YOANO 17

1Eci Yesu a popia ovina evi, wa petuila ovaso aye vilu, yu wa linga hati, A Tate, ekumbi lieya. Muisa Omõlove ulamba oco Omõla a ku muisevo ulamba. 2Momo wo wiha omoko yokomanu vosi, haiyo yoku eca omuenyo ko pui ku vosi wo wiha. 3Omuenyo ko pui wowu, oku ku kũlĩha, ove lika vu Suku yocili, loku kũlĩhavo Yesu Kristu, u wa tuma. 4Nda ku muisila ulamba kilu lieve, momo nda malusula upange wa nyihile oku u linga. 5Kaliye, a Tate, muise ulamba kovaso ove. Muise ulamba una nda kaile lawo kumue love, osimbu oluali ka lua lulikiwile.

6Nda situlula onduko yove komanu vana wopa voluali, yu wa va nyiha. Va kaile vove, kuenje wa va nyiha, yu va pokola kondaka yove. 7Cilo va kũlĩha okuti ovina viosi wa nyiha via tunda kokuove. 8Momo olondaka wa nyiha nda va vi iha kuenje va vi tava, yu va kũlĩha okuti ocili, nda tunda kokuove, kuenje va kolela okuti ove wa numa. 9Ñasi loku va likutilila. Si kasi loku likutililila oluali, te ava wa nyiha, momo vove, 10kuenje nda muisua lavo ulamba. Cosi cange cove, kuenje cosi cove cange. 11Ame si kasi vali voluali, ovo puãi, va kasi voluali, kuenje ame njiya kokuove. A Tate o kola, va lavela vonduko yove eyi wa nyiha, oco va kale vamuamue ndetu muẽle. 12Osimbu ame nda kala lavo, nda va lavela vonduko yove eyi wa nyiha. Nda va vetatela, kuenje pokati kavo lomue wa nyõlehapo te omõla enyõleho, oco ocisonehua ci lingiwe. 13Puãi cilo njiya kokuove, kuenje ovina evi ndi vi popela voluali, okuti onjolela yange yi telisiwila vokuavo. 14Nda va iha ondaka yove, kuenje oluali lua va suvuka, momo havakualualiko, ndeci ame siukualualiko. 15Si pingi okuti o vopa voluali, te okuti o va teyuila kevĩho. 16Ovo havakualualiko ndeci ame siukualualiko. 17Va kolisila vocili cove, ondaka yove oyo ocili. 18Ndeci ove wa numa ame voluali, haico ovo nda va tuma voluali. 19Ndi va litumbikila oco ovo va kolisilue vocili.

20Si va likutilila ovo lika, puãi ndi likutililavo ava va laika oku ñolelela ondaka yavo, 21okuti vosi va kala vamuamue, ndeci ove, a Tate, o kasi vokuange lame ñasi vokuove, okuti lavovo va kala vokuetu, oco oluali lu tave okuti ove wa numa. 22Ulamba wa nyiha, ndo va iha, oco va kale vamuamue ndeci etu, 23okuti ame vokuavo, love vokuange, oco vosi va linge olumue vamuamue, oco oluali lu limbuke okuti ove wa numa, kuenje o va sole, ndeci o sole ame. 24A Tate, njongola okuti ava wa nyiha lavovo va kala oko ñasi, ha va moli ulamba wange wa nyiha locisola cove osimbu oluali ka lua sevetiwile. 25A Tate, okuesunga, oluali ka lua ku kũlĩhile, ame puãi, nda ku kũlĩha kuenje ava va kũlĩha okuti ove wa numa. 26Nda va lomboluila onduko yove kuenje lopo ndi va yi lomboluila, okuti ocisola wa sola laco ame, oco ci kale volonulo viavo, kuenje ame ñala volonulo viavo.

Currently Selected:

YOANO 17: EMB63

Highlight

Copy