jonatán
39Trifone' taac ca'ach u beetic u ajawil tu lu'umil Asia; táan ca'ach u tucultic u quiimsic Antíoco u ti'al u cutal tu jalach káanche'. 40Ba'ale' sajac ti' Jonatán tumen tu tucultaj je'el u xachicubáa u ti'al u ba'atel tu yéetele'. Bey túuno' jo'op' u tucultic bix je'el u páajtal u machic Jonatán u ti'al u xu'uls. Tu ch'a'aj u beele' ca j bin tac Bet-seán. 41Jonatane' jóok u nactáantubáa tu yéetele' u ch'a'amaj cuarenta mil u asab xiibil u aj ba'atelo'ob ma'alob u yojelilo'ob ba'atele', ca xan j bin Bet-seán. 42Trifone' le ca tu yilaj dzo'oc u kuchul Jonatán yéetel ya'abcach aj ba'atelo'obe' tu ch'a'aj sajaquil u machic. 43Ba'ale' tu kamaj yéetel nucuch tziiquilo'ob, tu bisaj tu táan u yéet óolo'ob bey xan tu dzaj siibalo'ob ti', ca tu ya'alaj ti' u aj ba'atelo'ob ca u'uyaj t'anta'ac je'el bix u beeta'al ti' leti'o'. 44Ca tu ya'alaj ti' Jonatán: ¿Ba'axten ta chi'ichnaccuntaj le máaco'ob wa mina'an ba'atel ichilo'ona'? 45Cha'a u bino'ob tu yotocho'ob; yéey chéen dze'edzec u ti'al u láakintecho'obi', ca xi'iquech tin wéetel tac tu caajil Tolemaida. Tene' bíin in kub teech le caajo' yéetel u láak tuulumo'ob, bey xan u chuucáan aj ba'atelo'ob yéetel u láak náacomo'obo', cu dzo'ocole' quin suut. Tene' leti' j taalem in beet. 46Jonatane' tu táan óoltaje', ca tu beetaj je'el bix tu ya'alajil Trifono': Tu ya'alaj ti' u aj ba'atelo'ob ca xi'ico'ob, ca j suunajo'ob Judea. 47Chéen tres mil aj ba'atelo'ob j p'áat tu yicnal, tu p'ataj dos mil Galileae', ca j bin mil tu yéeteli'. 48Ba'ale' chéen p'elac úuchic u yocol Jonatán tu caajil tolemaidae', j ka'al u joolo'ob le caajo', ca j ma'ach kalbile', ca quiimsa'ab tuláacal u aj ba'atelo'ob.
49Cu dzo'ocole' Trifone' tu túuxtaj j xíimbal oc aj ba'atelo'ob bey xan aj nat' tzíimino'ob tac Galileae', u ti'al quiimsic u aj ba'atelo'ob Jonatán. 50Ba'ale' leti'obe' bey tu tucultajo'ob dzo'oc u ma'achal Jonatán u ti'al kalbil bey xan dzo'oc u quiimsa'al u yéetel aj ba'atelo'obe', ca tu paclan dzaj u yóolo'obe' ca tu tzoljuba'ob u ti'al j ba'atel. 51Le máaxo'ob ch'a'apachticobo', le ca tu yilajo'ob u nu'ucbesmajuba'ob le judíob j ba'atel tac u quíimilo'obe', j suunajo'ob. 52Beyo' tuláacal le judíobo' j páatchaj u kuchulo'ob tac Judea toj u yóolo'ob bey xan cuxa'ano'ob, te'elo' sen sajactaco'obe' tu yokoltajo'ob Jonatán bey xan u láak u yéet aj ba'atelo'ob. Ti' tuláacal israel yanchaj okom óolal. 53Tuláacal le ma' ocsaj óolo'ob yano'ob tu tzéelo'obo', jo'op' u caxtico'ob bix je'el u xu'ulsico'ob le judíob, tumen cu ya'alico'ob: ¡Mina'an jun túul Náacom u ti'al toquico'ob! ¡Dzo'oc u kuchul u kiinil c pulicbáa tu yóokolo'ob u ti'al ca lukeso'ob tu yóokolcaab!
Currently Selected:
1 MACABEOS 12: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.