LUKA 14

1Kesambata limue, eci a enda kokulia vonjo yumue ukulu wa va Fariseo, oco va kala loku u lavulula. 2Kuenje kovaso yaye kua kala omunu ukuangunge. 3Yesu wa pula alongisi vovihandeleko la va Fariseo, hati, Ci tava oku sakula kesambata ale, ele ka ci tava? 4Ovo puãi voha ño. Oco Yesu, oku u kuata, wo sakula, kuenje wo weca. 5Yu wa va pula, hati, Pokati kene he, helie okuti ocimbulu caye, pamue ongombe, ya fa vocisimo keteke liesambata, ka yupimo? 6Kuenje ka va tẽlele oku u kumbulula vali epulilo liaco.

7Eci a mola ndeci va kala oku nola olomangu via velapo, oco wa tela ava va lalekiwa olusapo, hati, 8Eci umue a ku laleka kuvala, ku ka tumale komangu ya velapo, sanga muẽle wa laleka umue wa ku velapo, 9kuenje u wa ku laleka iya laye, yu o popia love hati, Wihako omangu, oco ove o fetika oku tumala komangu yi sule losõi. 10Puãi, eci o lalekiwa, kuende, ka tumale komangu ya sulako, okuti, eci u wa ku laleka eya, o popia love hati, Okuetu, ndo tumale komangu ya velapo. Eci a popia ndomo, oco ove o mola ulamba kovaso a vosi va tumala love kokulia. 11Momo u o liamisa kunene, amisua kutito, lu o liamisa kutito amisua kunene.

12Wa popiavo lomunu wo laleka hati, Eci o linga ondalelo pamue ofesta, ku ka laleke akamba vove, pamue vamanjove, pamue vangandiove, pamue olohuasi vi lisungue love, sanga va ku lalekavo, kuenje o mola oniuwile. 13Puãi, eci o linga ofesta, laleka olosuke, lovinimbale, lovilema, lolomeke, 14kuenje o sumũlũisua, momo ka va kuete eci va ku tiuwila. Oniuwile yove yiya kepinduko lia vakuesunga.

15Umue wava va tumala kokulia kumue laye, eci a yeva ovina evi, wa popia laye hati, U o lila ombolo vusoma wa Suku wa sumũlũha. 16Puãi Yesu wa popia laye hati, Omunu umue wa linga ofesta yinene, kuenje wa laleka va lua. 17Kekumbi liokulia, wa tuma ukuenje waye oku pañinya ava va lalekiwa, hati, Veye, momo ovina viosi via sokiyiwa ale. 18Puãi vosi yavo, lutima umuamue, va fetika oku nyemala. Wa tete hati, Hu pinga, ka livondele okuti va ngecela, momo nda landa epia, kuenje ngenda, ha li vanja. 19Kuenje ukuavo hati, Hu pinga, ka livondele okuti va ngecela, momo nda landa olokanga vitãlo violongombe, kuenje ngenda ha vi seteka. 20Ukuavo hati, Nda kuela, oco si tẽla oku iya. 21Oco ukuenje wa tiukila, wa ci sapuila cime caye. Oco muẽleonjo wa tema, kuenje wa popia lukuenje waye hati, Yayulako, kuende kovila lovolokololo vimbo, kopilemo olosuke, lovinimbale, lolomeke, lovilema. 22Kuenje ukuenje waco hati, A Ñala, eci wa handeleka ca lingiwa, haimo mua kamba. 23Yu ñala yaco wa popia lukuenje hati, Kuende kolonjila lo kolongumbu, pangisa omanu oku iñila, oco onjo yange yi yuke. 24Momo hu sapuila okuti, pokati kava nda lalekele lomue o maha kokulia kuange.

25Kotembo yaco omanu va lua va kala loku u kuama kuama. Oco eye wa va Pongolokela, wa popia lavo hati, 26Nda umue iya kokuange, kuenje ka suvuka isiaye, la inaye, lukãi waye, lomãla vaye, la vamanjaye valume, la vamanjaye vakãi, oco muẽle, ndaño omuenyo waye muẽle, eye ka tẽla oku linga ondonge yange. 27U ka ambata ekulusu liaye ha ñuama, eye ka tẽla oku linga ondonge yange. 28Helie pokati kene, nda o yongola oku tunga ombonge, ka tumala tete oku tenda epese liaco, nda hẽ o kuete coku yi malusula? 29Nda hacoko, eci a seveta ociseveto kuenje ka tẽla oku yi malusula, vosi va ci mola va fetika oku u fuanguila, vati. 30Omunu u wa fetika oku tunga, kuenje ka tẽlele oku malusula. 31Pamue vali, osoma yi pi, nda yenda kovita oku yaka losoma yikuavo, ka yi tumala oku kũlĩhisa nda he yi tẽla lekui liolohũlũkãi oku liyaka la yikuavo yu wiyilila lakui avali kolohũlũkãi? 32Nda ka ci tẽla, oco, eci yikuavo yi kasi handi kupãla, o yi tumisa olomunga oku livondela. 33Haico lene, wosi ka si ovikuata viaye viosi ka tẽla oku linga ondonge yange.

34Ocili omongua uwa, puãi nda omongua wa sava vu savulula le? 35Ko silivila koku singa ndaño koku linga ombolela, omanu vo winasi ño. U o kasi lovatui oku yeva, a yeve.

Currently Selected:

LUKA 14: EMB63

Highlight

Copy