LUKA 18

1Wa va tela olusapo luoku va vetiya okuti ca va sesamela oku likutalaila ño-o, oku tokoka hacoko. 2Wa popia hati, Vimbo limue mua kala onganji ka ya sumbile Suku, haiyo ka ya sumbilile omanu. 3Vimbo liaco mua kalavo ocimbumba ceyaiya kokuaye, citi, Mopele kunyali wange. 4Oloneke vimue onganji yaco ka ya tavele, puãi noke ya popia lutima wayo, yiti, Ndaño sia sumbile Suku, pamue oku sumbila omanu, 5haimo, omo ocimbumba eci ci sakalaisa ño-o, oco ndi ci popela sanga ci ñavisa lokuiyaiya kuaco. 6Kuenje Ñala wa linga hati, Yevi eci ca popia onganji ka ya sungulukile. 7Suku hẽ, ka tetuluila lesunga vaye va noliwa, ava vo vilikaiya utanya luteke? O tutuvala ño-o oku va tetuluila lesunga? 8Mopia lene siti, O va tetuluila lombili. Haimo lumue, eci Mõlomanu eya, o sanga ekolelo kilu lieve?

9Wa telavo olusapo olu vamue va likolela ovo muẽle, vati, Tuakuesunga, kuenje va pembula vakuavo. Wa va tela hati, 10Alume vavali va lamanela konembele oku ka likutilila, umue u Fariseo, ukuavo ukuakutambula elisimu. 11U Fariseo wa talama, wa likutilila hati, A Suku, ndi ku pandula omo sia sokele lomanu vakuavo, olondiandia, ka va sungulukile, vakahonga, pamue ndeci u ukuakutambula elisimu. 12Ndi likandangaiya okulia luvali kosimanu, ndukuakulumba onepa yekui yovipako viange viosi. 13Puãi ukuakutambula elisimu wa talama okacinãla, ka petuile ovaso aye, puãi wa lipupola ponete kuenje wa likutilila hati, A Suku, ndinge ohenda, ame ndukuakandu. 14Ndu sapuili siti, Eye wa lokila tupu konjo yaye wa tendiwa ndukuesunga, ukuavo heyeko. Momo wosi o liamisa kunene amisua kutito, puãi u o liamisa kutito amisua kunene.

15Va kala loku u nenela otuñaña okuti o tu lamba. Eci olondonge via ci mola, via va lemẽla. 16Puãi Yesu oku va kovonga, wa linga hati, Otumãla tuiye kokuange, ko ka tu tutuiyi, momo usoma wa Suku wava va linga ndotu. 17Mopia lene siti, Ocili, wosi ka tambula usoma wa Suku ndokamõla ka iñilamo.

18Kuenje umue ukulu wo pula hati, Olongisi wa sunguluka, ndinga nye okuti ñuata omuenyo ko pui? 19Yesu wo kumbulula hati, Nye o nukuila huti, wa sunguluka? Lomue wa sunguluka te umuamue, okuti Suku lika. 20Wa kũlĩha ovihandeleko,— Ku ka pekelise, Ku ka ipaye, Ku ka ive, Ku ka imbe uvangi wuhembi, Sumba so la nyõho. 21Kuenje eye wa linga hati, Ovina evi viosi ndi vi lingainga tunde kutila wange. 22Eci Yesu a ci yeva, wa popia laye hati, Lopo pa ku kambela ocina cimosi. Kuende, ka landise cosi o kuete, ci avela olosuke, kuenje o kala lukuasi kilu, oco wiye, o ñuame. 23Puãi, eci a yeva ovina evi, wa sumua cimue, momo wa kala lovipako via lua. 24Yesu wo vanja kuenje wa linga hati, Ava va kasi lovipako via lua ca va tĩlila ca lua oku iñila vusoma wa Suku. 25Momo ongamelo oku pita venyulu lionguya ca leluka, ohuasi oku iñila vusoma wa Suku upange. 26Ava va ci yeva vati, Nda oco, helie o tẽla oku popeliwa? 27Puãi Yesu wa popia hati, Ovina ka vi tẽliwa lomanu vi tẽliwa la Suku 28Kuenje Petulu wa linga hati, Etu, etu tua sia cetu cosi kuenje tua ku kuama. 29Yesu wa popia lavo hati, Mopia lene locili siti, Ka kuli umue wa sila usoma wa Suku onjo, pamue ukãi, pamue vamanjaye, pamue olonjali, pamue omãla, 30okuti voluali lulo muẽle ka tambula eci ca velapo vali enene, kuenje komuenyo wiyako omuenyo ko pui.

31Kuenje wa enda kulika lekui liaco la vavali yu wa popia lavo hati, Kaliye, kua ca, tu lamanela ko Yerusalãi, kuenje ovina viosi ovaprofeto va sonehela Mõlomanu vi lingiwa. 32Momo o pakuiwa ku vakualofeka, o fuanguiwa, o valuiwa, kuenda o siyilua ovate. 33Vo tipula kuenje vo wipa, kuenje eteke liatatu o pinduka. 34Puãi pokati kolondaka evi layimue yimosi ya va lomboloka. Cosi ca popiwa ca va sitikilua. Ka va limbukile eci ca popiwa.

35Eci Yesu eya ocipepi lo ko Yeriko kua kala omeke yimue ya tumala konele yelila oku eya. 36Eci ya yeva owiñi wa vinjuka, ya pula yiti, Oco nye? 37Vo sapuila vati, Yesu u Nasara o kasi loku vinjuka. 38Oco wa vilikiya hati, A Yesu, a Mõla a Daviti, ndinge ohenda. 39Ava va pita kovaso vo lemela, vati, Uhãko. Puãi eye wa vilikiya vali ca lua hati, A Mõla a Daviti, ndinge ohenda. 40Oku talama, Yesu wa pañinya hati, U neneli. Eci eya ocipepi, Yesu wo pula hati, 41Nye o yongola okuti hu ci lingila? Kuenje eye hati, A Ñala, njongola okuti ndi letuluka. 42Kuenje Yesu wa popia laye hati, Letuluka. Ca ku kayisa ekolelo liove. 43Haico a letuluka kuenje wo kuama loku tumbangiya Suku. Kuenje omanu vosi, eci va ci mola, va sivaya Suku.

Currently Selected:

LUKA 18: EMB63

Highlight

Copy