Etatelu 42

Anangu Josefu Wambuya lʼEdjibitu

1Lamʼakuki Jakoba ati: Mbu ya nde yeko lʼEdjibitu, ndi akambula anʼandi ati: Ukundi wendananyu na? 2Nyulungi, dimi lakuki lukumu ati: Mbu ya nde yeko lʼEdjibitu. Nyuhulo utsha leko, nyutusumbi mbu ya nde, mbayutuka la ndjala.#42:2 Etsh. 7:12. 3Anangu Josefu dikumi wakahulo utsha lʼEdjibitu la ntusumba mbu ya nde. 4Jakoba kuntuma Bendjamina, kushi a Josefu, kame la wo. Ndi akuki woma ati: Dikambu dimotshi dia kolo diatukutuyala le ndi lu mbuka. 5Ana apami wa Isariyele wakatshu, wakatemala kame la antu akina lʼEdjibitu dia nsumba mbu ya nde, ne dia ndjala ka kasha kaki wulu lu kete ya Kanana. 6Josefu aki umbuledi a kete sho. Ndi akasundjaka antu mbu ya nde lu kete yako. Anangu Josefu wakayi, wakayukhusamela, wakakole ete awo. 7Lamʼakenyi Josefu anangu, ndi akawaeyi, keli ndi kundjashula le wo. Ndi akateketa la wo aui wa wulu; akawambula ati: Uma lendi uyenyu na? Vo wakûkaluya diui vati: Uma lu kete ya Kanana kuyesu, dia ndjusumba mbu ya nde. 8Josefu akeyi anangu, keli vo kumbeya. 9Josefu akuho alo wakandenaka dikambu diawo,#42:9 Etat. 37:5-10. ku ndi akawatela ati: Atopi mbenyu! dia ndjukemba kete nye mbuyenyu. 10Ku vo wakûkaluya diui vati: Kema, khumesu, la ndjusumba mbu ya nde kuyesu, shu ekambi aye. 11Ana wa shesu otoi mbesu. Ekambi aye kema atopi, antu wa shikaa mbesu. 12Ndi akakaluya diui ati: Nduku! paka dia ndjukemba kete mbuyenyu. 13Ku vo wakawutela vati: Shu ekambi aye teko ana apami dikumi la ahendi. Ana wa untu otoi, ludjashi lu kete ya Kanana, mbesu. Kushesu akatshikala la shesu, keli ukina kemako. 14Josefu akakaluya diui ati: Osoku mbakamanyutedi nti: Atopi mbenyu. 15Tayuhimba mete kanyu lu dikambu ne. Lu lukumbu la Farayo! nyu hanyunyia ekulu anyu uma lane tshikima kushenyu ako ambuya. 16Nyutumi omotshi uma lʼatei anyu dia ntosa kushenyu, nyu akina nyutshikali lu lukanu. Osoku mbayutuhimba aui anyu kana mete katanyu. Naka kema, lu lukumbu la Farayo! atopi mbenyu. 17Ku ndi akawadji nshi shatu lu lukanu vo tshe. 18Lushi la satu Josefu akawatela ati: Dimi mbukaka Unyashungu woma, nyutshi okone mbayunyutshikala la lumu. 19Naka antu a mete mbenyu, onengenyu omotshi atshikali lu lukanu. Keli nyu akina tshe nyutshu, nyotole mbu ya nde dia ntulesha khumbu yanyu. 20Kanyumbela kushenyu dia dimi mbeya mete kanyu, okone mbahanyuvo. Ku vo wakatshi osoku. 21Vo wakatanela vati: Shu teki la unungu lu dikambu dia kushesu. Shu takenyi okei andi lamakandatosengasengaka, keli shu kumbukela, diako mbambutuyala la sui ne. 22Rubena akakaluya diui ati: Dimi kunyosengasenga nti: Tanyutshelaki ona one kolo?#42:22 Etat. 37:21-22. Keli nyu kumbukelami, diako mbambutolombama dikila diandi. 23Vo kumbeya vati: Josefu mbeyaka oteketa asu. Tena tshe diakateketaka Josefu la wo, ukadimudi akakadimulaka aui awo. 24Josefu akamo la le wo, ku ndi akatulela. Ndi akayoteketa la wo ntu, akandi Simeyona uma lʼatei awo, akukeleka molola la ntundu kawo. 25Josefu akatela ekambi dia vo ndudia paya yawo too la mbu ya nde, ndu dia nkaluya falanga ya untu lʼuntu lu paya kandi. Ndi akawatela dia vo mbasha ndu pamba ya vo ntalekaka lu mbuka. Ku vo wakatshi uku akandawatela.

26Vo wakahe mbu ya nde ladiku dia punda yawo, wakunela uma leko. 27Ku omotshi lʼatei awo akadihula paya dia ndesha punda lu dihuli diakawahangi. Enyi ku falanga nye yeli lʼunyo a paya. 28Ku ndi akatela anangu ati: Wakakalusha falanga yami! Yo nye yeli lu paya kami. Ku asulu awo wakate. Ku vo wakambwana vati: Dikambu kuna diambututshela Unyashungu okone? 29Vo wakakalula lu kete ya Kanana le shewo Jakoba. Vo wakatuwutela akambu tshe wakayala le wo, vati: 30Umbuledi a kete sho akateketaka la su paka aui wa wulu; akatukani ati: Atopi wa kete yawo mbesu. 31Shu takawutela shati: Shu kema atopi, antu wa shikaa mbesu. 32Anangu dikumi la ahendi mbesu, ana wa shesu otoi. Otoi utu mbeli kema, ku kushesu akatshikala la shesu lu kete ya Kanana. 33Untu leli umbuledi lu kete sho akatukaluya diui ati: Layunyuhimba okone dia mbeya kana antu wa mete mbenyu. Nyutshiki onengenyu omotshi lindu. Nyose mbu ya nde dia ntulesha khumbu yanyu, nyutshu. 34Kanyumbela kushenyu. Okone mbayumulimbitela nti: Nyu kema atopi, antu wa shikaa mbenyu. Ku dimi layunyukimwela onengenyu, ku nyayetetaka lu kete nye uku alanganyu.

35Lamʼakawahungula diango diaki lu paya yawo, wenyi ku falanga ya untu lʼuntu nye yeli lu paya kandi. Lamʼakawenyi falanga, vo la shewo wakuki woma efula. 36Shewo Jakoba akawatela ati: Nyu nyambumanela anʼami. Josefu kema, Simeyona kema, ku nyati: Tose ndu Bendjamina. Akambu ane tshe ndjakaka paka lʼote ami. 37Ku Rubena akakaluya shi diui ati: Naka dimi hankalusha Bendjamina le ye, kudiaki anʼami wʼapami ahendi. Dikambu otoi, umbidjendi lʼanya, ku layukaluya le ye. 38Ku Jakoba akûkaluya diui ati: Onʼami hatshu la ye. Onangu akavu, paka ndi ndame kambutshikala la mi. Naka dikambu dimotshi dia wulu diayutuyala le ndi lu mbuka, nyu yayotola ndjui yami la okei utsha le wapapa.

Currently Selected:

Etatelu 42: TLL

Highlight

Copy