LUKA 16

1Eye wa popiavo vali lolondonge viaye hati, Kua kala omunu umue ohuasi haeye wa kala la kalei, kuenje kalei kaco ka sapuiwa kokuaye okuti ka sandola ovikuata viaye. 2Yu wa ka kovonga, wa popia lako hati, Eci nda ku yevela ca lomboloka ndati? Eca okonda yukalei wove momo ku tẽla oku linga vali kalei. 3Kuenje kalei wa popia lutima waye hati, Omo ñala a kasi loku njupa ukalei, ndinga nye? Si kuete olohõlo vioku lima, okueya ku ndinga osõi. 4A-a-a, ndi ci eci ndinga okuti oco va nambula volonjo viavo eci nundisua kukalei wange. 5Oco wa pañinya olondevali via cime caye, omunu, omunu, yu wa popia lu wa tete, hati, Ciñami wa levala cime cange? 6Eye wa kumbulula hati, Nda levala ocita cololata viulela. Kuenje kalei wa popia laye hati, Tambula ukanda wove, tumala lombili, soneha akui atãlo. 7Wa pula ukuavo hati, Ove wa levala ciñami? Kuenje eye hati, Ame nda levala ocita colohumba viotiliku. Oco kalei wa popia laye hati, Tambula ukanda wove, soneha akui ecelãla. 8Kuenje cime caco wa sivayaila kalei ka sungulukile okulunguka kuaye, momo omãla voluali lulo va velapo oku sokolola ocitumbulukila cavo, omãla vocinyi va sule. 9Kuenje ndu lunguli siti, Talavayi lukuasi wa vĩha oku limuisa ava vo soli okuti eci ukuasi u taka vo tambuli volonjo ka vi pui.

10U o linga esunga leci citito, eye o linga esunga leci ca lua, puãi u ka lingi esunga leci citito, eye ka lingi esunga leci ca lua. 11Oco, nda ka wa lingili esunga lukuasi wa vĩha helie u kundikili ukuasi wocili? 12Nda ka wa lingili esunga leci camale, elie o wihi eci cene? 13Lomue ukuenje o tẽla oku vumba vacime vavali, momo pamue ukuavo u suvuka, lukuavo u sola; pamue ukuavo u sumba lukuavo u tomba. Ko tẽla oku vumba Suku kuenda ukuasi.

14Va Fariseo, haivo vakuakusola olombongo, va yeva ovina evi viosi kuenje vo pembula. 15Puãi eye wa popia lavo hati, Ene vu liyowisila kovaso omanu, puãi Suku wa kũlĩha ovitima viene. Momo eci ca sivayiwa lomanu, oco ku Suku ca linga umbondo.

16Ovihandeleko lovaprofeto va kala toke ku Yoano. Tunde apa, ondaka yiwa yusoma wa Suku ya kundiwa, kuenje vosi va lisindiliyilamo. 17Ca leluka ilu losi oku takata, okatosi kamuamue kovihandeleko oku imuha oco ca tĩla.

18U o nyala ukãi waye kuenje o kuela ukuavo o linga ukahonga, lu o kuela ukãi wa nyaliwa la veyaye, layevo o linga ukahonga.

19Kua kala omunu umue ohuasi, wa wala wala ohusu lovalatanya, oloneke viosi wa lia lia elau. 20Pombundi yaye eteke keteke pa pekayala ongeyi yimue ye yuka apute, onduko yayo Lasaru. 21Lasaru wa livela oku likutisa olosĩsi via loluka komesa yohuasi. Ndaño olombua vieyaiya, via lesa apute aye. 22Oco ongeyi ya fa, kuenje ovangelo va yi tuala ponete ya Avirahama. Ohuasi ya favo, kuenje va yi kenda. 23Eci ohuasi ya kala loku yambuka vonjembo, ya petula ovaso ayo, kuenje ya muila Avirahama ocipãla, kuenda Lasaru yo vonete yaye. 24Oco ohuasi ya vilikiya yiti, A tate Avirahama, va ndinge ohenda oku tuma Lasaru, a yave osungu yomuine waye vovava, oco a polise elimi liange, momo nda yambuka vulienge ulo. 25Puãi Avirahama wa linga hati, Amolange, ivaluka okuti, cina wa kala lomuenyo, ove wa kala lovina viove viwa, osimbu Lasaru a tala ohali. Cilo puãi, kulo, eye o lembelekiwa osimbu ove o kasi kohali. 26Kuenda vali, pokati ketu lene pa pindika ekungu linene okuti ava va yongola oku yokila kokuene ka va ci tẽla, haico vokesinya liene, lomue o tẽla oku yokila kulo. 27Oco ohuasi ya popia yiti, Nda oco, a tate, hu pinga okuti u tuma konjo ya tate. 28Momo ñasi la vamanjange vatãlo, oco a va imbe onumbi, sanga veyavo mulo veyambulo lilo. 29Puãi Avirahama wa linga hati, Va kuete Mose lovaprofeto, va va yeve. 30Kuenje ohuasi ya popia yiti, Hacoko a tate Avirahama, puãi te nda umue o tunda kovilangu kuenje enda kokuavo oco va likekembela akandu avo. 31Avirahama wa kumbulula ohuasi, hati, Nda ka va yevi Mose lovaprofeto ka va yevi muẽle ndaño umue o pinduka kovilangu.

Currently Selected:

LUKA 16: EMB63

Highlight

Copy