YOANO 19

1Oco Pilato wa kuata Yesu, yu wo tipuisa. 2Kuenje asualali vo patela ekolowa liolosongo, kuenje vo li futisa kutue waye, yu vo walisa onanga yohusu. 3Veya kokuaye kuenje vo lama, vati, A Hosi! A Soma ya va Yudea! Kuenje vo patula ovikusi. 4Pilato wa tunda vali, yu wa popia lavo hati, Tali. Ndo vu neneli, oco vu limbuke okuti sio sangele leko. 5Oco Yesu wa tunda, wa wala ekolowa liolosongo kuenda uwalo wohusu. Pilato wa popia lavo hati, Tali omunu u. 6Eci ovitunda vinene kuenda akuenje vavo vo mola, va vilikiya vati, U valela kekulusu. U valela kekulusu. Pilato wa popia lavo hati, Kuendi laye ene muẽle, ko valeli kekulusu, momo ame sio sangele leko. 7Va Yudea vo kumbulula vati, Tu kuete ovihandeleko, kuenje, ndeci ci popia ovihandeleko viaco, eye wa sesamela okufa, momo wa litukula Mõla a Suku. 8Eci Pilato a yeva ondaka eyi, wa kuata vali usumba. 9Wa iñila vali vombonge, yu wa pula Yesu hati, O tunda pi? Yesu puãi ko kumbuluile. 10Oco Pilato wa popia laye hati, Ku ñumbulula hẽ? Ku ci okuti ñasi lomoko yoku ku kutulula kuenda omoko yoku ku valelisa kekulusu? 11Yesu wo kumbulula hati, Ove nda kua kuatele omoko lame, nda omoko yaco ka ya tundile kilu, yu ya ku ihiwa. Oco, u wa makula kokuove, eye o kasi lekandu lia piala.

12Tunde opo Pilato wa seteka oku u kutulula, puãi va Yudea va vilikiya vati, Nda o kutulula omunu u, kukamba lia Kaisareko. Wosi o litukula hati, Ndisoma, o linga ocisuanji ca Kaisare. 13Oco eci Pilato a yeva olondaka evi, wopa Yesu kuenje wo tundisila posamua. Noke Pilato wa tumala polusenje. Apa a tumala pa tukuiwa Kuayaliwalovawe. Velimi lia Heveru pa tukuiwa Gambata. 14Eteke liaco eteke lieliangiliyo lio Pascoa, lola yaco ya soka ndola yepandu. Yu wa popia la va Yudea hati, Soma yene, Yu 15Oco va vilikiya vati, A ipaiwe, a ipaiwe u valela kekulusu. Pilato wa popia lavo hati, Anga, mbalela osoma yene kekulusu? Ovitunda vinene via kumbulula viti, Ka tu kuete osoma yikuavo, te Kaisare. 16Oco wa weca kokuavo ha vo valela kekulusu.

17Oco va enda la Yesu. Eye wa tunda, wa ambata ekulusu eye muẽle. Wa enda lalio toke kokawulu ka tukuiwa Ekõlõkõlo, puãi velimi lia Heveru ka tukuiwa Gongota. 18Oko vo valelela kekulusu, kuenje va valela vo vavali vakuavo kumue laye, u konele, u konele, Yesu pokati. 19Kuenje Pilato wa kapa ocisonehua kekulusu. Ca sonehiwako ceci: YESU U NASARA SOMA YA VA YUDEA. 20Oco va Yudea va lua va tanga ocisonehua caco, momo apa Yesu a valeliwila kekulusu ocipepi limbo; kuenje ca sonehiwa velimi lia Heveru, leli lia Roma, leli lia Helasi. 21Oco ovitunda vinene via va Yudea via popia la Pilato, viti, Ku ka sonehe huti, Soma ya va Yudea, puãi soneha huti, Omunu u hati, Ame ndisoma ya va Yudea. 22Pilato wa kumbulula hati, Eci nda soneha nda soneha.

23Eci asualali va valela Yesu kekulusu, va kuata uwalo waye kuenje vo tepa lukuãla, esualali onepa, esualali onepa. Ocikutu caye ka ca kaile luyiko, puãi ca tutiwa ño cimuamue tunde kosingo. 24Oco va livangula pokati vati, Ka tu ka ci toli, puãi tu cimbili ocela, tu tale u o cupapo. Ca lingiwila oku tẽlisa ovisonehua vina via popia viti,

Va lianjela uwalo wange.

Va imbila ocikutu cange ocela.

25Eci oco asualali va linga. Ocipepi lekulusu lia Yesu kua kala inaye, kuenda manja inaye, okuti Maria ukãi wa Kelopa, kuenda Maria u Magadala. 26Eci Yesu a mola inaye, kuenda ondonge yina a sole, va talama ocipepi oco wa popia la inaye hati, Okãi, omõlove ha yu! 27Noke wa popia londonge, hati, Nyoho ha yu! Tunde opo ondonge yaco ya kala laye vonjo yaye.

28Noke, omo Yesu a kũlĩha okuti kaliye cosi ca tẽlisiwa, oco wa linga hati, Enyona li mbala. Ca popiwila oku tẽlisa ovisonehua. 29Ocipepi kua kala ocikuata ce yuka indangele. Oco va yulisa onjavi lindangele kuenje va yi kapa kunga, yu vo vi tukika komela. 30Eci Yesu a nyua indangele oco hati, Ca maliwa. Noke wa petamisa utue kuenje wa tula omuenyo.

31Omo eteke liaco eteke lieliangiliyo lio Pascoa, lomo va Yudea ka va yonguile okuti ovivimbi vi kala kakulusu keteke liesambata, omo esambata liaco eteke linene, oco va Yudea va pinga ku Pilato okuti ovolu avo a teyiwa, kuenda okuti vopiwako. 32Oco asualali veya, va teya ovolu u watete, la-a ukuavo wa valeliwa kekulusu kumue laye. 33Puãi, eci veya ku Yesu kuenje va sanga okuti wa fa ale, oco ka va teyele vali ovolu aye. 34Puãi esualali limue lio toma pepati lunga, kuenje haico mua tunda osonde lovava. 35U wa ci mola eye wa cimbila uvangi, okuti lenevo vu kolela. Uvangi waco waye wocili, eye muẽle wa kũlĩha okuti eci a kasi loku popia cocili. 36Ovina evi via lingiwila oku tẽlisa ocisonehua cina ca linga citi, Lalimue ekepa liaye li teyiwa. 37Kuenda vali oku tẽlisa ocisonehua cikuavo citi, Va vanja u va toma.

38Kovaso yovina evi Yosefe, u Arimateya, wa pinga ku Pilato oku upako ocivimbi caco, kuenje Pilato wa tava. Yosefe u oñame ya Yesu, puãi yuyombeki, omo wa kuatela va Yudea usumba. Oco weya, wopako ocivimbi caco. 39Nicodemo, una weyile kokuaye tete kuteke, layevo weyavo locitenga ca mura lohula, ca soka lakui atãlo kolokilu. 40Oco va yelula ocivimbi caco, kuenje va ci iña olonanga viovalatanya lovihemba viaco, ndeci va Yudea va kenda kenda. 41Ocipepi loko a valeliwa kekulusu kua kala ocumbo, kuenje vocumbo caco mua kala eleva liokaliye, omu ka mua la kapiwa handi ocivimbi. 42Kuenje, omo eteke liaco eteke lieliangiliyo lio Pascoa ya va Yudea, lomo eleva liaco lia kala ocipepi, oco va kapamo ocivimbi caco.

Currently Selected:

YOANO 19: EMB63

Highlight

Copy