Etatelu 45

Josefu Ambuyashula le Anangu

1Josefu kumbeya ndjakimela ntu la ntundu kʼantu tshe wakudingi. Ndi akahangohango ati: Nyutundja antu tshe! Nduku untu akatshikala la Josefu lamʼakandayashula le anangu.#45:1 Etsh. 7:13. 2Ndi akatundo la delu, akaleli wulu. Asi Edjibitu ndu wa lu luudu la Farayo wakuki delu diandi. 3Josefu akatela anangu ati: Dimi Josefu one; papa eki la lumu ntu? Ku anangu kumbeya mbukaluya diui ne dia wakate asulu, wakakasana la ntundu kandi. 4Josefu akasengasenga anangu ati: Nyusukani lasuki la mi. Ku vo wakasukana la le ndi. Ndi akawatela ati: Dimi leli Josefu, onengenyu, lakanyasundja le antu wakambela lindu lʼEdjibitu. 5Tanyunyangaki ndu tanyuyatshumuyaki ne dia nyakansundja dia vo mbelami lindu. Mete Unyashungu kakantumi la ntundu kanyu dia nshimbela nyumu yʼantu. 6Ndjala ka kasha kaya deku pendi lu kete nye, ndu deku tanu diekiko diaheyi untu nkamba kana muna. 7Unyashungu akantumi la ntundu kanyu dia dimi nyuleshaka la kete, dia nyu ntshikala la lumu uma lu etshungwelu ka wuki. 8Nyu kuntumami lindu, keli Unyashungu kakantumi. Ndi akambete shi Farayo, ndu uwandji a luudu landi, la umbuledi a kete yʼEdjibitu. 9Nyusamanya, nyutshu le papa; nyutuwuteli nyati: Onʼaye Josefu kata ati: Unyashungu akambete umbuledi wʼEdjibitu tshe. Okone usamanya, uhulo uya lindu le mi, tutshimbatshimbaki. 10Kuyudjase lu kete ya Ngoshena dia we ndjala lasuki la mi, we la anʼaye, la ekambi aye, la dungalunga diaye, ndu diango diaye tshe. 11Dimi layukushaka mbu ya nde ne dia ndjala ka kasha keki deku tanu; utukuyala usi wula, we la wa lu luudu laye tshe, diango diaye diatukushila.#45:11 Etsh. 7:14. 12Nyame ndu kushemi Bendjamina nyeko lu menami nyati: Josefu ndame kateketa la su. 13Okone nyutusanyia papa dia lutumbu lami tshe lu kete yʼEdjibitu la akambu tshe wambunyuyena lindu. Kanyuyi la papa esadi uya lindu, tanyutshimbatshimbaki. 14Ku ndi akakhumbatela kushendi Bendjamina lu kingu, akaleli. Ndu Bendjamina akaleli ukhumbatedi lu kingu. 15Ndi akanonana la anangu tshe alela. Lʼokongo diku anangu wakasawula la ndi.

16Lukumu lakadiangana lu luudu la Farayo ati: Anangu Josefu wambuya. Dikambu so diakangenyangenya Farayo la ekambi andi. 17Ku Farayo akatela Josefu ati: Uteli ananyo wati: Nyutshi okone, nyahe wetshu anyu ladiku dia nyama yanyu, nyutshu utsha lu kete ya Kanana. 18Nyutose shenyu la khumbu yanyu, kanyuyi la wo le mi. Dimi layunyusha dihuli diuleki ololo lu kete yʼEdjibitu. Ku nyayolekaka dilele diʼololo dia lu kete yasu. 19Dieli la ye dia mbatela kakiane wati: Nyose pusupusu ya lu kete yʼEdjibitu dia ntemba anʼanyu wa tshitshe la wadienyu. Nyutose shenyu, kanyuyi la ndi. 20Tanyunyangaki ne dia diango dianyu diayutshikala, ne dia engo tshe kuleki ololo lu kete yʼEdjibitu kayuyala kanyu.

21Ana apami wa Isariyele wakatshi osoku. Josefu akawasha pusupusu uku diui dia Farayo. Ndi akawasha ndu pamba ya vo ntalekaka lu mbuka. Ndi akawasha ahondo vo tshe. 22Keli ndi akayusha Bendjamina tenyi dia fesa kama shatu la ahondo atanu. 23Ndi akatumela shi diango ne: punda dikumi yakawalonge diango diʼololo dia lʼEdjibitu ladiku diayo, ndu punda ya wadi dikumi kina yakawalonge pamba ya shi ndjalekaka lu mbuka ladiku diayo. 24Ndi akalakana la anangu, akawatela ati. Tanyuwanaki lu mbuka. Ku vo wakatshu. 25Vo wakamo uma lʼEdjibitu, wakakumi le shewo Jakoba, lu kete ya Kanana. 26Vo wakawutela vati: Josefu eki la lumu. Ndame keli umbuledi wa kete yʼEdjibitu tshe. Utema wa Jakoba akayala konya, ne dia ndi kumbetawo aui awo. 27Vo wakusanyia aui tshe wakawatela Josefu. Ku lamʼakandenyi pusupusu yakatumi Josefu la ndjuwemba, utema we shewo Jakoba wakakalangana. 28Ku Isariyele akati ati: Laso nkukaka. Onʼami Josefu eki la lumu. Dimi layutsho, kantawenyi ntundu latavu.

Currently Selected:

Etatelu 45: TLL

Highlight

Copy