Etatelu 29

Jakoba Ambukimbela Labana Ulimu Dikambu dia Lea le Ratshele

1Jakoba akakolamela lokendo landi, akatukuma lu kete yʼantu wa lu leke lʼehutwelu ka unya. 2Ndi akedia ashu, enyi ku nyimba shatu yʼekoko yetami lasuki lʼeteko kʼashi. Dive dia wuki diaki lʼunyo wʼeteko kako kakawanoshaka nyimba tshe ya dungalunga. 3Elami wʼekoko wakamotsha nyimba tshe ya dungalunga laawo. Vo wakangitula dive diaki lʼunyo wʼeteko, wakanosha nyimba yako ashi, ku wakakaluya dive lʼunyo wʼeteko. 4Jakoba akambula alami wʼekoko ati: Analingu, asi na wenyu? Ku vo wakûkaluya diui vati: Asi Harana mbesu. 5Ndi akawambula ati: Nyu mbeyaka Labana, onʼa Nahora? Ku vo wakûkaluya diui vati: Shu mbeyaka. 6Ku ndi akawambula ati: Undi, ndi la wulu? Vo wakukaluva diui vati: Ndi eko la wulu. Ndu Ratshele, on andi a umuntu, uku ayayi la limba lʼekoko. 7Ndi akati ati: Kakiane unya eki lʼatei ote. Ushidi wa mbotshiya dungalunga atakuki. Nyutanoshisha ekoko ashi, keli nyutshu la ntelesha adiyu. 8Ku vo wakûkaluya diui vati: Kema. Shu hateyi ntsha osoku tshikima nyimba tshe yambomotshama kame. Ku elami tshe ndjungitula dive uma lʼunyo wʼeteko, ku ndjonosha ekoko ashi. 9Kamʼakandateketaka, ku Ratshele ambukuma la limba lʼekoko wa shi wakandalamaka. 10Lamʼakenyi Jakoba Ratshele, onʼa Labana, nyangu pami, la ekoko wa Labana, ndi akasukana, akangitula dive uma lʼunyo wʼeteko. Ndi akanosha limba lʼekoko wa Labana, nyangu pami, ashi. 11Jakoba akakhumbatela Ratshele, akatundo la delu, akaleli. 12Ku Jakoba akatela Ratshele ati: Dimi mbutoka la sho. Onʼa Rebeka, kadiya sho, kemi. Okone Ratshele akalawo la ntutela shi.

13Kamʼakuki Labana lukumu la Jakoba, onʼa kadiyendi ndi akalawo la ntulungula. Ndi akatukhumbatela, akanonana la ndi. Ndi akayi la ndi uya lu luudu landi. Ku Jakoba akusanyia akambu tshe. 14Labana akawutela ati: Mete, weka ami la emunyi ami mbeve. Ku Jakoba akadjaseʼaka Labana utundu a ngondo tshe. 15Labana akambula Jakoba ati: Kuyanga mbutoye la mi, ku we ayunkambelaka ulimu ukambelakambela? Umvuteli okone ayuyulanga dimi nkufuta. 16Labana aki la ana amantu ahendi. Lukumbu lʼenundu laki Lea, ku la kushi Ratshele. 17Lea aki ashu engelengele, keli Ratshele aki dimena diahangone. 18Jakoba akalangaka Ratshele efula. Okone ndi akatela Labana ati: Dimi layukukambela ulimu deku esambeli lu dimba dia onʼaye la kushi. 19Ku Labana akawutela ati: Dimi ndekaka nanga nkushandi uleki mbusha pami kekina. Udjase la mi. 20Jakoba akakambela Labana ulimu deku esambeli dikambu dia Ratshele. Deku diako diaki uku nshi motshi tshu lu ashu andi, ne dia ngandji kakandukaka Ratshele.

21Lʼokongo diku Jakoba akatela Labana ati: Umbisha wademi mbidjase la ndi, ne dia nshi yakatalakana yambukuka. 22Ku Labana akakati dambu, aketi antu tshe wa leko lu dambu. 23La dikolo diʼutshu, Labana akatshindela Lea, onʼandi a umuntu lʼenundu, laka Jakoba. Ku ndi akulungula wadi. 24(Labana akose Zilipa, ukambi andi a umuntu, akawusha onʼandi Lea.) 25La wedi a pindju, Jakoba ayenaki ku Lea one. Ku ndi akambula Labana ati: Na dikambu ne diutshediye? Aha lu dikambu dia Ratshele mbakamakukambelaka ulimu? Ya ukundi ambuyunkesa okone na? 26Labana akûkaluya diui ati: lu wudja asu, shu hatututshukamiaka kushi ntundu enundu atatshukama. 27Utashidisha lubingu landi. Ku shu tayukusha ukina ne dia ulimu wayuyunkambela deku esambeli dikina. 28Ku Jakoba akatshi osoku, akadjase la Lea lubingu landi. Ku Labana akayusha Jakoba ndu Ratshele, onʼandi a umuntu la kushi. 29(Labana akose Biliha, ukambi andi a umuntu, akawusha onʼandi Ratshele.) 30Jakoba akatshuki ndu Ratshele; ndi akalangi Ratshele uleki Lea. Ndi akamukambela Labana deku esambeli dikina.

Ana Wakuti Jakoba

31Lamʼakenyi Latuyalaka ati: Lea hukama ngandji, ndi akawete kanga diwutshi. Keli Ratshele aki ekumba, 32Lea akatshu diemi, akuti ona pami lakandole ati: Rubena (kitshimudi ati: We henyi ona pami). Ndi akati ati: Mete, Latuyalaka akenyi fono kami, ne dia uma lu dikambu ne, mbayunanga umemi. 33Ku ndi akatshu diemi ntu, akuti ona pami. Ndi akati ati: Latuyalaka akuki lukumu ati: Lea mpetshamaka. Okone ndi ambumbisna ndu ona pami one. Ndi akawole ati: Simeyona (kitshimudi ati: Ambuka). 34Ku Lea akatshu diemi ntu, akuti ona pami. Ndi akati ati: Etena kene umemi ayekesanela la mi, ne dia lambuwutela ana apami asatu. Uma lu dikambu so mbakawawole lukumbu vati: Lewi (kitshimudi ati: Ekesanelu). 35Ku ndi akatshu diemi ntu, akuti ona pami. Ndi akati ati: Etena kene, dimi layandula Latuyalaka mete. Diako mbakandawole lukumbu ati: Juda (kitshimudi ati: Diandu). Ku ndi akayemala, aha mbuta ntu.

Currently Selected:

Etatelu 29: TLL

Highlight

Copy