Etatelu 25

Tukanula tʼAbarahama la Ketura

(1 Ek. 1:32-33)

1Abarahama akatshuki wadi ukina, lukumbu landi Ketura. 2Ndi akuti la Abarahama Zimerana, Jokishana, Medana, Midiyana, Ishibake, la Shua. 3Jokishana akuti Seba la Dedana. Ana wa Dedana ane: Ashurima, Letushima, Leumima. 4Ana wa Midiyana ane: Efa, Efere, Hanoka, Abida la Eleda. Aso tshe weli ana apami wa Ketura. 5Abarahama akasha Isaka diango diandi tshe. 6Ntundu Abarahama atavu, ndi akasha ndu ana wa esika andi eshasha. Ndi akawanganya etali uma lasuki la onʼandi Isaka, akatumi utsha lu leke lʼehutwelu ka unya.

Nyoi kʼAbarahama

7Nshi ya lumu tshe ya Abarahama yaki deku lukama akumi esambeli la tanu. 8Ku Abarahama akavu lamʼakandayala usumbi a lukusumbi, akunduya andja. Ku ndi akayeu washi. 9Anʼandi Isaka la Ishamele wakukhunde lu wuku wa Makipela, lu ekambo kaki Eferona onʼa Zohara, usi Hiti. Ekambo kako kakelanedi la Mamare. 10Ekambo keso kaki ekambo kakasumbi Abarahama uma le asi Hiti.#25:10 Etat. 23:3-16. Loko kakawakhunde ndu Abarahama uku akawakhunde wadendi Sara. 11Lʼokongo a nyoi kʼAbarahama, Unyashungu akatshokola onʼandi Isaka. Ndi akadjase la Bere-Lahai-Roi.

Tukanula ta Ishamele

(1 Ek. 1:28-31)

12Tukanula ta Ishamele, onʼa Abarahama, lakanduti la Hangara usi Edjibitu, ukambi a Sara tone. 13Kumbu yʼana apami wa Ishamele uku nonga yawo nye. Ona lʼenundu Nebayote, Kedare, Adibele, Mibisame, 14Mishima, Duma, Masa, 15Hadada, Tema, Jeture, Nafishi la Kedema. 16Aso weli ana apami wa Ishamele, uku aki kumbu yawo la ngelu yawo ndu wedja awo. Vo waki ewandji dikumi la ehendi wa wedja awo. 17(Nshi ya lumu tshe ya Ishamele yaki deku lukama akumi asatu la esambeli. Ku ndi akavu, akayeli washi.) 18Anʼandi wʼapami wakadjase uma la Havila pulu ndu la Shura yelanedi la Edjibitu, lu leke lʼutsha lʼAsuriya. Ndi akadjase lasuki la anangu tshe.

Eutwelu ka Esau la Jakoba

19Tukanula ta Isaka, onʼa Abarahama, tone. Abarahama akuti Isaka. 20Lamʼaki Isaka la deku akumi anei, ndi akatshuki Rebeka, kadiya Labana, onʼa Betuele, usi Arama wa la Padana-Arama. 21Isaka akalombela wadendi Latuyalaka, ne dia ndi aki ekumba. Latuyalaka akuki dombelo diandi. Okone wadendi Rebeka akatshu diemi. 22Ana wakakadimo lʼutema andi. Ku ndi akayambula ati: Naka wambutshindana osoku, ukundi ayumuyala na? Ku ndi akatshu la ntumbula. Latuyalaka. 23Ku Latuyalaka akawutela ati:

Wedja ehendi mbeli lʼutema aye.

Wedja ehendi ako wayatana

lamʼayuwutumba uma lʼutema aye.

Wudja omotshi ayuleka wudja ukina wulu.

Okone umba ayukambela shaku ulimu.#25:23 Rom. 22:16-18.

24Lamʼakuki nshi ya mbuta, ndi akuti diasa. 25Umba akuto welo belaa la diosa ditnba tshe. Wakawole vati: Esau (kitshimudi ati: Kanga diosa). 26Lʼokongo diku Shaku akuto ayakimedi Esau lʼetshindji. Diako mbakawawole vati: Jakoba (kitshimudi ati: Ukimedi etshindji). Isaka aki la deku akumi asamalu lamʼakanduti la Rebeka ana ako.

Esau Ambusundja Ukito Andi

27Ana apami ako wakuli. Esau akayala minginga ka lononga ndu umbitshi winga wa lu esui. Keli Jakoba aki kanga diki, akadjaseka paka la ngelu. 28Isaka akaleki mbuka Esau ngandji, ne dia ndi akalekaka nyama yakandadiakaka. Keli Rebeka akaleki mbuka Jakoba ngandji. 29Ku lushi lomotshi lamʼakakateka Jakoba usawu a belaa, Esau akakalula uma la winga, ndi akakomo dimba la kipongoshi ka ndjala. 30Ku Esau akasengasenga Jakoba ati: Umbisha yema yʼusawu wa belaa keli ndi, ne dia dimba diambokomo la ndjala. Diako mbakawole Esau vati: Edome (kitshimudi ati: Belaa). 31Jakoba akûkaluya diui ati: Unsundja ukito aye wa onʼenundu elo. 32Esau akûkaluya diui ati: Dimi layanga mvo la ndjala, waho akona wayuyala ukito wa onʼenundu le mi? 33Ku Jakoba akûkaluya diui ati: Utantshibediwo kakiane. Ku Esau akutshibela. Ndi akasundja Jakoba ukito andi wa onʼenundu.#25:33 Heb. 12:16. 34Ku Jakoba akasha Esau ma la usawu ako wa belaa waki la konde loko. Ku Esau akali, akano, akunela, akatshu. Osoku mbakonyola Esau ukito andi wa onʼenundu.

Currently Selected:

Etatelu 25: TLL

Highlight

Copy