Etatelu 33

Jakoba la Esau Wambekesanela

1Jakoba akedia ashu, enyi ku Esau one ayayi la apami kama nyei. Okone ndi akakahanya ana le Lea, le Ratshele, ndu le ekambi ehendi wʼamantu. 2Ndi aketsha ekambi wʼamantu la anʼawo la ntundu, Lea la anʼandi lʼatei, ku Ratshele la Josefu lʼokongo. 3Ku ndi ndame aketi la ntundu kawo, akatakhusamaka tena esambeli edja ndu lamʼakandakumi lasuki la onangu. 4Esau akalawo la ntuhumana la ndi, akukhumbatela, akudingi anya lu kingu, akanonana la ndi. Ku vo ahendi wakaleli. 5Lamʼakedia Esau ashu, ndi akenyi amantu la ana. Ku ndi akambula Jakoba ati: Wa na weli leku na? Ku Jakoba akûkaluya diui ati: Ana wakambisha Unyashungu, dimi ukambi aye, aku. 6Ekambi a amantu la anʼawo wakasukana, wakukhusamela. 7Ku Lea la anʼandi wakasukana, wakukhusamela. Lʼokongo diku, Josefu la Ratshele wakasukana, wakukhusamela. 8Ku Esau akawumbula ati: Dikambu kuna diakayatumi ului wʼantu la dungalunga diakahumanyi la mi lu mbuka? Ku Jakoba akûkaluya diui ati: Dia dimi mbukama ketshi le ye, we khumemi. 9Ku Esau akawutela ati: Onalingu, dimi la diango efula; ulami diaye. 10Ku Jakoba akûkaluya diui lʼosengosengo ati: Kema. Naka dimi lambuhumo lukulu lʼolo lu ashu aye, etawo dia nungula ushasha one uma lu anya ami. Dimi lambena elundji kaye uku untu lambena elundji ka Unyashungu, ndu we ambunungula lʼongenongeno. 11Dimi lambukosengasenga nti: Ulunguli ushasha ami one wamumukela, ne dia Unyashungu akambukaka ketshi utamanya. Okone handjuhumba engo. Ndi akatamanya nsengasenga Esau, ku ndi akalungula ushasha andi. 12Esau akawutela ati: Tuneli, tutshu. Dimi layeta la ntundu. 13Keli Jakoba akawutela ati: Khumemi, we mbeyaka wati: Anʼami weki tutshitshe, watakikitala. Ndu dungalunga dialomia anʼadio dieko efula. Naka tayudikendjakendja lokendo la wulu lushi otoi, dungalunga tshe mbeyaka mvo. 14Dimi lambukosengasenga, we khumemi, nti: Eti la ntundu kami, dimi ukambi aye. Ku dimi layutakuyelaka okoke, uku ayukuka dungalunga la anʼami nkendakenda edja ndu lamʼayumukuma lakaye, la Seire. 15Esau akawutela ati: Etawo dimi nkutshikela ului wʼantu omotshi. Ku Jakoba akawumbula ati: Dikambu kuna diatshikaye? Dikambu otoi, etawo tshikima dia dimi mpumo lukulu lʼolo la ntundu kaye, we khumemi. 16Okone lushi lako Esau akakimela mbuka utsha la Seire. 17Ku Jakoba akatshu la Sukota, akatuhika luudu landi leko, ndu ekutu wa dungalunga diandi. Lu dikambu ne mbakawole dihuli diako vati: Sukota (kitshimudi ati: Ekutu).

18Lamʼakakalula Jakoba uma la Padana-Arama, ndi akakumi la ongenongeno lʼusumba wa Shekeme, lu kete ya Kanana. Ndi akahiki mvudu yandi yʼapema lʼumamu wʼusumba ako. 19Ndi akasumbi etenyi ka kete#33:19 Jas. 24:32; Joa. 4:5. kakandahiki mvudu yandi yʼapema uma le ana wa Hamora, shi Shekeme, lʼushinga wa tenyi dia fesa lukama. 20Ku ndi akatshi ediakelu leko, akakiole ati: Ele-Elohe-Isariyele (kitshimudi ati: Unyashungu keli Unyashungu wa Isariyele).

Currently Selected:

Etatelu 33: TLL

Highlight

Copy