YOANO 10

1Mopia lene siti, Ocili, ocili, u ka piti vuvelo oku iñila vocunda colomeme, puãi o londela kumue kuiñi, eye ocimunu, haeye ocingumba. 2Puãi u o pita vuvelo, eye ungombo wolomeme. 3Ukuambundi u yuluila epito. Olomeme vi yeva ondaka yaye, yu o kovonga olomeme viaye lolonduko, kuenje o vi tundisa loku vi songuila. 4Eci opamo viosi viaye, o vi pitila kovaso, kuenje olomeme viu kuama, momo via kũlĩha ondaka yaye. 5Umue wiñi ka viu kuama, viu tila, momo ka via kũlĩhile ondaka ya vaiñi. 6Yesu wa va tela olusapo olu, puãi ka va limbukile ndomo a va lu tela.

7Oco Yesu wa popia vali lavo hati, Mopia lene siti, Ocili, ocili, ame nduvelo wolomeme. 8Vosi va netekela ovimunu, haivo ovingumba, puai olomeme ka via va yevele. 9Ame nduvelo, nda umue o pita vuvelo waco okuti vokuange, o popeliwa, iñaila, o tunda tunda, kuenje o sanga ulio. 10Ocimunu ka ciya, te ciyilila oku iva loku ipa kuenda oku nyõla. Ame ndeyilila okuti va kuata omuenyo, kuenda okuti omuenyo waco u supoka. 11Ame ndungombo uwa. Ungombo uwa o pesila olomeme omuenyo waye. 12Ukuopange o talavayela ño olombongo, okuti heyeko muẽlealomeme viaco, lolomeme viaco haviayeko, nda o lete ombinji yo yiya, oco o sia olomeme kuenje o tila, kuenje ombinji yi vi kuata loku vi sandola. 13Ukuopange waco o tila omo upange u lingila ño ofeto, ka sokolola olomeme. 14Ame ndungombo uwa. Ñulĩha olomeme viange. Olomeme viange vi ñulĩha ame, 15ndeci Isia a ñulĩha kuenda ndeci nda kũlĩha Isia. Kuenje mesila olomeme omuenyo. 16Ñuete olomeme vikuavo haviocunda eciko. Evi laviovo ca sesamela okuti ndi vi nena, kuenje vi tava kondaka yange. Oco noke ku kala ocunda cimuamue lungombo umuamue. 17Oco, omo mesela omuenyo wange okuti ndu sanga vali noke, oco Isia a solele. 18Lomue u njupa, puãi ndu pesela ame muele, ñasi lomoko yoku u pesela, ñasivo lomoko yoku u mola vali. Eci, oco ocikundi Tate a ñundika.

19Oco va Yudea va lipatãla vali olondaka evi. 20Kuenje va lua pokati kavo va linga vati, O kuetiwe locilũlu. O vela kutue. Vu yevelila nye? 21Vakuavo vati, Olondaka evi haviukuacilũluko. Ocilũlu nga ci tẽla oku patulula ovaso omeke?

22Otembo yaco otembo yofesta yonjivaluko yoku tumbika onembele ko Yerusalãi, 23haiyo otembo yombambi. Yesu wa kala loku ñuala ñuala vonembele vocindumba ca Salomone. 24Oco va Yudea veya, vo ñuala ocingonja. Kuenje va popia laye vati, Toke pi o tu sila ño atatahãi? Nda ove vu Kristu, tu ci sapuile. 25Yesu wa va kumbulula hati, Ndo sapuili ale kuenje lopo ka vu kolela. Ovilinga ndi lingaila vonduko ya Tate ovio vi njimbila uvangi. 26Ene puãi ka vu kolela momo havulomeme viangeko. 27Olomeme viange vi yeva ondaka yange. Nda vi kũlĩha, kuenje vi ñuama. 28Ndi viha omuenyo ko pui kuenje lalimue eteke vi nyõleha. Lomue o vi kotosola peka liange. 29Tate wa vi nyiha, eye Fu, kuenje lomue o tẽla oku vi kotosola peka lia Isia. 30Ame la Isia tuamuamue.

31Va Yudea va nyañula vali ovawe oku u sosola. 32Yesu wa va kumbulula, hati, Ndo lekisi ovilinga via lua viwa via tunda ku Isia, vu sosuila ocilinga ci pi? 33Va Yudea vo kumbulula vati, Ka tu ku sosuila ocilinga ciwa, te oku popia etonãi, momo ove vumunu o lilingisa Suku. 34Yesu wa va kumbulula hati, Ka ca sonehiwile he vovisonehua viene, citi, Nda linga siti, Vulosuku? 35Nda omanu va yeva ondaka ya Suku va tukuiwa olosuku, kuenje ka ci tava oku nyõla ocisonehua, 36oco hẽ, vu popia ndati lu Isia a kolisa, loku u tuma voluali, hoti, Ove o popia etonãi, omo nda linga siti, Ndimõla a Suku? 37Nda si kasi loku linga ovilinga via Tate, ko ka ñoleli. 38Puãi, nda ovio ñasi loku linga, koleli ovilinga viaco ndaño ka vu ñolela ame. Vi koleli okuti vu kũlĩha kuenda vu limbuka okuti Isia o kasi lame, lame ñasi la Isia. 39Va seteka vali oku u kuata, puãi wa puluka povaka avo.

40Wa yokila vali kesinya lia Yordão, kuna Yoano a fetikila oku papatisa, kuenje oko a tumala. 41Va lua veya kokuaye kuenje vati, Ocili, Yoano ka lingile ovilimbu, puãi ovina viosi Yoano a tukuila omunu u, viocili. 42Haiko omanu va lua vo kolelela.

Currently Selected:

YOANO 10: EMB63

Highlight

Copy