LUKA 15

1Ca kala okuti vakuakutambula elisimu, la vakuakandu, ovo va kala loku kokela kokuaye oku u yevelela. 2Va Fariseo la vakuavisonehua va ci ñuñuila, vati, Omunu u o linala lolondingakandu, kuenda o lia kumue lavo.

3Oco Yesu wa va tela olusapo olu, hati, 4Pokati kene hẽ, nda umue o kuete ocita colomeme, kuenje nda o nyelisapo yimue, ka si hẽ, akui ecea lecea kolomeme vekalasoko ha endi oku ka vanjiliya eyi ya nyelela toke a yi sanga? 5Kuenje eci a yi sanga o yi imba kapepe lonjolela. 6Kuenje eci eya kimbo, ongolola vakuavo lava a lisungue lavo, o popia lavo hati, Njolelisiko, omo nda sanga omeme yange ya nyelile. 7Mopia lene siti, Haico kilu va yolela ca lua ukuakandu umuamue o likekembela akandu aye, akui ecea lecea komanu vakuesunga ka va sukila oku likekembela akandu, ci sule.

8Pamue ukãi upi, nda o kuete ekui liolopalata, kuenje o nyelisa opalata yimuamue, ka miha ondiyelo loku komba vonjo oku yi sandiliya lutate toke a yi sanga? 9Kuenje eci a yi sanga, ongolola vakuavo lava a lisungue lavo, o popia lavo hati, Njolelisiko, omo nda sanga opalata yange nda nyelisile. 10Mopia lene siti, Haico pokati kovangelo va Suku pa kala onjolela eci ukuakandu umuamue a likekembela akandu aye.

11Eye wa popia vali hati, Omunu umue wa kala lomãla vaye vavali valume. 12Umalehe waco wa popia la isiaye hati, A tate, kovipako viove nepeleko onepa yange. Yu wa va tepela ipako viaye. 13Kovaso yoloneke ka via luile, umalehe wa kongela cosi caye, yu wa enda kofeka kupãla, oko a sandowaila ovipako viaye viosi loku mamayala. 14Eci a pesela cosi, oco vofeka yaco mueya onjala ya lua, kuenje eye wa fetika oku suka. 15Oco wa enda, wa litumbika kumue ukuafeka yaco, yu wo tuma vovapia aye oku lisa olongulu. 16Kuenje eye wa livela oku kutisa imo liaye lovingangu via lia lia olongulu, kuenje lomue wa wiha cimue. 17Eci mueya olondunge, wa linga hati, Avoyo! oku sokolola vakuopange wa tate! Va kuete okulia ku va tẽla, kuenda ku supoka, osimbu ame fila kulo lonjala! 18Ñatuka, ngenda ku tate, ha popia laye siti, A tate, nda lingila ilu ekandu kuenda ove. 19Si sesamela oku tukuiwa vali omõlove, ndingise ño ndukuopange wove ukuanganyu. 20Kuenje wa katuka, wa enda ku isiaye. Puãi osimbu a kasi handi kupala, isiaye wo mola, kuenje wo kuatela ohenda, wa lupuka, wo limbila posingo, yu wo sipula. 21Omõlaco wa popia laye hati, A tate, nda lingila ilu ekandu kuenda ove. Si sesamela oku tukuiwa vali omõlove. 22Puãi isiaye wa popia lakuenje vaye hati, Yayuliko, kopi uwalo wa velapo, u walisi. Fuomehi onẽla komuine waye. U walisi olohaku kolomãi. 23Kopi okangombe ka netisua, ka ipayi, tu li, tu sanjuki. 24Momo omõlange u wa file, yu o kasi vali lomuenyo, wa nyelile yu wa sangiwa. Oco va fetika oku sanjuka.

25Omõlaye ukulu puãi wa kala vepia. Eci eya, oku pitila ocipepi lonjo, oco wa yeva oku sika loku cĩla. 26Yu wa kovonga ukuenje umue, wo pula hati, Oco hẽ, nye? 27Kuenje eye wo sapuila hati, Manjove weya, so wa ipaya okangombe ka netisua, momo wo tambula vali o ñuai. 28Puãi eye wa tema kuenje ka tavele oku iñila. Oco isiaye wa tunda oku u livondela. 29Eye puãi, oku kumbulula, wa popia la isiaye hati, Tala, anyamo a lua nda ku vumba, sia samele ocihandeleko cove, ndaño naito, haimo kua la nyiha cimue, ndaño okahombo okuti ndingila akamba vange ofesta. 30Puãi u omõlove wa lia ukuasi wove la vakahonga, eci eya, wo wipaila okangombe ka netisiwa. 31Isiaye wo kumbulula, hati, Amõlange, ove o kasi ño-o hũ lame, kuenje cosi cange cove. 32Ca tu sesamela oku sanjuka loku yolela momo u, manjove, wa file, yu o kasi vali lomuenyo, wa nyelile, yu wa sangiwa.

Currently Selected:

LUKA 15: EMB63

Highlight

Copy