Etatelu 32

Jakoba Ambuyalongosola dia Ntuhumana la Esau

1Jakoba akakimela mbuka, ku andjelo wa Unyashungu wakahumana la ndi. 2Lamʼakawaenyi Jakoba, ndi akati ati: Ului wʼandjelo wa Unyashungu one. Ku ndi akole dihuli diako ati: Mahanayima (kitshimudi ati: Elui ehendi wʼantu).

3Jakoba akatumi akendji utsha lu kete ya Seire lu ieke la Edome le Esau, onangu. 4Ndi akakokomiya ati: Kanyututeli khumemi Esau nyati: Ukambi aye Jakoba kata ati: Dimi lakatudjase laka Labana, lakatshikala leko edja ndu nshi nye. 5Dimi lakatuyala la ngombe, punda, la dungalunga, ekambi wʼapami la ekambi wʼamantu. Kakiane dimi lambutuma akendji dia nkutela we khumemi lukumu lone, ndu dia we mbukami ketshi. 6Lamʼakakalula akendji le Jakoba, vo wakawutela vati: Shu takatukuma le onanyo Esau. Enda, ndi lu ndjayi la apami kama nyei dia ndjuhumana la ye. 7Jakoba akuki woma efula, akasaki lukumba. Ku ndi akakahanya antu waki la ndi, ndu dungalunga la kamelo lu elui ehendi. 8Ndi akati ati: Naka Esau ayolosha ului omotshi, ku ului wutshikadi wayuhanda. 9Jakoba akalombe ati: We Unyashungu a tshemi Abarahama, Unyashungu a papa Isaka, Latuyalaka li! we kakamvutela wati: Ukaluli lu kete yaye, ndu lu diuhu diakayuto, ku layutukutshela ololo. 10Mete, ololo ami hakuki dia we mbukami ketshi la ngandji uku akayantshela. Dimi ukambi aye, lakateho Jorodana nye la danga tu. Keli ka Kiane laya la elui ehendi wʼantu. 11Dimi lamfiukosengasenga nti: Unshimbeli uma lʼanya wa onalingu Esau; ne dia dimi mbukaka woma efula, nti: Atukuyundjaka, dimi la wali ndu ana. 12We kakamvutela wati: Dimi layukutshela ololo, layufudia tukanula taye uku lokongo latuyalaka lʼumamu wʼashi a waki,#32:12 Etat. 22:17. laheyi untu mbala.

13Ndi akalali lu dihuli diako lʼutshu; akasanganya diango diaki la ndi dia ntumela Esau, onangu, eshasha: 14esamalu a mbudi kama hyendi, weumbi akumi ahendi, ekoko a wadi kama hyendi, la ekoko a waumi akumi ahendi. 15Kamelo ya wadi akumi asatu kame la ana ayo wakatalomaka, ngombe ya wadi akumi anei, la ya waumi dikumi, la punda ya wadi akumi ahendi la ya waumi dikumi. 16Ku Jakoba akakime limba la limba le ekambi andi. Ndi akawatela ati: Nyeti la ntundu kami ndu kanyutshiki dihuli lasa limba la limba. 17Ndi akatela ulami wa limba la ntundu ati: Lamʼayuyuhumana la onalingu Esau, naka ndi ayukumbula ati: Usika na eye? La utsha lendi atayatshu? Ukanga limba lone la dungalunga latatshu la ntundu kaye na? 18Kukaluya diui wati: Lʼukambi aye Jakoba mbelo. Lo leli ushasha wakandakutumedi, we khumemi Esau. Enda, ndu ndame lu ndjayi lʼokongo asu. 19Diui diako mbakandatela ndu ulami wa hendi, wa satu, ndu le wane tshe wakayayakaka lʼokongo la nyimba ya dungalunga; ati: Osoku mbayunyutatelaka khumemi Esau, ului lʼului lamʼayunyutahumanaka la ndi. 20Kanyutawutelaka ntu nyati: Ndu ukambi aye Jakoba ndame kayayi lʼokongo asu. Ndi akati lʼutema ati: Dimi layuwumula kele la ushasha one wamumutuma la ntundu kami. Lʼokongo diku layenana la ndi dime, kana ndi anungulaka ololo. 21Okone ushasha andi aketi la ntundu kandi, keli ndi akatshikala lʼutshu uku lʼului wʼasikandi.

Jakoba Ambolo la Ondjelo la Penuele

22Ndi aketo lʼutshu ako, ndi la wadiendi ahendi la ekambi andi wʼamantu ehendi, la anʼandi dikumi la otoi, wakateho Jakoba. 23Ku ndi akatehuya la wedi a kyoko, vo la diango tshe diaki la ndi. 24Keli Jakoba akatshikala leko ndame. Ku pami kemotshi akalo la ndi ta edja ndu unya lasuki la mputo. 25Lamʼakenyi pami kako ati: Dimi kema la wulu wa mbumba, ndi akukimela wulu lʼeshisha wa la tshina diʼehelohelo. Ku eshisha wa lʼehelohelo ka Jakoba wakatewo lamʼakandalokaka la ndi. 26Pami kako akatela Jakoba ati: Unkimo ntshu, ne dia unya utsha mputo. Ku Jakoba akûkaluya diui ati: Dimi hakukimo tshikima we ambuntatshokodi. 27Pami kako akawumbula ati: Lukumbu laye na? Ku ndi akûkaluya diui ati: Jakoba. 28Ndi akawutela ntu ati: Lukumbu laye haluyuyala Jakoba ntu, keli layali Isariyele#32:28 Etat. 35:10. (kitshimudi ati: Ndo la Unyashungu), ne dia we ambolo la Unyashungu ndu la antu, ku we ambuyala undeki a wulu. 29Jakoba akosengasenga ati: Umvuteli lukumbu laye. Ku ndi akawumbula ati: Dikambu kuna diamumbulaye lukumbu lami? Ku ndi akatshokola. 30Jakoba akole dihuli diako ati: Peniele (kitshimudi ati: Elundji ka Unyashungu). Ku ndi akati ati: Dimi lakenyi elundji ka Unyashungu ku dimʼone eki la lumu. 31Unya akuhutwela lamʼakandatetaka la Penuele. Ndi akatatengunaka, ne dia eshisha wʼehelohelo kandi wakakoko. 32Uma lu dikambu diako mbahatolekaka asi Isariyele ushisha wʼehelohelo ka nyama edja ndu elo, ne dia one lakalo la Jakoba akotewola eshisha wʼehelohelo kandi.

Currently Selected:

Etatelu 32: TLL

Highlight

Copy