LUKA 17

1Yu wa popia lolondonge viaye hati, Ovilondokua viya muẽle, ka kuli atatahãi, puãi u o kapela ukuavo ovilondokua, ngongo yaye! 2Eye, co velelapo nda ewe lioku fulila li nyoñamisiwa kosingo yaye kuenje imbiwa vokalunga, oku kapela umue wava vatito ocilondokua hacoko. 3Lunguki lovimuenyo viene muẽle. Ukuẽle nda o lueya, u lemela, nda o likekemba, u wecela. 4Nda o ku lueyela olonjanja epanduvali keteke liongongo, kuenje iya kokuove olonjanja epanduvali loku likekemba hati, Ndeya oku livondela, cove oku u wecela.

5Ovapostolo va popia la Ñala vati, Tu vokiyeko ekolelo. 6Kuenje Ñala wa popia lavo hati, Nda wa kaili lekolelo ndokalumema kombuto yulemba nda vu tẽla oku popia lulemba u hoti, Veyuka, lituika vokalunga, kuenje nda u vu pokola.

7Pokati kene hẽ, peli umue o kasi lukuenje o lima, pamue o lisa olomeme, kuenje, eci ukuenje a tunda vepia, o popia laye hati, Enju lombili, ndo tumale, lia? 8Siti o laika oku popia lukuenje hati, Nelekele handi okulia kuange. Wala uwalo wove woku vumba. Mbumbe osimbu ñasi oku lia loku nyua. Noke oco ci tava ove oku lia loku nyua. 9O pandula hẽ, ukuenje omo a linga ovina vio handelekua? 10Lenevo haico, eci wa lingi ovina viosi vio handelekui, lingi hoti, Tuapika vaño. Tua linga ño eci ca tu sesamela.

11Eci a kala vonjila yoku enda ko Yerusalãi wa pita pokati ka Samária la Galilea. 12Kuenje, eci a iñila vimbo limue, oco omanu ekui va vela ovilundu va ñualẽhela laye kuenje va talamela ocipãla. 13Oco va vilikiya vati, A Yesu, a cime cetu, tu linge ohenda. 14Eci a va mola, wa popia lavo hati, Kuendi, ka lilekisi kovitunda. Oco, osimbu va enda va yelisua. 15Umue wavo, eci a mola okuti wa sakuiwa, wa tiuka loku sambiliya Suku lolukandi, 16kuenje, oku kekamela posi kolomãi via Yesu, wo panduila. Eye haeye u Samária. 17Oco Yesu wa popia hati, Hekuiko hẽ va yelisua? Ecea liaco li kasi pi? 18Ka kuli vali umue ukuavo o tiuka oku tumbangiya Suku, te lika ukuafeka yiñi? 19Oco Yesu wa popia lu wa velele ovilundu hati, Ca ku kayisa ekolelo liove. Votoka. Kuende.

20Eci va Fariseo vo pula vati, Usoma wa Suku wiya eteke lipi? eye wa va kumbulula hati, Usoma wa Suku ka wiya okuti u moleha lovaso. 21Omanu ka va lingi vati, Usoma wa Suku wowu, pamue wowo, momo Usoma wa Suku u kasi pokati kene.

22Kuenje eye wa popia lolondonge viaye hati, Kuiya oloneke okuti vu livela oku mola ndaño eteke limosi lia Mõlomanu, puãi ko li moli. 23Kuenje omanu va popia lene vati, Tali oko, pamue vati; Tali kulo. Ene puãi ko ka endiko, ko ka va kuami. 24Momo, ndeci ociliakulo ci liakula, kuenje ci tuila ilu tunde konele eyi toke konele yikuavo, haico ci kala Mõlomanu veteke liaye. 25Tete puãi o tala ohali ya lua, kuenje ocitumbulukila cilo cu takumula. 26Ndeci ca kaile koloneke via Noha haico ci kala koloneke via Mõlomanu. 27Va lia lia, va nyua nyua, va likuela kuela, va kuelaisa, toke keteke Noha a wila vocimbaluku, kuenje etande lieya, lia va nyõla vosi. 28Haico ca kaile koloneke via Lote, va lia lia, va nyua nyua, va landa landa, va landaisa, va lima lima, va tunga tunga. 29Puãi keteke Lote a tunda vo Sodomo, kilu kua loka ondalu yofuofuo ndombela, yu ya va nyõla vosi. 30Haico ci kala keteke Mõlomanu a tukuluiwa. 31Keteke liaco, u o kasi kilu lionjo, kuenda ovikuata viaye vi kasi vonjo, ka ka loke oku vi upamo. Lu o kasi vepia haico, ka ka tiuke. 32Ivaluki ukãi wa Lote. 33Wosi o sanda oku popela omuenyo waye u takisa, puãi wosi o takisa omuenyo waye, eye u popela. 34Ndu sapuili siti, Kuteke waco vula umuamue mu kala omanu vavali, umue upiwamo, ukuavo o sialamo. 35Ku kala akãi vavali va fula pamuamue, umue upiwapo, ukuavo o sialapo. 36Vavali va kala vepia, umue upiwamo, ukuavo o siala. 37Kuenje vo pula vati, A Ñala, kupi? Eye wa va kumbulula hati, Oko kuli ocife haiko ku liongoluila olohokohoko.

Currently Selected:

LUKA 17: EMB63

Highlight

Copy