Etatelu 27

Isaka Ambotshokola Jakoba

1Lamʼakayala Isaka usumbi, ashu andi wakayala enguli, ndi komena ololo ntu. Lushi lomotshi, ndi aketi Esau, onʼandi lʼenundu, ati: Esau li; ku ndi aketawo ati: Dimʼone. 2Shi akawutela ati: Kakiane laya usumbi. Dimi haleyi lushi lami la nyoi. 3Dimi lambukosengasenga nti: Osa dihumo diaye, ukulu aye wa pitu la uta, utshu la winga, utunyangeli nyama. 4Kuyunkateli ma dia diendje wuhu watumulangaka, kumbeladio. Kandjuli, keli kantakotshokodi ntundu dimi latavu.

5Rebeka akahukamaka okone akatelaka Isaka onʼandi Esau. Ku Esau akunela utsha la winga la ntuyanga nyama ya mbela. 6Rebeka akayutela onʼandi Jakoba ati: Ulungi, dimi lakuki sho atela onanyo Esau ati: 7Utunyangeli nyama, kuyunkateli ma, keli kantakotshokodi la ntundu ka Latuyalaka lamʼekimi la lumu. 8Onʼami, ulungi, umbukeli lu dikambu diayangami nkutela ne. 9Utshu lu limba la dungalunga, utose esongo ehendi wa mbudi wʼamena, ndjukateli sho ma dia diendje wuhu watundulangaka. 10Kotole sho, ndi katakotshokodi la ntundu ndi atavu. 11Keli Jakoba akakaluya nyangu diui ati: We henyi onalingu Esau eko la diosa dimba tshe, keli dimi kema. 12Undu papa ayumambamba, ku dimi layuyala kanga lukesu la ntundu kandi. Okone dimi layuyayangela mananu lu dihuli dia nungula otshoko. 13Ku nyangu akawutela ati: Onʼami, mananu keso kayali lʼote ami. Dikambu otoi, etawo diui diami. Tshoka, utombosele esongo ako wa mbudi. 14Ku Jakoba akatunda esongo a mbudi, akawela nyangu. Nyangu akayukate ma dia diendje wuhu wakalangaka Isaka. 15Rebeka akose eloto wʼamena waki lu luudu wakalotaka Esau, onʼandi lʼenundu, akelotsha Jakoba, onʼandi la kushi. 16Ndi akombe Jakoba dikuhu diʼesongo a mbudi lu anya la lu kingu kaki kundjala la diosa. 17Ku Rebeka akasha onʼandi Jakoba ma la unatshi wakandakati.

18Ndi akoto le shi, akaweti ati: Papa! Ku shi aketawo ati: Dimʼone; we onʼami akona oso? 19Ku Jakoba akûkaluya diui ati: Dimi Esau, onʼaye lʼenundu; lambushidiya ntsha uku akayamvutedi. Eto, usungukali, uli ma la unatshi wakayayangi, keli ontshokole. 20Ku Isaka akambula onʼandi ati: Hai! onʼami; ndi esadi wambuyutukitana li! Ku Jakoba akûkaluya diui ati: Ne dia Latuyalaka, Unyashungu aye, akampumusha lukulu lʼolo. 21Ku Isaka akatela Jakoba ati: Uhusukana nkamambi, we onʼami, dia dimi mbeya kana mete onʼami Esau keye, kana kema. 22Jakoba akasukana le Isaka, shi. Ndi akawamamba; akati ati: Diui so dieli dia Jakoba, keli anya mbeli anya wa Esau. 23Isaka kumbulimbitela, ne dia anya andi waki diosa tu uku anya wa Esau, onangu. Okone ndi akotshokola. 24Ndi akawumbula ntu ati: Mete, onʼami Esau keye? Ku Jakoba akûkaluya diui ati: Tuku dime Esau. 25Isaka akawutela ati: Umbela ma diako, nde unatshi wʼuma lu winga, keli nkotshokole. Jakoba akawela ma, ku ndi akali. Ndi akawela ndu wanu, ku ndi akano. 26Ku Isaka, shi, akawutela ati: Usukani, uyunkhumbateli lu kingu. 27Ku Jakoba akasukana, akukhumbatela lu kingu. Isaka akuki enyi kʼeloto andi. Ku ndi akotshokola, ati:

Enyi ka onʼami kambufana la enyi ekambo kakatshokola Latuyalaka. 28Unyashungu akusha lopopo uma lʼulungu la eteto lu kete. Dinela dia mbu ya nde la wanu kadiuyalaki efula.

