Etatelu 43

Anangu Josefu Wambuya la Bendjamina

1Ndjala ka kasha akatamanya mpangiya lu kete sho. 2Lamʼakashili mbu ya nde yakawela uma lʼEdjibitu, Jakoba akatela anʼandi ati: Nyumutsho, nyututusumbeli etenyi ka mbu ya nde. 3Juda akûkaluya diui ati: Pami kako akatokokomiya ati: Naka kushenyu hayi la nyu, nyu hanyeyi mena elundji kami. 4Naka we ayetawo ntuma kushesu kame la su, shu tayutsho la ntukusumbela mbu ya nde. 5Keli naka we hetawo mbutuma, shu hatutshu; ne dia pami kako akatokokomiya ati: Nyu hanyeyi mena elundji kami, tshikima kushenyu kuyi la nyu. 6Ku Isariyele akawambula ati: Okoko wana wakanyatuntshela kolo wuhu oso? Ukundi akanyatutela pami kako nyati: Shu la onengesu ukina? 7Keli vo wakûkaluya diui vati: Pami kako akatumbula akambu asu ndu akambu wa khumbu kasu ati: Shenyu eki la lumu? Nyu kema la onengenyu ukina? Ku shu takakaluya aui uku akandatumbula. Ukundi ututeya shati: Ndi ayututela ati: Kanyuyi la onengenyu? 8Juda akatela Isariyele ati: Unkimweli ona, katutshu la ndi mbayutuka, we ndu shu, ndu anʼasu. 9Dimi lambetawo unungu wa ona lʼote ami. Konombendi uma lu anya ami. Naka dimi hambukalusha la mbukimo le ye, dimi layuyala la unungu wa ona le ye pundju. 10Utunduyala shu kuntshimbatshimba, tshiki tambukalulaka etena ka hendi. 11Shewo Isariyele akawatela ati: Naka dikambu so diambuhika dia ndi ntsho, nyutshi okone. Nyosonole elua wuleki amena wa lu kete nye, nyudji lu paya yanyu, nyotole pami kako ushasha, etenyi ka diango diʼupumu uku yema yʼiso kʼushinga a wulu, yema yʼusanga, etenyi ka diango diʼepumu, ndu kasu la edika. 12Nyotole falanga tena pendi; keli kanyutshu ndu la falanga yakawanyukaluya lu paya yanyu, ne dia dikambu so diaki munga undu. 13Nyose onengenyu, nyutshu la ndi le untu ako. 14Unyashungu Kanga-Wulu-Tshe anyuhumuya lukulu lʼolo le pami kako, dia ndi nyukimwela onengenyu ukina ndu Bendjamina. Naka vo wayumpumbia anʼami, kawumpumbiawo. 15Lʼokongo diku anʼandi wʼapami wakose eshasha la falanga tena pendi kame la Bendjamina, wakunela, wakahulo utsha lʼEdjibitu; wakatemala la ntundu ka Josefu.

16Lamʼakenyi Josefu ati; Bendjamina ambutuya la wo, ndi akatela ulami a luudu landi ati: Otshiya apami ane lu luudu, udiaki nyama kemotshi. Olongosole dambu, ne dia vo wayole kame la mi la midi. 17Ulami ako akatshi uku akawutela Josefu, akawaotshiya lu luudu la Josefu. 18Vo wakuki woma lamʼakandawaotshiya lu luudu la Josefu; wakatanela vati: Vo wambutotshiya lu luudu lu dikambu dia falanga ku yakatatani lu paya yasu etena ka ntundu. Vo wutuyanga la dikambu dia ntunda fumbi, la ntohotola punda yasu. 19Vo wakasukana le ulami a luudu la Josefu lakemadi la suku dia luudu, wakawutela vati: 20We khumesu, shu takayi etena ka ntundu la ndjusumba mbu ya nde, 21ku lamʼakatatukuma la pangu, shu takakelekula paya yasu, tenyi ku falanga ya untu lʼuntu nye yeli lu paya kandi. Ku falanga yasu tshe kukeli. Shu tambukalula la yo lu anya asu ntu. 22Shu takela ndu falanga kina ya ndjusumba mbu ya nde. Hateyi untu lakayudja falanga yako lu paya yasu. 23Ndi akawatela ati: Ki kayali la nyu. Tanyukaki woma, Unyashungu anyu, Unyashungu a shenyu, kakanyudjela falanga lu paya yanyu. Dimi lakalungula falanga yanyu. Ndi akawaela Simeyona laki lu lukanu. 24Ku ulami ako akawaotshiya lu luudu la Josefu, akawasha ashi, ku vo wakasuli ekulu. Ndi akasha punda yawo mbu ya nde. 25Lamʼakawakungaka Josefu, vo wakalongosola ushasha awo, ne dia wakuki lukumu ati: Nyayole ma lakandi la midi.

26Lamʼakakumi Josefu lakandi, wakawusha ushasha wakawawela, wakukhusamela. 27Ndi akawambula ati: Nyu la wulu? Ndu usumbi wa shenyu lakanyamvutelaka eki la lumu? Ndi la wulu? 28Vo wakûkaluya diui vati: Ukambi aye, shesu, eki la lumu ndu eki la wulu. Ku vo wakakole ete, wakolemia. 29Josefu akedia ashu, akendi kushendi Bendjamina, lakuto la ndi utema otoi; akawambula ati: Ndi kushenyu lakanyamvutelaka one? Ndi akawutela ati: Onʼami Unyashungu akuki ketshi! 30Josefu akayala la ulingulingu dikambu dia kushendi. Ku lamʼakandayangi ntundo la delu, ndi akasamanya dia mboto lu luudu landi lomotshi, akatulela loko. 31Ndi akotsha elundji, akatumbi, akayakimela; akati ati: Nyela ma. 32Okone wakalongoswela Josefu dihuli diandi ndame, la anangu dihuli diawo vame, ndu asi Edjibitu wakalekaka ma lakandi, dihuli diawo vame, ne dia asi Edjibitu kondekaka la asi Heberu ma kame. Dikambu so diaki wononyi lu ashu wʼasi Edjibitu. 33Anangu Josefu wakadjase la ntundu kandi uku akawahonyi lʼeutwelu kawo. Vo wakendanaka wamba efula. 34Josefu akakahela ma diaki la ntundu kandi. Ndi akasha Bendjamina tena tanu ndeka akina. Vo wakano, wakangenangena kame la ndi.

Currently Selected:

Etatelu 43: TLL

Highlight

Copy