YOANO 18

1Eci Yesu a popia olondaka evi, wa tunda lolondonge viaye, wa enda kesinya liondamba Kedrone oko kua kala ocumbo, omo va iñila, eye lolondonge viaye. 2Puãi Yuda, u wo pakula, layevo wa kũlĩhako, momo Yesu wa endaendako olonjanja via lua lolondonge viaye. 3Oco Yuda, eci a kopile ocisoko casualali kuenda akuenje vamue vovitunda vinene kuenda va va Fariseo, oco wa endako lolondiyelo lovimihi lovimaleho. 4Oco Yesu, omo a kũlĩha cosi cu lingiwa, wa tunda, yu wa va pula hati, Vu sanda elie? 5Vo kumbulula vati, Yesu u Nasara. Yesu wa va sapuila hati, Ame. Yuda u wo pakula haipo a kala kumue lavo. 6Eci Yesu a popia lavo hati, Ame, oco va enda ocinyimaime, kuenje va kupukila posi. 7Oco wa va pula vali, hati, Vu sanda elie? Yu va linga vati, Yesu u Nasara. 8Yesu wa kumbulula hati, Ndo sapuili ale siti, Ame, oco nda ame vu sanda, alume ava va ende. 9Eci wa ci popela oku tẽlisa ondaka yina a popia, hati, Pokati kava wa nyiha sia nyelisilepo umue. 10Oco Simono Petulu, omo a kuete osipata, wa yi pola, kuenje wa veta ukuenje wocitunda cinene yu wo sonja etui liaye liokondio. Onduko yukuenje Maliko. 11Oco Yesu wa popia la Petulu hati, Someha osipata yove vocilalo. Okopo Tate a nyiha hẽ, si yi nyui?

12Oco ocisoko casualali la kesongo liaco kuenda akuenje va va Yudea va kuata Yesu, kuenje vo kuta. 13Vo tuala tete ku Anasi, momo eye ndatembo ya Kayafa, u wa kala ocitunda cinene kunyamo waco. 14Kayafa eye una wa lungula va Yudea, hati, Hise nda omunu umuamue o fila omanu vosi.

15Simono Petulu wa kuama Yesu, haico ondonge yikuavo. Kuenje omo ondonge yaco yikuavo ya kũlĩhiwa locitunda cinene, oco ya iñila vocitali cocitunda cinene kumue la Yesu, 16Petulu puãi wa siala puvelo posamua. Oco ondonge yikuavo ya kũlĩhiwa locitunda cinene, ya tunda, kuenje ya popia lufeko ukuovelo, yu ya iñisa Petulu. 17Oco ufeko ukuovelo wa pula Petulu, hati, Ove hẽ, siti lovevo vundonge yomunu o? Eye wa kumbulula hati, Lakamue. 18Akuenje lolondavululi va siakala ondalu, momo ku talala, kuenje va talama ocipepi loku yota. Petulu layevo wa kala kumue lavo oku yota.

19Oco ocitunda cinene ca pula Yesu olondonge viave kuenda okulonga kuaye. 20Yesu wo kumbulula hati, Oku vangula, nda vangula loluali lolondaka vi yevala. Oku longisa nda longasaila volosunangonga, kuenda vonembele, omu va Yudea vosi vongolokaela. Vuyombeki sia popele cimue. 21Nye o ci mulila? Ovina nda popia vi pula ava va vi yeva, ovo va kũlĩha evi nda popia. 22Eci a popia ndoco, ondavululi yimue ya kalako, oku patula Yesu ocikusi, yo pula yiti, O kumbulula ndoco ocitunda cinene? 23Yesu wo kumbulula hati, Nda nda popia cĩvi, ci imbila uvangi; nda nda popia ciwa, wa mbetela nye? 24Oco Anasi wo tuma lovikolo ku Kayafa ocitunda cinene.

25Simono Petulu wa talama loku yotako. Oco va popia laye vati, Ove hẽ, siti lovevo vundonge yaye? Eye wa likala, hati, Hameko. 26Umue ukuenje wocitunda cinene, haeye ngandi ulume una Petulu a sonja etui, wo pula hati, Sia ku muilile kumue laye vocumbo? 27Petulu wa likala vali, kuenje haico ekondombolo lia lila.

28Oco vopa Yesu ku Kayafa, kuenje vo tuala vombonge. Ca kala ociteketeke. Ovo muẽle ka va iñilile vombonge sanga va vĩhisua okuti ka ci tava oku lia o Pascoa. 29Oco Pilato wa tundila kokuavo posamua, yu wa pula hati, Omunu u, wo pindikili nye? 30Vo kumbulula vati, Omunu u, nda ka kaile ondingaĩvi, nda ka tuo pakuile kokuove. 31Oco Pilato wa popia lavo hati, Kuendi laye ene muẽle, ko tetuluili lovihandeleko viene. Va Yudea va popia laye vati, Etu ka tu tẽla oku ipa omunu. 32Eci ca popiwila oku tẽlisa ondaka Yesu a popele oku lekisa okufa a laika oku fa lakuo.

33Oco Pilato wa iñila vali vombonge, yu wa pañinya Yesu, kuenje wo pula hati, Ove hẽ, ove vusoma ya va Yudea ale? 34Yesu wa kumbulula hati, Eci, ove muẽle wa ci popia ale, ele vamue vaiñi va ci popia love okuti, ame ndi Soma? 35Pilato wa kumbulula hati, Ame nga ndu Yudea? Vakuẽle va Yudea kuenda ovitunda vinene ovo va ku makuila. Wa linga nye? 36Yesu wa kumbulula hati, Usoma wange hawoluali luloko. Usoma wange nda wa kaile woluali lulo, akuenje vange nda va yaka okuti si pakuiwa ku va Yudea. Usoma wange puãi hawokilulieveko. 37Oco Pilato wa popia laye hati, Ococo, ca lomboloka okuti vusoma muẽle, siti? Yesu wa kumbulula hati, Ndeci wa popia, ndisoma. Eci oco nda citiwila, haico ndeyilila voluali, okuti, njimbila Ocili uvangi. Vosi vakuacili va yeva ondaka yange. 38Pilato wo pula hati, Ocili, oco nye?

Eci a popia ondaka eyi, wa tundila vali ku va Yudea, yu wa va sapuila hati, Sio sangele leko. 39Puãi ene vu kuete ocituwa cokuti, kotembo yo Pascoa, ndu kutuluili omandekua yimue. Oco hẽ, vu yongola okuti ndu kutuluili Soma ya va Yudea? 40Oco va vilikiya vali vati, Omunu u heyeko, te Baraba. Baraba yaco ocingumba.

Currently Selected:

YOANO 18: EMB63

Highlight

Copy