Etatelu 44

Dikoho Diambushisho

1Josefu akatela ulami a luudu landi ati: Uludia paya yʼantu ane la mbu ya nde yediko yayuwukuka memba. Kukaluya ndu falanga ya untu lʼuntu lu paya kandi. 2Kudji dikoho diami dia fesa lu paya ka kushewo kame la falanga yakandela dia ndjusumba diango. Ulami akatshi uku akawutela Josefu. 3La pindju ka pee, vo wakakendja apami ako kame la punda yawo. 4Lamʼakawatumbi uma lʼusumba, watakumi etali, Josefu akatela ulami a luudu landi ati: Unela, uyeli apami aku. Lamʼayuyutuwanda, kuwambuli wati: Okoko wana wambunyukaluya kolo lu ololo? 5Kuwambuli ntu wati: Dikoho diatonokaka khumemi ndu diatulimbitshiyaka akambu, dio diaha le nyu? Nyakatshi kolo dia ntsha okone. 6Ulami a luudu akatuwanda lu mbuka. Ndi akawatela aui ako pupu. 7Ku vo wakûkaluya diui vati: Ukundi wata khumesu ngaso na? Kanyi ya ntsha dikambu dia wuhu oso yeko etali uma le su, shu ekambi aye. 8Uhenda, lamʼakatatani falanga lu paya yasu, shu kunkelayo uma lu kete ya Kanana? Ku ukundi ukukisu mvua paunyi kana fesa lu luudu la khumeye? 9Le one tshe layuyutana dikoho lʼatei wʼekambi aye, ndi kavu. Ndu shu tshe tayuyala fumbi ya khumesu. 10Ku ndi akati ati: Kawo, diayali uku watanyu. Untu tshe layutanema la dikoho, kayali fumbi kami. Ku nyu akina hanyuyala la unungu. 11Ku untu lʼuntu akasamanya dia nkitsha paya kandi lu kete, akakikelekula. 12Ku ndi akasadingula lu paya yawo, uma le lʼenundu pulu ndu le la kushi. Ku ndi akayutana dikoho lu paya ka Bendjamina. 13Ku vo wakatshatsha ahondo awo. Untu lʼuntu akahe diango diandi lu punda kandi, ku vo wakakalula utsha lʼusumba.

14Juda la anangu wakakumi laka Josefu, wakutani lamʼakawutshiki, wakayasungutula la kete la ntundu kandi. 15Ku Josefu akawambula ati: Na dikambu ne diakanyatshi? Nyu hanyeyi nyati: Untu uku dimi la wulu wa mbishula akambu wushami? 16Juda akati ati: Kayututela khumesu na? Aui akona wayutoteketa? Ukundi ayutuyayindja na? Unyashungu ambushula kolo kasu, shu ekambi aye. Shu tuyali fumbi kame la one lakatanemi la dikoho. 17Ku Josefu akakaluya diui ati: Kanyi ya ntsha wuhu oso yeko etali le mi. One lakatanemi la dikoho kayali fumbi kami. Keli nyu akina nyuneli, nyutshu la ki utsha le shenyu.

Juda Amboteketela Bendjamina

18Juda akasukana la le Josefu, akosengasenga ati: Khumemi, etawo ukambi aye akuteli diui. Tukaki ukambi aye kele, ne dia we keli uku Farayo. 19Khumemi, we akambula ekambi aye wati: Shenyu eko? Nyu la onengenyu ukina? 20Ku shu takakûkaluya diui shati: Khumesu, shesu eko, aya usumbi. Ndu onengesu lakandayuta lu nshi yandi yʼusumbi eko. Ona ako eki dikenda. Onangu lakuto la ndi utema otoi akavu, ndi ndame kambutshikala. Okone shi mbukaka ngandji efula. 21Ku we akatutela, shu ekambi aye, wati: Kanyutuyi la ndi le mi, dia dimi mbena la ashu ami dime. 22Ku shu takakûkaluya diui, we khumesu, shati: Ona ako heyi ntshika shi. Naka ndi ayutshika, keti shi mvo. 23Keli we akatutela, shu ekambi aye, wati: Naka kushenyu hayi la nyu, keti nyu hanyena elundji kami. 24Okone lamʼakatakumi le shesu, ukambi aye, shu takatuwutela aui aye. 25Ku shesu akatutela ati: Nyumutsho la ntusumba etenyi ka mbu ya nde. 26Ku shu takatuwutela shati: Shu hateyi ntsho, tshikima kushesu kutshwi la su ku shu ntsho. Mete shu hateyi mena elundji ka pami kako tshikima shu mbutshwi la kushesu. 27Ku ukambi aye, shesu, akatutela ati: Nyame mbeyaka nyati: Wademi akambutela ana ahendi wʼapami. 28Omotshi akamo uma la le mi, ku lakakani nti: Hasambi, nyama kakawundi, ne dia edja ndu elo latawenyi. 29Kakiane, naka nyu nyayombosa ndu one, ku dikambu dimotshi dia kolo diambutuyala le ndi, nyayotola ndjui yami la okei utsha lʼudimu a pengandu. 30Mete, lumu la papa, ukambi aye, lakakelekama wulu le ona. Okone naka layukalula le papa, 31ku ndi henyi ona lʼului asu, keti ndi mvo. Ku shu ekambiaye tayotola shesu la ndjui yandi la okei utsha lʼudimu a pengandu. 32Dimi, ukambi aye, laketawo le papa dia memba wutshu andi nti: Naka dimi handji la ndi, dimi kandjali la unungu andi pundju le ye. 33Okone lambukosengasenga nti: Etawo dimi, ukambi aye, ntshikali fumbi ka khumemi lu dihuli dia ona, keli ona kakaluli kame la anangu. 34Ukundi weyami nkalula le papa aha la ona? Dimi halangi ntena efula kʼokei kayuyala le papa.

Currently Selected:

Etatelu 44: TLL

Highlight

Copy