Etatelu 46

Jakoba la Khumbu Kandi lʼEdjibitu

1Isariyele akunela la diango diandi tshe, akakumi la Bere-Sheba. Ndi akalambula Unyashungu a Isaka, shi, elambu. 2Unyashungu aketi Isariyele lʼutshu lu do ati: Jakoba! Jakoba! Ku Isariyele aketawo ati: Dimʼone. 3Ndi akawutela ati: Dimi keli Unyashungu, Unyashungu a sho. Tukaki woma dia mpulo utsha lʼEdjibitu, ne dia layutukete wudja a wuki leko. 4Dimi dime layuhulo kame la ye utsha lʼEdjibitu. Ndu dime layukukaluya uma leko. Josefu kayukudiha ashu lamʼayuyuvo. 5Jakoba akunela uma la Bere-Sheba. Ana apami wa Isariyele wakatole shewo Jakoba la anʼawo wa tshitshe ndu wadiewo lu pusupusu yakatumi Farayo dia ntuwaemba. 6Jakoba la khumbu kandi tshe wakatshu kame la dungalunga diawo ndu ekundji wakawakundja lu kete ya Kanana, wakakumi lʼEdjibitu.#46:6 Etsh. 7:15. 7Anʼandi wʼapami ndu anʼandi wʼamantu ndu ekana andi wʼapami la ekana andi wʼamantu tshe wakayi kame la ndi lʼEdjibitu.

8Kumbu yʼasi Isariyele wakatshu lʼEdjibitu nye: Jakoba la anʼandi wʼapami: Rubena, onʼa Jakoba lʼenundu. 9Ana apami wa Rubena ane: Hanoka, Palu, Hezerona la Karami. 10Ana apami wa Simeyona ane: Jemuele, lamina, Ohada, lakina, Zohara, ndu Shaulu, ona pami lakanduti la umuntu usi Kanana. 11Ana apami wa Lewi ane: Ngereshona, Kohata la Merari. 12Ana apami wa Juda ane: Ere, Onana, Shela, Pereze la Zere (keli Ere la Onana wakatavwi lu kete ya Kanana). Ana apami wa Pereze ane: Hezerona la Hamulu. 13Ana apami wa Isakara ane: Tola, Puva, Iyobe la Shimirona. 14Ana apami wa Zebuluna ane: Serede, Elona la lalele. 15(Aso weli ana apami wakuti Jakoba la Lea la Padana-Arama, kame la Dina onʼandi la umuntu. Anʼandi wʼapami la anʼandi wʼamantu wakatumbi lu suku dia luudu la Lea waki akumi asatu). 16Ana apami wa Ngada ane: Zifiyona, Hangi, Shuni, Ezebona, Eri, Arodi ndu Areli. 17Ana apami wa Ashere ane: Imina, Ishiva, Ishivi, la Beriya ndu Sera, kadiyewo. Ana apami wa Beriya ane: Hebere, la Malakiyele. 18(Aso weli ana apami wakuti Jakoba la Zilipa lakasha Labana onʼandi la umuntu Lea. Vo tshe waki antu dikumi la asamalu). 19Ana apami wakuti Ratshele, wadi a Jakoba ane: Josefu la Bendjamina. 20Josefu akuti la Asenate, onʼa Poti-Fera, olombedi wa One, Manase la Efarima lu kete yʼEdjibitu.#46:20 Etat. 41:50-52. 21Ana apami wa Bendjamina ane: Bela, Bekere, Ashibele, Ngera, Namana, Ehi, Roshe, Mupima, Hupima la Areda. 22(Aso weli ana apami wakuti Ratshele la Jakoba. Vo tshe waki antu dikumi la anei). 23Ona pami la Dane one: Hushima. 24Ana apami wa Nafetali ane: lazele, Nguni, Jezere la Shileme. 25(Aso weli ana apami wakuti Jakoba la Biliha lakasha Labana onʼandi la umuntu Ratshele. Vo tshe waki antu esambeli). 26Antu wakatshu la Jakoba lʼEdjibitu wakanduti ndame waki akumi asamalu la asamalu, aha mbala wadi wa anʼandi. 27Josefu akuti ana apami ahendi lʼEdjibitu. Okone efula kʼantu wa lu luudu la Jakoba wakatshu la ndi lʼEdjibitu, waki akumi esambeli.#46:27 Etsh. 7:14.

Josefu Ambenana la Jakoba

28Jakoba akatumi Juda la ntundu kandi dia ntutela Josefu dia ndi ntsho utsha la Ngoshena. Ku vo wakakumi lu kete ya Ngoshena. 29Okone Josefu akalongosola pusupusu kandi, akatshu utsha la Ngoshena la ntuhumana la Isariyele, shi. Lamʼakandawenyi, ndi akukhumbatela lu kingu, akaleli edja ukhumbatedi. 30Isariyele akatela Josefu ati: Aya dimi mvo, ne dia lambena elundji kaye ntu. We eki la lumu! 31Ku Josefu akatela anangu la wa lu luudu la shi ati: Dimi lambutsho le Farayo dia ntuwutela nti: Analingu la wa lu luudu la papa waki lu kete ya Kanana, wambukuma le mi. 32Apami ako elami wa dungalunga mbewo. Ulimu awo ku nunga dungalunga. Vo wakayi la dio kame la diango diawo tshe. 33Okone lamʼayunyeta Farayo dia nyumbula ati: Ulimu akona watunyutshaka? 34Kanyukaluya diui nyati: Shu ekambi aye, dungalunga mbatutulungaka umaka nshi yasu ya akenda edja ndu kakiane, ndu shu ndu washesu. Uma lu dikambu so mbayunyudjase lu kete ya Ngoshena, ne dia alami wa dungalunga weko wononyi le asi Edjibitu.

Currently Selected:

Etatelu 46: TLL

Highlight

Copy