YOANO 11

1Kua kala ulume umue o vela, onduko yaye Lasaru, eye u Betánia imbo lia Maria la huvaye Marta. 2Maria yaco u, eye una wa wavekele Ñala onguendu ya tĩla yu wa puenya olomãi viaye lesinga liaye. Lasaru u wa vela eye mume waye. 3Oco vamukãi vaye va tuma ku Yesu vati, A Ñala, u o sole o vela. 4Puãi, eci Yesu a ci yeva, wa popia hati, Okuvela oku hakuokufako puãi kulamba wa Suku okuti Mõla a Suku o muilako ulamba.

5Ca kala okuti Yesu wa sola Marta la manjaye kuenda Lasaru. 6Oco, eci a yeva okuti Lasaru o vela, wa amisapo vali oloneke vivali. 7Noke wa popia lolondonge hati, Tu endi vali ko Yudea. 8Olondonge viaye viti, A Rambei, ndopuilo va Yudea va yonguile oku ku sosola lovawe, oco wendako vali? 9Yesu wa kumbulula hati, Ka kuli hẽ, ekui liolowola kolowola vivali viutanya? Omunu, nda endela vutanya, ka lipunduka, momo o lete ocinyi coluali lulo. 10Puãi omunu, nda enda luteke, o lipunduka, omo vokuaye ka muli ocinyi. 11Eci a popia ovina evi, oco a popia lavo hati, Ukuetu Lasaru wa pekela, puãi ngenda ho pasula kotulo. 12Oco olondonge via popia laye viti, A Ñala, nda wa pekela o kaya. 13Yesu wa tukula okufa kuaye, ovo puãi va soka okuti wa tukula oku puyukila votulo. 14Oco Yesu wa teta onimbu, wa va sapuila hati, Lasaru wa fa, 15kuenje mekonda liene, nda sanjuka omo sia kaileko, oco vu kolele. Puãi tu endi kokuaye. 16Oco Tomasi, haeye Njamba, wa popia lolondonge vikuavo, hati, Tu endivo, oco tu file kumue laye.

17Oco, eci Yesu a pitila, wa sanga okuti Lasaru o kasi ale veleva oloneke vikuãla. 18Betánia lia kala ocipepi loko Yerusalãi, ca soka ndolo-kilõmetro vitatu. 19Va Yudea va lua veya ku Marta la Maria oku va lembelekela mume wavo. 20Marta, eci a yeva okuti Yesu o kasi loku iya, oco wa enda, wa ñualehela laye, Maria puãi wa kala ño vonjo. 21Marta wa popia la Yesu hati, A Ñala, nda wa kaile kulo, nda mume wange ka file. 22Ndaño cilo ndi ci okuti cosi o pinga ku Suku, Suku o ku ciha. 23Yesu wa popia laye hati, Mume wove o pinduka. 24Marta wa popia laye hati, Ndi ci okuti o pinduka epinduko lieteke lia sulako. 25Yesu wa popia laye hati, Ame ndipinduko haime ndimuenyo. U o ñolela, ndaño o fa, haimo o kala vali lomuenyo. 26Kuenda wosi o kasi lomuenyo, kuenje o ñolela, ka fi vali. Eci hẽ, o ci kolela? 27Marta wo kumbulula hati, Oco, a Ñala, nda kolela ale okuti vu Kristu, vu Mõla a Suku, haive una iya voluali.

