Etatelu 31

1Jakoba akuki aui wakataka ana apami wa Labana vati: Jakoba akose diango tshe dia shesu. Uma lu diango dia shesu mbambunduyala la ongonyi one. 2Jakoba akenyi ati: Elundji ka Labana kema la ongenongeno le mi uku nshi ya ntundu. 3Ku Latuyalaka akatela Jakoba ati: Ukaluli lu kete ya washo, lu dihuli diakayuto, ku dimi layuyala la ye. 4Jakoba akatumi dikendji le Ratshele la Lea dia vo ndja uya lʼusui wakalekaka dungalunga diandi. 5Ku ndi akawatela ati: Dimi handjena elundji ka shenyu okone akimi la ndi ntundu. Keli Unyashungu a papa eko la mi. 6Nyu nyame mbeyaka uku akamakambela shenyu ulimu la wulu ami tshe. 7Keli shenyu akankesaka, akakadimulaka difutu diami ekadimula dikumi, keli Unyashungu kunanga dia ndi ntshelami kolo. 8Lamʼakandati ati: Dungalunga diʼawungu awungu mbayuyala difutu diaye, ku dungalunga tshe diakuti ana wʼawungu awungu. Ku lamʼakandati ati: Dungalunga diʼeshidi eshidi mbayuyala difutu diaye, ku dungalunga tshe diakuti ana wʼeshidi eshidi. 9Okone Unyashungu akose dungalunga dia shenyu, akambishadio. 10Lamʼakakhukulaka wadi wa dungalunga, dimi lakenyi do lʼutshu. Lu do diako, menyi ku waumi wa dungalunga wʼeshidi eshidi, wʼawadi awadi ndu wa dikesekese wahema wadi wa dungalunga ako. 11Ku ondjelo wa Unyashungu akene le mi lu do, akambeti ati: Jakoba! Ku dimi lakûkaluya diui nti: Dimʼone. 12Ndi akamvutela ati: Enda, waumi wa dungalunga tshe wahemi wadi, vo tshe weko eshidi eshidi la awadi awadi, la dikesekese, ne dia lakenyi okone atukutshelaka Labana. 13Dimi leli Unyashungu lakene le ye la Betele, lene akayatakitshi iso lʼekoho ndu akayantatshikedi daka.#31:13 Etat. 28:18-22. Unela kakiane, umo uma lu kete nye. Ukaluli utsha lu kete yakayuto. 14Ku Ratshele la Lea wakûkaluya diui vati: Diango kana ukito, keki la su ntu naʼAlungamelasu ntu lu luudu la shesu? 15Ndi akatusundja, ambolekaka mbu lu alimba asu. Aha uku asi wedja mbenamasu lu ashu andi uka? 16Ekundji tshe wakose Unyashungu uma le shesu, wambuyala ekundji asu ndu wa anʼasu. Utshi tshe uku akakutela Unyashungu.

Jakoba Ambulawo Labana

17Jakoba akunela, akahe anʼandi la wadiendi lu kamelo. 18Ndi akunela la dungalunga diandi tshe, la diango tshe diakandakundja la Padana-Arama. Ndi akatshu la dio utsha le Isaka, shi, lu kete ya Kanana. 19Etena kako Labana aki lʼusui lu mpimbula ekoko andi diosa. Ratshele akavi dikishi dia shi. 20Jakoba akakesi Labana, usi Arama. Ndi akunela lu usheshe, kumbutela nduku diui. 21Ndi akunela esadi la diango diandi tshe, akatuteho ndjali ka wuki Eyufarate, akelela utsha lu leke lʼakuna wa Ngiliyade.

22Lushi la satu la lokendo landi, wakayutela Labana vati: Jakoba ambukulawo. 23Ku Labana la anangu wakuyeli nshi esambeli. Vo wakatuwunda lu leke lʼakuna wa Ngiliyade. 24Keli Unyashungu akene le Labana, usi Arama, lu do lʼutshu. Ndi akawutela ati: Ewo, toteketaki diui diʼololo kana dia kolo le Jakoba.

25Ku Labana akakumi la le Jakoba. Jakoba akahiki luudu landi la dipema lu leke lʼakuna wa Ngiliyade. Ndu Labana la anangu wakatuhika lawo lu leke lʼakuna wa Ngiliyade. 26Labana akambula Jakoba ati: Kakayatshi na? Okoko wana wakayankesi ndu wakayandawo la anʼami lu usheshe, uku antu wakayatandji lu ta? 27Okoko wana wakayalawo lu usheshe, wakayankesi, aha tamvutedi? Dimi lutukukimo la ongenongeno a wuki wutuyala la kimbu, akimbi, la sese. 28We kumbetawo dimi ntalakanyi la anʼami wʼapami ndu anʼami wʼamantu. We akatshi uku enginya. 29Mete, dimi la wulu wa nkutshela kolo. Keli lʼutshu wʼelo Unyashungu a sho akamvutedi ati: Ewo, toteketaki diui diʼololo kana dia kolo le Jakoba. 30Kuyanga we nkumbulaka ntenana la khumbu ka sho, bundi kakayatavi dikishi diami? 31Jakoba akakaluya Labana diui ati: La woma mbakamunela shashimuya nti: We utukompotola anʼaye wʼamantu la khudu. 32Ku le untu tshe layuyushula dikishi diaye, ndi kadiakemi. Anengesu weko la ntundu kasu uku emenyi. Uyangi engo keli kaye lʼatei a diango diengi la mi. Naka we ambukitana, ukiose. Jakoba kumbeya ati: Ratshele kakatavi dikishi diako.