29Antu wakukambelaki ulimu, wedja wakukhusamelaki. Mananu kayali le untu tshe layukudja mananu; la otshoko le untu tshe layukotshokolaka.#27:29 Etat. 12:3. #27:29 Heb. 11:20.

30Isaka akashidiya ntshokola Jakoba. Jakoba amo yema uma la le shi, ku Esau, onangu, ambukalula uma la winga. 31Ndu ndi akayukate ma dia diendje, akadiela le shi. Ndi akawutela ati: Papa etoka, uli unatshi wukelami, dimi onʼaye, uma lu winga, keli ontshokole. 32Ku Isaka, shi, akawumbula ati: Na we na? Ndi akûkaluya diui ati: Dimi Esau, onʼaye lʼenundu. 33Ku Isaka akakashimo, akasaki lukumba la yenyi; akawumbula ati: Na untu lakambela nyama kʼuma lu winga? Dimi lakakili tshe ntundu we atayi, ku lakatshokodi untu ako. Ndi ako kaya otshokwami. 34Lamʼakuki Esau aui wa shi, ndi akadi ekuku, akaleli wulu la okei. Ndi akatela shi ati: Papa, ontshokole ndu dimi. 35Ku shi akati ati: Onanyo akayi la lukesu, akoshi otshoko aye. 36Ku Esau akati ati: Aha Jakoba (kitshimudi ati: Ukesanyi) keli lukumbu landi? Ndi ambunkesa tena pendi ne: ndi akamputola ukito ami wa onʼenundu,#27:36 Etat. 25:29-34. ku kakiane ndi ambompotola ndu otshoko ami. Ndi akambula shi ati: We kunamemi nduku otshoko ukina? 37Isaka akûkaluya diui ati: Dimi lakawete khumeye. Dimi lakawusha anangu tshe dia vo ndjala ekambi andi. Lakawusha ndu otshoko wa ndjala la dinela la wanu. Na otshoko wukukimi nkusha we, onʼami? 38Esau akambula shi ati: We aki paka la otshoko one utu? Papa ontshokole ndu dimi! Esau akadi ekuku, akaleli.#27:38 Heb. 12:17.

39Isaka, shi, akawutela ati:

Ulungi, edjaselu kaye kayuyala lu

kete yaha la eteto ndu yaha la

lopopo lʼuma lʼulungu.

40Uma lu wulu wa yombo yaye

mbayuyutshikala la lumu.

We ayukambelaka onanyo ulimu.

Lamʼayuyuhindula, we ayokola

lokoho landi uma lu kingu kaye.#27:40 Etat. 36:8; 2 Khum. 8:20.#27:40 Heb. 11:20.

Jakoba Ambulawo Esau

41Esau akahetsha Jakoba fwe, ne dia otshoko wakotshokola shi. Esau akasanguya lʼutema andi ati: Nyoi ka papa aya suki. Okone lushi layuvo papa, dimi layudiaka onalingu Jakoba. 42Wakatela Rebeka dia esangweyu ka Esau, onʼandi lʼenundu. Ndi aketi Jakoba, onʼandi la kushi; akawutela ati: Ewo, onanyo Esau eko lu nkanela dia nkudiaka. 43Kakiane onʼami, eiawo diui diami. Uneli, ulawo utsha la Harana le onalingu Labana. 44Utukutudjase le ndi nshi motshi edja ndu udukuduku wa onanyo wambushila. 45Ku lamʼayukitakita kele kandi le ye, ndi ayuhela dikambu diakayutshela. Ku dimi layukutumela diui dia we ndja lindu. Ukundi ukukimi nyishisha nyu ahendi lushi otoi na?

46Rebeka akatela Isaka ati: Dimi la wutshu efula lʼutema ami dikambu dia ana amantu wʼasi Hiti. Naka Jakoba ayutshuka wadi uma lʼatei wa ana amantu wʼasi Hiti weli lu wudja one, na waho wa dimi ntshikala la lumu ntu?

Currently Selected:

Etatelu 27: TLL

Highlight

Copy