LUKA 11

1Yesu wa kala kumue loku likutilila, kuenje eci a mala, yimue polondonge viaye ya popia laye yiti, A Ñala, tu longise oku likutilila ndeci Yoano a longisa olondonge viaye. 2Yu wa popia lavo hati, Eci vu likutilila lingi hoti,

A Tate, onduko yove yi sumbiwe. Usoma wove wiye. 3Eteke keteke tu ihe okulia kuaco. 4Tu ecele akandu etu, momo eta muẽle tu ecela vosi va tu kuetele olondaka. Kuenje ku ka tu songuile veyonjo.

5Kuenje wa popia lavo hati, Nda umue pokati kene o kuete ekamba kuenje enda kokuaye vokati kuteke oku popia laye, hati, Akamba, ngundike olombolo vitatu, 6momo ekamba liange wa enda ungende, weya konjo yetu, ame puãi si kuete eci ndu poka. 7Eye puãi o kumbuluila vokati hati, Ku ka nduahalise. Epito lia yikiwa, kuenda omãla vange vava kumue lame vula, oco si ci tẽla oku pasuka si ku iha. 8Mopia lene siti, Ndaño ka pasuka oku wiha omo ekamba liaye, haimo o pasukila olupili luaye ha wiha viosi a suka. 9Kuenje mopia lene siti, Pingi kuenje cu wihiwi, vanjiliyi kuenje vu sanga, totoli, kuenje vo yikuluili. 10Momo wosi o pinga, o tambula; u o vanjiliya, o sanga; u o totola, vo yikuluila. 11Pokati kene isia yi pi o kasi lomõla, nda u pinga olusi o wiha onyõha, olusi haluoko? 12Pamue nda o pinga esaila, o wiha enyenya? 13Oco nda ene wa tuwi ale oku linga cĩvi, wa kũlĩhi oku eca oviali viwa komãla vene, Isiene ukuailu he, ka velipo oku avela Espiritu Sandu kuava vo pinga?

14Yesu wa kala loku tundisa ocilũlu cutende. Eci ocilũlu ca tunda, oco ocitende ca popia, kuenje omanu va komoha. 15Puãi vamue vati, O tundaisa ovilũlu lunene wa Belesevulu, osoma yovilũlu. 16Puãi vakuavo oku u seteka, vo pinga ondimbukiso yokilu. 17Puãi eye, omo a kũlĩha ovisimilo viavo, wa popia lavo hati, Ofeka nda yi litepa yi nyõleha kuenje onjo yi wila konjo yikuavo. 18Satana nda wa litepa, usoma waye u tumala ndati? Momo vu linga hoti, O tundaisa ovilũlu lunene wa Belesevulu. 19Puãi ame, nda nundisa ovilũlu lunene wa Belesevulu, omãla vene hẽ, va vi tundaisa lunene welie? Oco, ovo va linga olonetululi viene. 20Puãi nda nundaisa ovilũlu lumuine wa Suku, usoma wa Suku nda weya ale kokuene. 21Ocindululu ca maleha, nda ci lava onjo yaco muẽle, oco ovikuata viaco vi kala lombembua. 22Puãi nda ocindululu co velapo kongusu ciya, ci ci yula, ci ci punda ovimaleho viaco viosi ca kolelele, kuenje ci amula ovikuata viaye. 23U ka kasi lame o matãla, kuenje u ka kongela kumue lame o sandola.

24Eci ocilũlu ca vĩha ca tunda vomunu ci tungayala vakango omo ka muli ovava, oku sanda epuyuko, kuenje eci ka ci li sangi, oco ci popia citi, Niukila vonjo yange omo nda tunda. 25Eci ciya ci sanga onjo yaye upolokoso, ya kombiwa kuenda ya yanguiwa. 26Oco'cenda, ci kopilila ovilũlu vikuavo epanduvali via vĩha ca lua, oco omẽle ci sule, kuenje oku iñila vi tungamo. Oco esulilo liomunu waco lĩvi, ndeci a kaile hise.

27Osimbu a kala loku popia ovina evi, ukãi umue vowiñi wa popia laye lolukandi hati, Imo lia ku cita lia sumũlũha, ndaño avele wa nyama laovo a sumũlũha. 28Yesu puãi wa kumbulula hati, Oco muẽle, puãi ava va yeva ondaka ya Suku kuenje va yi pokola ovo va sumũlũha ca velapo.

