Etatelu 30

1Lamʼakenyi Ratshele ati: Dimi latutela Jakoba nduku ona, ndi akuki enundu andi kandjema. Ndi akatela Jakoba ati: Umbisha ana. Naka kema, ku dimi mvo. 2Ku Jakoba akuki Ratshele kele; akawumbula ati: Dimi kaya Unyashungu lakakushimbi mbuta uka? 3Ku Ratshele akawutela ati: Biliha, ukambi ami a umuntu one. Uwose, ayali uku wadeye, kana ndi ayutaka, kandedia ona. Uma le ndi kayumuyala ndu dimi, la ana. 4Okone ndi akawusha ukambi andi a umuntu uku wadi. Ku Jakoba akeyana la ndi. 5Biliha akatshu diemi, akuti la Jakoba ona pami. 6Ku Ratshele akati ati: Unyashungu akuki diui diami, ambusambula dikambu diami ololo, mbambundumbisha ona pami. Okone ndi akawole lukumbu ati: Dane (kitshimudi ati: Nsambula). 7Biliha, ukambi a umuntu wa Ratshele, akatshu diemi ntu, akuti la Jakoba ona pami. 8Ratshele akati ati: Dimi lakaloshanya la enundu ami, ku lakuleki wulu. Okone ndi akawole lukumbu ati: Nafetali (kitshimudi ati: Ndoshanya).

9Lamʼakenyi Lea ati: Dimi lambutukuyemala, aha mbuta, ndi akose Zilipa, ukambi andi a umuntu, akawusha Jakoba uku wadi. 10Ku Zilipa, ukambi a umuntu a Lea, akayuta la Jakoba ona pami. 11Lea akati ati: Ndi diese li! Okone ndi akawole lukumbu ati: Ngada (kitshimudi ati: Diese). 12Ku Zilipa, ukambi a umuntu a Lea, akuti la Jakoba ona pami la hendi. 13Ku Lea akati ati: Ongenongeno wa mamba mbukami, ne dia ana amantu wayumvutaka vati: Kanga ongenongeno kendi. Okone ndi akawole lukumbu ati: Ashere (kitshimudi ati: Ongenongeno).

14Lamʼaketetaka Rubena lʼusui lu nshi ya dinela, ndi akatushula asusu, akawaela Lea, nyangu. Ku Ratshele akasengasenga Lea ati: Umbisha asusu amotshi wʼuma le onʼaye. 15Ku ndi akûkaluya diui ati: Undi, dikambu diku diakayampotola umemi tshitshe mbedio lu ashu aye, mbalangaye mpotolami ndu asusu wakambela onʼami? Ratshele akati ati: Kawo, Jakoba ketami la ye lʼutshu one, dia nifuta ushinga wa asusu wakakela onʼaye. 16Lamʼakakalula Jakoba uma lʼusui la dikolo, Lea akatshu la ntuhumana la ndi. Ndi akawutela ati: Kuyetami la mi, ne dia dimi lakakusumbi la asusu wakambela onʼami. Ku ndi aketama la ndi lʼutshu ako. 17Unyashungu akuki dombelo dia Lea. Ku ndi akatshu diemi, akuti la Jakoba ona pami la tanu. 18Lea akati ati: Unyashungu ambumbisha difutu diami, ne dia dimi lakakimo ukambi ami a umuntu le umemi. Ku ndi akole ona lukumbu ati: Isakara (kitshimudi ati: Difutu). 19Ku Lea akatshu diemi ntu, akuti la Jakoba ona pami la samalu. 20Lea akati ati: Unyashungu ambumbisha ushasha wʼololo. Kakiane umemi ayudjase la mi, ne dia lambuta la ndi ana apami asamalu. Ku ndi akawole lukumba ati: Zebuluna (kitshimudi ati: Mbidjase). 21Lʼokongo diku ndi akuti ona umuntu; akawole lukumbu ati: Dina. 22Ku Unyashungu akuho Ratshele. Ndi akuki dombelo diandi, akawete kanga diwutshi. 23Ku ndi akatshu diemi, akuti ona pami. Ndi akati ati: Unyashungu ambuminya lu sonyi. 24Okone ndi akawole lukumbu ati: Josefu (kitshimudi ati: Nkukiya), ata ati: Latuyalaka kankukiya ona pami ukina.

