LUKA 12

1Osimbu a kala loku popia olohũlũkãi viomanu viongoloka okuti owiñi waco wa liliataila. Oco Yesu wa fetika oku popia tete lolondonge viaye, hati, Lunguki letumbisa lia va Fariseo, olio ombambe. 2Momo ka kuli eci ca tuvikiwa okuti ka ci tuvuka, ka kuli eci ca yombekiwa okuti ka ci kũlĩhiwa. 3Cosi wa popeli vowelema ci yevala kutanya. Eci wa popeli volohondo vio vokati, oku ci loñuila vovatui, ci kalukilua kilu lionjo.

4Akamba vange, mopia lene siti, Ko ka kuateli usumba ava okuti, eci va ipa etimba, noke ka va tẽla vali oku linga cimue. 5Puãi ndu wilikili u wa sesameli oku u kuatela usumba. Kuateli usumba u okuti, eci a ipa, o tẽla oku imba vonjembo. Oco muẽle, mopia lene siti, U u kuateli usumba. 6Olongungu vitãlo hẽ, ka vi landisua olosendu vivali? Kuenje layimue yavio yi ivaliwa kovaso a Suku. 7Puãi ndaño esinga liovovitue viene lia tendiwa liosi. Ko ka kali lusumba. Ene wa velipo okuti olongungu via lua vi sule.

8Mopia lene siti, U o linukuila kovaso omanu, haeye Mõlomanu u litukuilavo kovaso ovangelo va Suku, 9Puãi u o liñalela kovaso omanu, haeye o likalelua kovaso ovangelo va Suku. 10Wosi o lundila Mõlomanu cimue cu wecelua, puãi wosi o popia Espiritu Sandu etonãi, ka cu wecelua. 11Eci vo tuali volosunangonga, pamue kovaso olosoma lo kovaso olombiali, ko ka kali lohele yeci vu kumbulula pamue yeci vu popia, 12momo kola yaco muẽle Espiritu Sandu u longisi eci co sesameli oku popia.

13Umue vowiñi wa popia la Yesu hati, Olongisi, va popie la huvange okuti o nepelako kocipiñalo. 14Puãi Yesu wo kumbulula hati, Amunu, helie wo nukuili onganji pamue onepisi? 15Kuenje wa popia lavo hati, Lunguki kuenda liuviki kocipululu cosi, momo omunu, ndaño ohuasi enene, haimo omuenyo waye ko fukile. 16Yu wa va tela olusapo, hati, Ovapia ohuasi yimue a ima ca lua. 17Kuenje wa likunda lutima waye, hati, Ndinga nye, momo si kuete omo ngunguila olomema viange? 18Oco wa popia hati, Eci ndinga ceci, nungulula olosila viange oco nunga vimue vinene vali, kuenje omo soleka olomema viange viosi lovikuata viange. 19Oco mopia lutima wange siti, Otima, o kuete ovikuata via lua via solekelua anyamo a lua, livala, lia, nyua, sanjuka. 20Puãi Suku wa popia laye hati, Vuveke, uteke ulo va ku upa omuenyo wove, oco evi wa vi pongiya hẽ, vi linga vielie? 21Haico ci kala lu o lisiliyila ukuasi puãi ka kuete ukuasi wa Suku.

22Kuenje wa popia lolondonge viaye hati, Oco, mopia lene siti, Ko ka kali lohele yomuenyo wene, hoti, Tu lia nye? ndaño yetimba liene hoti, Tu wala nye? 23Momo omuenyo wa velapo, okulia ku sule, kuenda etimba lia velapo, uwalo u sule. 24Sokololi ovikuamanga okuti, ka vimbi ombuto, ka vi ungola, ka vi kuete atambo, pamue osila, haimo Suku o vi tekola. Ene hẽ, ka wa velelipo ca lua okuti olonjila vi sule? 25Helie pokati kene o tẽla oku vokiya ukeya kutunga waye omo u kuetele ohele. 26Nda oco ci kasi okuti, ko tẽla oku linga ndaño eci citito, nye vu kuatela vikuavo ohele? 27Sokololi oloneleho, ndeci vi kula, ka vi lingi upange, ka vi poti, haimo mopia lene siti, Ndaño Salomone vulamba waye wosi ka walele uwalo wa posoka nda yimue yevi. 28Puãi Suku, nda o walisa ndoco onjunde yi kasi etaili vusenge kuenda hẽla yimbiwa vofolono, a vakuakolelo lititotito, ene hẽ, ko walisa hẽ ca velapo? 29Ko ka tatayali hoti, Tu lia nye, tu nyua nye? Ko ka kali lutima wa sakalala. 30Momo vakualofeka va sanda sanda ovina evi, ene puãi Isiene wa kũlĩha okuti vio sesameli. 31Sandi puãi Usoma wa Suku, kuenje ovina evi viosi viu vokiyiwi.