33Labana akoto lu luudu la dipema la Jakoba, ndu la Lea, ndu ya ekambi a amantu ehendi, keli ndi kudishula. Ku ndi akatumbi uma lu luudu la dipema la Lea, akoto lu luudu la Ratshele. 34Keli Ratshele akose dikishi diako, akadishe la tshina diʼedie kakandadjaseka lu kamelo, akadjase ladiku diato. Ku Labana akayangiayangia lu luudu landi tshe, keli kudishula. 35Ku Ratshele akatela shi ati: Khumemi, tumbukaki kele, ne dia dimi hamemadi la ntundu kaye. Kandji katuyalaka la amantu keli la mi. Ku Labana akayangi dikishi diandi, keli kudishula.

36Jakoba akumala, akami la Labana. Ndi akawumbula ati: Na unungu kana kolo kakamatshi, kayayandjeli luhelu lutu la kele ka mamba okone na? 37Lamʼakiye lu nyangiayangia lu diango diami tshe, engo kaye kakona kakayatanyi? Ukitundja lane la ntundu ka analingu ndu ka ananyo, keli vo watusambuli, shu ahendi. 38Enda, deku akumi ahendi ne diakimi lakaye, nduku elungalunga kaye ka wadi kakalanya diemi diato. Ntu dimi konde kuyanga okoko otoi wʼumi uma lu nyimba yaye ya dungalunga. 39Dimi kunkelaka nyama ya dungalunga diakandama le nyama ya ngala. Keli dimi lakakufutaka ushinga adio dime. We akanombaka kene tshe kakawamvuaka la yanyi ndu tshe kakawamvuaka lʼutshu. 40Dimi lakadienaka la luhaladi la yanyi, la tshitshi kʼutshu, ndu lʼengundu lʼutshu. 41Enda deku akumi ahendi diakamadjashi lu luudu laye! Dimi lakakukambela ulimu deku dikumi la nei lu alimba wa anʼaye wʼamantu ahendi, ku deku samalu, ne dia limba laye la dungalunga. Keli we akakadimulaka difutu diami ekadimula dikumi. 42Utunduyala Unyashungu a papa, Unyashungu a Abarahama, Woma wa Isaka, taki la mi, we utunkaluya anyanya atu utsha lakasu. Unyashungu akenaka asui ami ndu tumu yakamakambaka, diako mbakandakulumbusha lʼutshu wʼelo.

43Labana akakaluya Jakoba diui ati: Ana amantu ane weli anʼami la ana apami ane weli anʼami, ndu nyimba ya dungalunga nye yeli yami, ndu kene tshe kenaye, kami keto. Na dikambu diayumutsha la anʼami wʼamantu kana anʼawo wakawuti la ye? 44Yaka, tokote lusalu, dimi la ye. Ku ekotelo ka lusalu kene kayali omenyi lʼasami la ye. 45Jakoba akose dive dimotshi, akadieme uku ekoho. 46Jakoba akatela anangu ati: Nyutshumanya ave. Ku vo wakatongona ave, wakamotsha ului. Vo wakali ma lʼutshimba awo. 47Labana akole ului ako wʼave (lʼoteketa wʼasi Arama) ati: Jengare-Sahaduta (kitshimudi ati: Ului wʼomenyi). Keli Jakoba akawole (lʼoteketa wʼasi Heberu) ati: Ngaleda (kitshimudi ati: Ului wʼomenyi). 48Labana akati ati: Ului one wʼave wayali omenyi lʼasami la ye. Diako mbakawole ului ako lukumbu vati: Ngaleda. 49Vo wakawole ntu vati: Mizipa (kitshimudi ati: Nama); ne dia Labana akati ati: Latuyalaka atulamaki shu ahendi lamʼayutushishanya. 50Naka we ayusuya anʼami wʼamantu, kuyanga ntshuka wadi akina ladiku diawo, ewo, nduku untu layuhakema lʼasami la ye, tshikima Unyashungu kayuyala omenyi. 51Labana akatela Jakoba ati: Endi ului one wʼave la ekoho kene ka dive kakameme lʼasami la ye. 52Ului one wʼave la ekoho kene ka dive wayali ulelu lʼasami la ye. Dimi talekanaki utsha le ye, ndu we tulekanaki uya le mi, dia shu ntshanela kolo. 53Unyashungu a Abarahama, Unyashungu a Nahora, Unyashungu a shewo, kayali usambudi asu. Ku Jakoba akatshibi Woma wa shi, Isaka. 54Jakoba akalambula ulambu ladiku diʼukungu. Ndi aketi anangu la ndjole ma. Ku wakatshikala utshu uku ladiku dia ukungu. 55Labana aketo la kesekese, akalakana la ekana andi la anʼandi wʼamantu, akatshokola. Ku ndi akunela, akakalula utsha lakandi.

Currently Selected:

Etatelu 31: TLL

Highlight

Copy