29Osimbu omanu va kala loku ongoloka, eye wa fetika oku popia, hati, Ocitumbulukila eci ocitumbulukila ca vĩha ci sanga ondimbukiso, kuenje ka cihiwa ondimbukiso te eyi ya Yona. 30Momo ndeci Yona a linga ondimbukiso ku va Ninivei, haico Mõlomanu a linga ondimbukiso kocitumbulukila cilo. 31Nasoma yo ko Sul o pindukila kekanga kumue lalume vocitumbulukila cilo, kuenje o va pisa. Momo wa tunda kesulilo lioluali oku iya oku yeva olondunge via Salomone, kuenje tala, kulo kuli u wa velapo, okuti Salomone o sule. 32Alume va Ninivei va pindukila kekanga kumue locitumbulukila cilo, kuenje va ci pisa momo ovo va likekembela akandu poku yeva ohundo ya Yona, kuenje tala, kulo kuli umue wa velapo okuti Yona o sule.

33Lomue, eci a miha ondiyelo, o yi kapa velungi pamue vemi lionjongo, te komesa, okuti ava va iñila va mola ocinyi. 34Iso liove olio ondiyelo yetimba liove. Eci iso liove li kasi luhayele oco etimba liove liosi li kasi locinyi. Puãi, eci iso liove ka li kasi luhayele, oco etimba liove li kasi lowelema. 35Oco lunguka, sanga mbi ocinyi covokati kove ci linga owelema. 36Oco, nda etimba liove liosi li kasi locinyi, okuti lapamue pali owelema, vetimba liosi mu tuila ocinyi, ndeci ci kasi eci ondiyelo yi ku tuila ocinyi lokutaima kuayo.

37Eci a kala loku vangula, u Fariseo umue wo laleka oku lia laye ongau. Oco wa iñila kuenje wa tumala komesa. 38Kuenje u Fariseo, eci a mola okuti ka liyelisile osimbu ka lile ongau, wa komoha. 39Kuenje Ñala wa popia laye hati, Ene a va Fariseo, vu yelisa ño koñoño yonganja leyi yelonga. Puãi vokati kene mue yuka ocipululu levĩho. 40Waveke! Usovoli woñoño heyeko wa sovolavo okati? 41Ca velapo, yelisi tete vokati. Kovaso yaco ovina viosi vi yela kokuene.

42A va Fariseo, ngongo yene! Momo vu tepa tepa onepa yekui kocimbumba lo kocelo lo kovikũla viosi vitito, kuenje vu lomboka esunga locisola ca Suku. Evi viesunga locisola ovio vio sesameli oku linga, kuenje ka vi tateka oku suisapo vikuavo. 43A va Fariseo, ngongo yene, momo vu sole olomangu vio kovaso volosunangonga, kuenda ovilamo viovovitanda. 44Ngongo yene muẽle, momo wa soki ndayambo ka a moleha, kuenje omanu va pitako ka va ci.

45Ulongisi umue wovihandeleko wo kumbulula hati, Olongisi, oku popia ovina evi, o tu popiavo? 46Yesu wa linga hati, Alongisi vovihandeleko, lenevo, ngongo yene, momo vu tuika omanu ovitele viovinjangatela, kuenje ene ko lambi ovitele viaco lomuine umue wene. 47Ngongo yene, momo ovaprofeto vana vaisiene va ipa ene vu va tungila olosonje. 48Oco wa lingi olombangi kuenje wa tavi okuti ovilinga via vaisiene viesunga, momo ovo va va ipa kuenje ene vu va tungila olosonje. 49Oco olondunge via Suku via popela viti, Numa kokuavo ovaprofeto lovapostolo, kuenje vamue, va va ipa, vamue, va va kangisa. 50Via ci popela okuti oco osonde yovaprofeto yosi, yina ya peseka tunde koku lulika oluali, yi fetuluinyilua ocitumbulukila cilo, 51tunde kosonde ya Abel toke kosonde ya Sakariya, u wa ipailua pokati kutala lonembele. Ocili muẽle, mopia lene siti, Yi fetuluinyilua ocitumbulukila cilo. 52A vakuavisonehua, ngongo yene, momo wopi osapi yukũlĩhiso. Ka wa iñilili ene muẽle, kuenje wa tateki ava va soka oku iñila.

53Kuenje eci a tundako, oco vakuavisonehua la va Fariseo va fetika oku u sinda ca lua loku u kongiliya okuti o popia ovina via lua, 54ha vo lavulula oku u kuata londaka yimue yi tunda vomẽla waye.

Currently Selected:

LUKA 11: EMB63

Highlight

Copy