28Eci a ci popia, oco wa ka pañinya manjaye Maria kuenje wo loñuila, hati, Ulongisi yulo, wa ku kovonga. 29Maria, eci a ci yeva, haico a votoka, kuenje wa enda kokuaye. 30Yesu handi ka iñilile vimbo, puãi wa kala oko Marta a ñualehela laye. 31Va Yudea va kala la Maria vonjo oku u lemba, eci vo mola okuti wa votoka lonjanga, wa tunda, oco vo kuama, omo va soka vati, Enda keleva oku ka lililako. 32Maria, eci eya oko Yesu a kala kuenje wo mola, oco wa fendela kolomãi viaye, wa linga hati, A Ñala, nda wa kaile kulo, nda mume wange ka file, 33Eci Yesu a mola okuti o kasi loku lila, kuenda va Yudea veya laye va lilavo, oco vutima ocikembe co kuata, kuenje wa tokotelua. 34Yu wa pula hati, Wo langeki pi? Vo kumbulula vati, A Ñala, enju, ndo tale. 35Yesu wa lila. 36Oco va Yudea vati, Tali ndeci o sola. 37Puãi vamue pokati kavo vati, U, wa patulula ovaso omeke, nda ka tẽlelevo oku linga okuti u ka ka fe?

38Oco Yesu, ocikembe co kuata vali kuenje wa enda keyambo. Eyambo liaco eleva, kuenje lia sitikiwa lewe. 39Yesu wa linga hati, Upiko ewe liaco. Marta, mukai vu wa fa, wa popia laye hati, Cilo wa futa ale momo ca linga ale oloneke vikuãla. 40Yesu wo kumbulula, hati, Sia ku sapuilile hẽ okuti nda o kolela o mola ulamba wa Suku? 41Oco vopako ewe, kuenje Yesu, oku petula ovaso aye, wa linga hati, A Tate, hu pandula omo wa njeva. 42Nda kũlĩha okuti olonjanja viosi o njeva njeva, puãi nda ci popela omanu vongoloka okuti va kolela okuti ove wa numa. 43Eci a popia ndoco, wa vilikiya londaka ya lua hati, A Lasaru, tundamo. 44U wa file wa tundamo, wa iñiwa onjambo kovoko lo kolomãi, kuenje ocipala caye ca futisua lelesu. Yesu wa popia lavo hati, U kutululi, oco a ende.

45Oco va lua pokati ka va Yudea vana veya ku Maria, haivo va mola eci Yesu a linga, vo kolela. 46Puãi vamue pokati kavo va tunda, va enda ku va Fariseo, kuenje va va sapuila ovina Yesu a linga. 47Oco ovitunda vinene la va Fariseo vongolola onjango yavo, yu va linga vati, Tu linga nye? Momo omunu u o linga ovilimbu via lua. 48Nda tu tava okuti o lingainga ño-o ndeci, omanu vosi va tava kokuaye, noke va Roma veya, va nyõla ocitungilo cetu ci kola, kuenda ofeka yetu. 49Puãi umue pokati kavo, okuti Kayafa, eye ocitunda cinene cunyamo waco, wa popia lavo hati, Ene ka wa kũlĩhili cimue. 50Ka co lombolokeli okuti kokuene hise nda omunu umosi o fila omanu, ofeka yosi oku nyõleha hacoko. 51Eci ka ci popele eye muẽle. Puãi, omo eye ocitunda cinene cunyamo waco, oco wa popia ocitumasuku cokuti Yesu o fila ofeka, 52kuenje hafekako lika, puãi o fila okuti o kongela pamuamue omãla va Suku va sandoka. 53Oco, tunde keteke liaco, vo tumbika ongombo yoku wipa.

54Oco Yesu ka ñuaile ñuaile vali oku limolehisa pokati ka va Yudea, puãi wa tundako, wa enda kofeka yi lisungue lekalasoko, vimbo lia tukuiwa Efarimi, omo a tumala kumue lolondonge viaye.

55Ofesta yo Pascoa ya va Yudea ya kala ocipepi. Va lua va tunda kovaimbo avo oku lamanela ko Yerusalãi oku liyelisa osimbu ofesta yo Pascoa ka ya fetikile handi. 56Oco va kala loku sanda Yesu, kuenje eci va kala vonembele, va lipula pula pokati, vati, Wa soki nye, keya kofesta? 57Ca kala okuti ovitunda vinene kuenda va Fariseo va handeleka ale, vati, Nda umue wa kũlĩha oku a kasi a ci sapule, oco tu u kuate.

Currently Selected:

YOANO 11: EMB63

Highlight

Copy