LUKA 10

1Oco kovaso yovina evi Ñala wa nola vali akui epanduvali komanu, kuenje wa va tuma vavali, vavali, okuti vo pitila kovaso oku enda kovaimbo osi lo kolofeka viosi oko a soka oku pita eye muẽle. 2Kuenje wa popia lavo hati, Oku ungula kua lua, puãi olondingupange viñamiñami. Oco, pingi ku Ñala yoku ungula oco a tume olondingupange koku ungula kuaye. 3Kuendi. Ñasi loku vu tuma ndolomeme pokati kolombinji. 4Ko ka ambati ocipete, ndaño opatolonya, ndaño olohaku. Ko ka pasuisi umue kungende wene. 5Nda wiñili vonjo oku singamo, tete popi hoti, Ombembua yi kale lonjo yilo. 6Nda u o kasimo o sole ombembua, ombembua yene yi kala laye, puãi nda ka yi sole yi kondoka kokuene. 7Vonjo yaco vu singa li loku nyua ovina vo wihi, momo ondingupange ya sesamela onima yayo. Ko ka sondayali kolonjo. 8Olonjanja viosi eci wiñili vimbo limue kuenje vo hindikisi, li ovina vo poki. 9Sakuli olombei vi kasimo. Popi lavo hoti, Usoma wa Suku weya ocipepi lene. 10Puãi, olonjanja viosi eci wiñili vimbo limue kuenje ka vo hindikisi, tundili valuwa imbo liaco, kuenje popi hoti, 11Ndaño oneketela yimbo liene yi lamelelela kolomãi vietu, tu yi puenyelako, haimo limbuki eci okuti, Usoma wa Suku weya ocipepi lene. 12Puãi mopia lene siti, Keteke liekanga, Sodomo hise limbo liaco.

13A Horasene, ngongo yove. A Betesaita, ngongo yove, momo ovonene a lingilua vokati kene nda a lingiwilile vo Turo lo vo Sidono, nda va likekembela akandu avo osimbu, loku wala ikẽleyi kuenda oku tumala vetiko. 14Kekanga, Turo la Sidono hise lene. 15Lovevo, a Kafarinau, o liamisa kilu? O lokila vonjembo.

16U o vu yeva o njeva ame, lu o vu likala o liñala ame, lu o liñala ame o likala u wa numa.

17Akui epanduvali aco a tiuka lonjolela, vati, A Ñala, ndaño ovilũlu via pokola kokuetu vonduko yove. 18Eye wa popia lavo hati, Nda mola Satana wa loka kilu ndociliakulo. 19Kũlĩhi okuti ndo wihi unene woku kosa olonyoha lanyenya, lowu woku nyõla ongusu yosi yunyali. Lacimue cu lingi lãvi. 20Haimo lumue, ko ka yoleli omo ovilũlu via pokola kokuene, yoleli puãi omo olonduko viene via sonehiwa vilu.

21Kola yaco Yesu we yukililua lesanju li'Espiritu Sandu, wa popia hati, Pandu, pandu kokuove, a Tate, a Ñala yokilu loposi, omo wa sitikila ovina evi kolonoño kuenda ku vakualondunge, kuenje wa vi situluila koloñaña. Ocili, a Tate, wa ci linga omo oco ca ku sungulukila. 22Ovina viosi via ñundikiwa la Tate. Lomue wa kũlĩha Omõla te Isiaco, kuenje lomue wa kũlĩha Isia, te Omõlaco, kuenda u Omõlaco a panga oku u situluila.

23Oco, oku pongolokela lika kolondonge, wa popia lavio hati, Ovaso a lete eci ene vu lete a sumũlũha. 24Momo mopia lene siti, Ovaprofeto va lua lolosoma va yonguile oku mola eci ene vu lete, kuenje ka va ci muile, va yonguile oku yeva eci ene vu yevite kuenje ka va ci yevele.

25Kuenje ulongisi umue wovihandeleko wa votoka oku u seteka, wo pula hati, Olongisi, ndinga nye okuti ñuata omuenyo ko pui? 26Yesu wo kumbulula, wo pula hati, Vovihandeleko he, mua sonehiwa nye? O tangamo ndati? 27Eye wa kumbulula hati. Sola Yehova Suku yove lutima wove wosi, lomuenyo wove wosi, lolohõlo viove viosi, lolondunge viove viosi, kuenda vali, sola u o lisungue love ndeci o lisole ove muẽle. 28Kuenje Yesu wa popia laye hati, Wa kumbulula ciwa. Ci linga, kuenje o kuata omuenyo.

29Puãi eye, omo a yongola oku liyowisa wa popia la Yesu hati, U o lisungue lame helie? 30Yesu wa kumbulula hati, Omunu umue wa tunda ko Yerusalãi kuenje wa kala loku lokila ko Yeriko, yu wa sikila peka liovingumba, vio lula, vio tota olombole, kuenje oku tunda, vio sia lokamuenyo kimbanda. 31Oco ca veta ño okuti ocitunda cimue ca kala loku lokilavo konjila yaco, kuenje eci co mola co pitahala ombamba. 32Lu Lewi umue le, haico a linga eci a keya kuenje wo mola wo pitahala ombamba. 33Puãi u Samária umue wa kala kungende kuenje weya oko a kasi, yu, eci o mola, wo kuatela ohenda. 34Oco wa kokela kokuaye, kuenje wa kuta apute aye oku itilako ulela lovinyu, loku u kapa kocimbulu caye, wo tuala konjo yolongende yu wo tata. 35Hẽla yaco wa pola olosingu vivali, yu wa vi eca ku muẽleonjo, hati, U tata, la cosi o pesela vali, eci njiya vali, hu ci tiuwila. 36Pokati kava vatatu, wa soka huti, Wa linga ndu a lisungue luna wa tokeka lovingumba, helie? 37Kuenje eye hati, Yu wo linga ohenda. Yesu wa popia laye hati, Kuende, lovevo ka lingainge ndoco.

38Oco, eci va amako kungende wavo Yesu wa iñila vimbo limue, kuenje ukãi umue, onduko yaye Marta, wo laleka vonjo yaye. 39Marta wa kala lumue manjaye, onduko yaye Maria, eye wa tumala polomãi via Ñala oku yeva olondaka viaye. 40Puãi Marta wa sakalala lokupoka kua lua, yu weya hati, A Ñala, ka cu ku lingi cimue pua omo manjange a sia lika liange oku poka? U pañinya, a ñuatiseko. 41Puãi Ñala wo kumbulula hati, A Marta, a Marta, o kasi lohele ya lua, kuenje wa tokotelua lovina via lua. 42Cimuamue lika ci sukiliwa. Maria wa nolapo eci ca velapo kuenje ka cu nyehiwa.

Currently Selected:

LUKA 10: EMB63

Highlight

Copy