YOANO 12

1Eci pa kamba oloneke epandu o Pascoa oku fetika oco Yesu weya ko Betánia kuna kua tunga Lasaru, una Yesu a pindula ku vakuavilangu. 2Kuenje vo laleka kokulia. Marta wa vumba omesa, Lasaru puãi wa kala lava va tumala komesa kumue laye. 3Maria wa nyañula omeyu yokilu yonguendu ya tĩla, kuenje wa waveka olomãi via Yesu, yu wa vi puenya lesinga liaye. Onjo yeyuka elemba lionguendu. 4Puãi Yuda Isikariote, umue polondonge viaye, haeye o laika oku u pakula, wa pula hati, 5Onguendu eyi, nye ka ya landisililue ovita vitatu violosingu ha vi eciwa kolosuke? 6Eci ka ci popelele omo a kuetele olosuke ohenda, puãi omo ocimunu, lomo a kuete ombango, kuenje upopa evi via imbiwamo. 7Yesu wa popia hati, Maria a kale, wa ci lingila ndoketeke liokukendiwa kuange. 8Momo olosuke vu kasi ño-o hũ lavio, ame puãi ko kasi ño-o hũ lame.

9Eci owiñi wa lua wa va Yudea va yeva okuti Yesu oko a kasi, oco veya. Ka veyilile lika Yesu, puãi veyililavo oku tala Lasaru una a pindula ku vakuavilangu. 10Oco ovitunda vinene via tumbika ongombo yoku ipavo Lasaru, 11momo, mekonda liaye, va Yudea va lua va enda loku tava ku Yesu.

12Hẽla yaco owiñi wa lua womanu weya kofesta wa yeva okuti Yesu iya ko Yerusalãi. 13Oco va nyañula amela eva, kuenje va tunda oku ka ñualehela laye, yu va vilikiya vati, Hosana! U iyilila onduko ya Ñala a sivayiwe! Haeye Soma ya Isareli. 14Yesu wa sanga omõla ocimbulu, kuenje wa endelako, ndeci ca sonehiwa citi,

15Ofeka, amõla a Siono, ku ka yokoke.

Tala Soma yove, o kasi loku iya,

endela komõla ocimbulu.

16Tete olondonge viaye ka via limbukile ovina viaco, puãi, eci Yesu a iñila vulamba waye, oco va ivaluka okuti ovina viaco vio sonehelua, kuenda okuti ovina viaco vio lingiwa. 17Omanu va kaile laye eci a kovonga Lasaru veyambo loku u pindula ku vakuavilangu, ovo vo wimbila uvangi. 18Omo omanu va yeva okuti eye wa linga ocilimbu caco, oco va tundila oku ñualehela laye. 19Oco va Fariseo va livangula pokati, vati, Tali okuti ko tẽla cimue. Oluali luosi lu u kuãi.

20Pokati kava va lamana oku fendela kofesta pa kala va Helasi vamue. 21Oco ovo veya ku Filipu, u Betesaita ko vo Galilea, yu va popia laye vati, A ñala, tu yongola oku mola Yesu. 22Filipu wa enda, wa ka ci sapuila Andereu, Andereu la Filipu va enda, va ka ci sapuila Yesu. 23Kuenje Yesu wa va kumbulula hati, Ekumbi lieya okuti Mõlomanu o muisua ulamba. 24Mopia lene siti, Ocili, ocili, olumema luotiliku nda ka lu lokila posi ha lu fi, lu kala lika lialuo, puãi nda lu fa oco lu ima olomema via lua. 25U o sole omuenyo waye u pesela, kuenje u o suvuka omuenyo waye voluali lulo u solekela komuenyo ko pui. 26Nda umue o mbumba, a ñuame, kuenje oko ñasi haiko u o mbumba a kala. Nda umue o mbumba Isia u sumbila.

27Cilo, utima wange wa tokotelua. Oco, mopia nye? Mopia hẽ, siti, A Tate, mopele kekumbi lilo? Oco hacoko, momo ekumbi lilo olio ndeyilila. 28A Tate, muisa onduko yove ulamba. Oco, kilu kua tunda ondaka yiti, Nda yi muisa ale ulamba, kuenje ndi yi muisa vali ulamba. 29Omanu va kalako oku ci yeva, va popia vati, Ca lemĩla. Vakuavo vati, Ungelo wa popia laye. 30Yesu wa kumbulula hati, Ondaka eyi hameko ya mopiwila puãi ene yo popiwili. 31Cilo, ekanga lioluali lulo li kasi ale. Cilo ombiali yoluali lulo yi tundisua. 32Kuenda ame, eci nulikua kilu lieve, ñokela omanu vosi kokuange. 33Eci wa ci popela oku lekisa okufa a laika oku fa lakuo. 34Omanu vo kumbulula vati, Tua yeva kovihandeleko okuti Kristu o tumala ño-o hũ. Ove o popia ndati huti, Ca sesamela Mõlomanu oku tulikiwa? Mõlomanu waco, helie? 35Yesu wa va kumbulula, hati, Okasimbu kaño ocinyi ci kasi pokati kene. Endi osimbu vu kasi locinyi sanga owelema u vu sanga. U endela vowelema ka kũlĩhile oku a enda. 36Osimbu vu kasi locinyi koleli ocinyi okuti vu linga omãla vocinyi.

Eci Yesu a popia olondaka evi wa tundako, wa va yomboloka. 37Ndaño wa lingila ovilimbu via lua kovaso avo haimo ka vo kolelele. 38Ca pita ndoco okuti ondaka yuprofeto Isaya yi lingiwa, yina ya popia, yiti,

A Ñala, helie wa kolela eci tua sapula?

Okuokuo kua Ñala kua lekisua kulie?

39Oco ka va tẽlelele oku kolela. Momo Isaya wa popia vali, hati,

40Wa patisa ovaso avo kuenda wa tĩlisa ovitima viavo,

sanga va leta lovaso avo, kuenda va limbuka lovitima viavo,

sanga va pongoloka si va sakula.

41Isaya wa ci popela omo a mola ulamba waye, yu wo ci popela. 42Haimo lumue, va lua, ndaño pokati kakulu, vo kolela, puãi mekonda lia va Fariseo, ka va ci lekisile sanga va tundisua vosunangonga, 43momo va sola ca lua oku sivayiwa lomanu, oku sivayiwa la Suku ci sule.

44Yesu wa vilikiya hati, U o ñolela hameko a ñolela, o kolela puãi U wa numa. 45Lu o ndete o lete U wa numa. 46Ndeya voluali ndocinyi, okuti wosi o ñolela ka kala vali vowelema. 47Nda umue o yeva olondaka viange, kuenje ka vi lingi, ame siu tetuluila, momo sieyilile oku tetuluila oluali, ndeya oku popela oluali. 48U o liñala, kuenje ka tava kolondaka viange, o kuete onganji. Ondaka nda popia oyo yu tetuluila keteke lia sulako. 49Momo sia popele ño ocipango cange, Isia wa numa eye wa ñundika eci mopia leci mbangula. 50Kuenje ndi ci okuti ocikundi caye oco omuenyo ko pui. Oco, ovina ndi vangula, ndi vi vangula ndeci Isia a popia lame.

Currently Selected:

YOANO 12: EMB63

Highlight

Copy