Etatelu 26

Isaka la Ngerare

1Ndjala ka kasha kekina kakayala lʼokongo a kene kaki lu nshi ya Abarahama. Ku Isaka akatshu la Ngerare le Abimeleke, khumʼekanga kʼasi Filistiya. 2Ku Latuyalaka akene le ndi; akawutela ati: Tuhuloki utsha lʼEdjibitu. Keli udjase lu kete yayumukutela. 3Utukudjase lu kete nye, dimi layuyala la ye, layukotshokola. Dimi layukusha wedja ene tshe, we la tukanula taye. Layushikike daka diakamalaki sho Abarahama. 4Dimi layufudia tukanula taye uku toto ta lʼulungu. Layuwasha wedja ene tshe, ndu antu wa wedja tshe wayotshokwama dikambu dia tukanula taye,#26:4 Etat. 22:16-18. 5ne dia Abarahama akakitanyiaka aui ami, elembe ami la adjangu ami. 6Okone Isaka akadjase la Ngerare. 7Asi ngelu kako wakawumbula dikambu dia wadendi. Ku ndi akakaiuya diui ati: Kadiyemi kendi.#26:7 Etat. 12:13; 20:2. Rebeka aki umuntu la dimena diahangone. Diako mbakuki Isaka woma dia mvuta ati: Wademi kendi, ne dia asi wudja ako watukudiaka lu dikambu diandi. 8Vo wakadjase leko edja. Lushi lomotshi Abimeleke, khumʼekanga kʼasi Filistiya, akendaka lu didishi, enyi ku Isaka one akenya la wadendi Rebeka. 9Abimeleke aketi Isaka; akawutela ati: Mete mete, wadeye kendi. Ukundi akayataka wati: Kadiyemi kendi? Ku Isaka akûkaluya diui ati: Dimi lakati osoku ne dia lakuki woma nti: Watukundjaka lu dikambu diandi. 10Ku Abimeleke akawumbula ati: Ukundi akayatutshela okone? Utunduyala untu omotshi uma lu wudja one akeyana la wadeye, tshiki we akatudji lʼunungu. 11Ku Abimeleke akadjangela wudju andi ati: Untu tshe layunanda pami kene kana wadendi, ayudiakema.

12Isaka akune wehu lʼekambo lu kete sho. Ku lu dinela diʼeleku kako, wehu wakandune, wakafuli lukama lukama, ne dia Latuyalaka akotshokola. 13Isaka akayala kanga ongonyi, akatangonanelaka edja ndu ndi akayala kanga ukundji efula. 14Ndi akayala la nyimba yʼekoko la nyimba ya ngombe ndu la ekambi efula. Ku asi Filistiya wakawukaka kandjema. 15Asi Filistiya wakatedia teko diʼashi tshe diakatatshimi ekambi wʼAbarahama, shi, lamʼakindi la lumu. 16Ku Abimeleke akatela Isaka ati: Unela, umo uma lʼatei a wudja asu, ne dia we ambutuleka wulu. 17Okone Isaka akunela uma leko, akatuhanga lʼukidi a Ngerare, akadjase leko.

18Isaka akatshimula teko diʼashi diakawatatshimi lamʼaki Abarahama, shi, la lumu, ne dia asi Filistiya wakaditedia lʼokongo a nyoi kʼAbarahama. Ndi akadietaka kumbu yakatadiole Abarahama, shi. 19Ekambi wa Isaka wakatshimi lʼukidi ako ntu, wakatundula difuku pulu ndu lʼeteko kʼashi wa nkela. 20Elami wa dungalunga wʼasi Ngerare wakami la elami wa dungalunga wa Isaka, wata vati: Ashi asu mbewo. Okone Isaka akakiole ati: Eseke (kitshimudi ati: Tamu), ne dia vo wakami la ndi. 21Okone vo wakatshimi eteko kekina. Vo wakadji la wo tamu ndu leko. Ku ndi akole eteko kako ati: Sitina (kitshimudi ati: Lutunu). 22Ndi akunela uma leko, akatutshima eteko kekina kakiwo kumama la ndi. Diako mbakandakiole ati: Rehobote (kitshimudi ati: Dihuli). Ku ndi akati ati: Latuyalaka ambutukitsha lu dihuli dia wuki. Okone tayongonanela.

23Ndi akambela uma leko utsha la Bere-Sheba. 24Latuyalaka akene le ndi lʼutshu; akawutela ati: Dimi keli Unyashungu a Abarahama sho. Tukaki woma; dimi leko la ye. Dimi layukotshokola ndu layufudia tukanula taye lu dikambu dia ukambi ami Abarahama. 25Isaka akatshi ediakelu leko, ku ndi akatemolaka lukumbu la Latuyalaka. Ndi akahiki ndu luudu landi la dipema. Ekambi andi wakatutshima eteko kemotshi.

26Abimeleke#26:26 Etat. 21:22. la ongenyi andi Ahuzata, ndu Fikole, olombodi andi wʼului wʼalimbi wakatshu uma la Ngerare utsha le Isaka. 27Isaka akawumbula ati: Nyu atunyi ami watumpetshaka, nyakambitshanya uma lu wudja anyu. Ukundi ambunyuya le mi na? 28Ku vo wakûkaluya diui vati: Shu menaka hwe shati: Latuyalaka eko la ye. Diako mbakatatanela shati: Tushani la ye daka. 29We tututshelaki nduku dikambu dia kolo, ne dia shu kunkutshela kolo, tshikima ololo utu. Shu takakunyia la ki. Kakiane we eli otshokwami wa Latuyalaka. 30Okone Isaka akakatela dambu. Ku vo wakali, wakano. 31Vo waketo kʼolomo la pindju, wakashikike daka diawo. Ku Isaka akakendja. Okone vo wakatshu la ki. 32Lushi lako ekambi wa Isaka wakayi; wakayuwutela lukumu la eteko kakawatshimaka vati: Tambutundula lʼashi. 33Ku ndi akakiole ati: Shiba. Lu dikambu diako mbatuwetaka usumba ako edja ndu elo vati: Bere-Sheba.

34Lamʼakayala Esau la deku akumi anei, ndi akatshuki Judita, ona umuntu a Beri, usi Hiti, ndu Basemate, ona umuntu a Elona, usi Hiti. 35Vo wakanyangia Isaka la Rebeka.

Currently Selected:

Etatelu 26: TLL

Highlight

Copy