32Akacunda, ku ka kuate usumba, momo Isiene wa panga oku wihi usoma. 33Landisi evi vu kasi lavio. Ecaeci kolosuke. Litungili ovipete ka vi vuli. Kali lukuasi ko pui kilu oko ocimunu ka ci pitila ndaño ombunji ka yi nyõli. 34Momo oko ku kasi ukuasi wene, haiko ku kalavo utima wene.

35Iñi pimo, kuenda olondiyelo viene vi taime. 36Lingi ndomanu va lavoka ñala yavo oku tiuka kuvala, okuti, tuli iya kuenje o totola, haico vo yikuluila. 37Akuenje va sumũlũha vava okuti, eci cime cavo iya o va sanga ka va pekelele. Mopia lene siti, Ocili, eye muẽle iña pimo, o va tumalisa komesa, kuenje o linga ndukuenje wavo. 38Nda iya kocipo cavali, pamue catatu, kuenje o va sanga ndoco, akuenje vaco va sumũlũha muẽle. 39Puãi limbuki eci okuti, muẽleonjo, nda wa kũlĩhile ola yokuiya kuocimunu, nda wa lavuluile, kuenje nda ka sile okuti onjo yaye va yi tuiyila. 40Oco ene, liangiliyi. Momo Mõlomanu iya kola ka wa simili.

41Petulu wo pula hati, A Ñala, etu wa tu tela olusapo olu ale, ele wa lu tela vosi? 42Kuenje Ñala wa linga hati, Helie kalei kaco ka kolelua, haiko ka lunguka, okuti ñala yako yi ka tukuila vakuanjo yaye oku va iha ongaso yavo keteke liaco? 43Ukuenje okuti, cime caye u sanga ndoco eci eya, eye wa sumũlũha. 44Mopia lene siti, Ocili o-o u kundika ovikuata viosi a kuete. 45Puãi nda ukuenje waco o litana lutima waye hati, Cime cange keya ndopo, kuenje o fetika oku veta akuenje lafeko kuenda oku lia loku nyua kuenda oku kolua, 46cime cukuenje waco iya keteke ko lavokaile, kuenda kola ka kũlĩhile, kuenje u yambula ca piãla, loku u kapa kumue lava ka va sungulukile. 47Kuenje ukuenje wa kũlĩha ocipango ca cime caye, puãi ko pongiyilile, kuenje ka lingile ndeci cime caye a yongola, eye o tipuiwa ca lua. 48Puãi u ka ci kũlĩhile, kuenje wa linga evi via sesamela eyambulo, eye o tipuiwa ci sule. Wosi ihiwa ca lua, eye o kisikiwa ca lua. U wa kundikiwa ca lua, eye va pilika ca lua.

49Ndeyilila oku imba ondalu kilu lieve. Nda livela nda ya mihiwile ale! 50Kuli epapatiso okuti ndi papatisiwa lalio kuenda nda sakalala nye toke li telisua! 51Wa soki okuti ndeya oku nena ombembua kilu lieve? Mopia lene siti, Ombembua hayoko te olonepele. 52Momo tunde opo, vonjo yimuamue, nda mu kala vatãlo, va litepa, vatatu va liwengula la vavali, vavali va liwengula la vatatu. 53Oco va litepa, isia o liwengula lomõlaye ulume, lomõla ulume o liwengula la isiaye; ina o liwengula lomõlaye ukãi, lomõla ukãi o liwengula la inaye; ukãi o liwengula lukãi womõlaye, ndatembo yaco o liwengula la ina ya veyaye.

54Oco wa popiavo lowiñi hati, Nda vu mola elende li tundila kutakelo, haico vu linga hoti, Ombela yiya, kuenje yiya. 55Kuenje eci ofela yi tunda ko Sul vu linga hoti, Kuiya ocitenya, kuenje ciya. 56A vakuambambe, wa kũlĩhi oku limbuka ovina vio posi levi vio kilu. Ci kasi ndati okuti ka wa kũlĩhili oku limbuka ovina viotembo yilo?

57Nye ka vu tetuluila lesunga ene muẽle? 58Eci o kasi loku enda konganji lu wa ku pindika, kolisako oku lisokiya laye osimbu vu kasi vonjila, sanga o ku tuala ku soma, kuenje soma o ku eca konjambuli, kuenje onjambuli yi ku imba vokayike. 59Mopia love siti, Ku tundimo vali, toke wa feta olusendu lua sulako.

Currently Selected:

LUKA 12: EMB63

Highlight

Copy