Jakoba la Labana Wambukesana

25Lamʼakuti Ratshele Josefu, Jakoba akatela Labana ati: Unkimo keli ntshu lakasu, lu kete yasu. 26Umbisha wadiemi la anʼami wakamakukambela ulimu dikambu diawo, keli ntshu, ne dia we mbeyaka ulimu wakamakukambelaka. 27Ku Labana akawutela ati: Naka dimi lambuhumo lukulu lʼolo lu ashu aye, utshikali la mi, ne dia dimi lambena nti: Latuyalaka akantshokola lu dikambu diaye. 28Labana akawutela ati: Umvuteli yediko ya difutu shikaa, keli nkushadio. 29Jakoba akûkaluya diui ati: Weme mbeyaka uku akamakukambela ulimu ndu uku akayala dungalunga diaye lamʼakamadilamaka. 30Etenyi ka tshitshe kakamakutani la to kambufulanela, aya efula kaheyama mbala. Latuyalaka akakotshokola lu dihuli tshe diakamakamela. Keli kakiane, etena kakona kayumukambela luudu lami ulimu? 31Ku Labana akawumbula ati: Kalangaye dimi nkusha na? Jakoba akakaluya diui ati: Tumbishaki nduku engo. Keli naka we ayetawo dikambu diayangami nkutela ne, dimi layulamaka, ndu layuleshaka dungalunga diaye ntu. 32Elo, dimi layukindula lʼatei a dungalunga diaye tshe. Ku dimi layosonola uma lʼatei wʼekoko, ene tshe weli awadi awadi la awungu awungu, ndu ene tshe weli edima tshududu. Ku dimi layosonola uma lʼatei a mbudi, nye yeli awungu awungu la awadi awadi. Sho mbayuyala difutu diami. 33Akambu ami wʼusimbwi wayukumanya lumu lami fundu lamʼayuyuya etena kemotshi la ndjenda difutu diami. Naka mbudi kaha awadi awadi la awungu awungu kana okoko waha tshududu wayutanema lu leke lami, keti kanga uvi kemi. 34Labana akûkaluya diui ati: Kawo! Diayali uku diui diaye. 35Okone lushi lako Labana akanya weumbi wa mbudi tshe waki eshidi eshidi la awungu awungu, ndu esamalu tshe waki awadi awadi la awungu awungu, ndu nye tshe yaki la awadi a wema. Ndi akanya ndu uma lʼatei wʼekoko ene tshe waki tshududu. Ndi akayikimo tshe lʼanya wa anʼandi. 36Ku ndi akamamitwana la Jakoba etali uku yediko ya lokendo la nshi shatu. Ku Jakoba akaleshaka limba la dungalunga dia Labana lakatshikala.

37Jakoba akakote tahi yʼeyuyu yʼusumba, ya dipenge, la ya lokonga. Ndi akayiuwula pusu eshidi eshidi, dia eshidi wa wema wʼutamba menamaka. 38Ndi akakitsha tahi tshe yakanduwula lu teti yakanokaka dungalunga ashi. Wadi wa dungalunga wakakhukulaka lamʼakawatshokaka la ntono ashi. 39Ku dungalunga dia wadi diakatshokaka waemi lasuki la tenyi diʼetamba diako. Dio diakutaka ana wʼeshidi eshidi, wʼawadi awadi, ndu wʼawungu awungu. 40Ku Jakoba akatanya ana wʼekoko. Ndi akakitsha tshe wʼeshidi eshidi ndu ene tshe wʼedima dihuli dikina. Ku ndi akediya dundji dia dungalunga dia Labana utsha le wo. Keli ndi akayakitshiya dungalunga diandi amʼakina, ne dia dio diatukosohana la dia Laana. 41Tena tshe diakakhukulaka ekoko a wadi waki la wulu, Jakoba akakitshaka tenyi diʼetamba lu teti la ntundu kawo, dia vo ntsho waemi lamʼakiwo lasuki la tenyi diako diʼetamba. 42Keli lamʼakayakaka wadi wa dungalunga diʼetshidu la wodu, ndi kumbidjaka tenyi diʼetamba loko. Okone dungalunga diʼetshidu la wodu diakayalaka le Labana, keli dungalunga dia waki la wulu diakayalaka le Jakoba. 43Ku Jakoba akatangonanelaka otekoya. Ndi akayala la nyimba ya waki ya dungalunga, ekambi wʼamantu la ekambi wʼapami, kamelo la punda.

Currently Selected:

Etatelu 30: TLL

Highlight

Copy